“Ti Nabaknang nga Enkuentro”
BAYAT ti kalgaw ti 1984, ni Gerard, agtutubo a lalaki a taga Francia, nagrubuat iti maysa nga innem a bulan a panagadbenturero—maysa a panagdaliasat babaen ti bisekleta iti intero nga Estados Unidos ken Canada. Dagiti nakarangranga a Rocky Mountains ti nakaay-ayatda kenkuana, dagiti nakataltalna a parke ti nangpakalma kenkuana, ngem ti buya a nakitana idiay Montmagny, Quebec, Canada, ti namagsiddaaw kenkuana iti kasta unay; daytat’ nangbalbaliw ti kurso ti panagbiagna.
Iti Domingo, Setiembre 16, idi agpedpedal ni Gerard a limmasat idiay Montmagny nadlawna ti maysa a nagatiddog a linea dagiti kotse a nakaparada iti igid ti kalsada. Sumaganad, nakakitat’ ginasgasut a tattao nga aguummong iti maysa a disso a pagibangbangonanda. “Aniat’ mapaspasamak ditoy?” insaludsodna iti maysa kadagiti trabahador a mangiturturong iti trapiko. Nupay ti lalaki ti okupado, nangipaay iti tiempo a mangilawlawag ken Gerard nga amin dagitoy a trabahador ket Saksi ni Jehova a mangus-usar ti ngudo ti lawasda a mangibangon iti maysa a balay a maipaay iti narelihiusuan a panaggigimongda. Di pagaammo ni Gerard, isut’ nakagteng kadagiti maudi nga okupado nga or-oras iti dua-aldaw a proyekto ti Kingdom Hall. Isut’ nagsiddaaw kadagiti isuamin a nakita ken nangngegna. Iti dayta a rabii insuratna iti diaryna: “Iti rabii nasarakak dagiti Saksi ni Jehova. Nangibangonda ti maysa a balay iti dua nga aldaw. Adda nasurok a 1,000 kadakuada. Nakabakbaknang unay nga enkuentro.”
Di nagbayag kalpasanna nagsubli ni Gerard idiay Francia. Dua a tawen ti kamaudiananna, idi Hulio 26, 1986, nangipatulod ti surat iti Kingdom Hall of Jehovah’s Witnesses idiay Montmagny. Insuratna:
‘Malaglagipyo pay laeng aya ti inkay pannakisarsarita iti maysa a siklista a taga Francia bayat ti maikadua nga aldaw ti proyakto a panangibangbangonyo ti Kingdom Hall? Iti dayta nga aldaw ti manangiturong ti trapiko ti nakaimula ti maysa a bin-i. Sumagmamano a bulan iti kamaudiananna sinarungkarandak dagiti Saksi idiay Francia, ket inawatko ti panangitukonda nga agadal ti Biblia a kaduada. Gapu ta naggapuak iti maysa a napeklan a Katoliko a pamilia, saan a nalaka ti panagadal. Ngem pinatubo ni Jehova ti bin-i. Dua a lawas ti napalabasen nabautisaranak iti maysa a kumbension idiay Nantes. Agyamyamanak ken ni Jehova ti panangipalubosna a nasarakak ti kinapudno, ket agyamyamanak kadagiti isuamin nga insuro ti kabsat a lalaki kaniak iti dayta a Domingo, Setiembre 16, 1984. Nainkabsatan a kablaaw manipud iti maysa nga adbenturero a nakumberte iti kinapudno.’
Anian a ragsak ti narikna ti kongregasion idiay Montmagny kalpasan ti pannakangegda iti pannakaibasa ti surat ni Gerard idiay Kingdom Hall da! Amin dagidiay timmulong iti panangibangon ti balay ti nakapasar iti kinapudno dagiti sasao ni Salomon: “Ipalladawmo ta tinapaymo iti rabaw dagiti dandanum, ta isu masarakamto iti kalpasan dagiti adu nga al-aldaw.” (Eclesiastes 11:1) Wen, dagiti naimbag nga epekto dagiti proyekto ti Kingdom Hall nakapapautda ken nasaknap ti epektona iti adu a pamay-an.