Malukatan ti Baro nga Eskuelaan!

Daytoy nga artikulo linaonna ti kababagas ti pangserra a komento ti graduasion iti maika-82 a klase ti Gilead.

NANIPUD iti panangrugina idi Pebrero 1943, ti Watchtower School of Gilead nakasanayen iti nasurok a 6,000 a dedikado a ministro dagiti Saksi ni Jehova a maipaay iti trabaho a kinamisionero. Bayat iti nasurok a 40 a tawtawen a pannakaibaon dagitoy a misionero, pinulpullo a dagdaga ti nalukatan nga umawat iti naan-anay a pammanek maipapan iti Pagarian. No taliawentayo ti naaramidanen ni Jehova, sigurado nga agrag-o ti ili ti Dios a makakita iti kaitungpalan daytoy nakapatpateg a padto.

Idiay Isaias kapitulo 49, bersikulo 9-12, ti mammadto impadtona ti pannakawayawaya dagiti tattao nga agayat iti kinalinteg a nakayawan kas relihiuso a balud iti “Babilonia a Dakkel.” Babaen iti napulotan a klase nga adipenna ditoy daga, naiyebkas ti umaweng nga awis ni Jehova: “A kunaem kadagiti adda a nabalud, ‘Rummuarkayo!’ kadagiti adda iti kinasipnget, ‘Agparangkayo!’ Agarabdanto kadagiti daldalan . . . Saandanto a mabisinan ken mawaw, saanto met a kabilen ida ti pudot ken init. Ta daydiay adda kaasina kadakuada iturongna ida iti met denna ti ubbog ti danum . . . Adtoy! Dagitoy dumtengdanto nga aggapu iti adayo.” Adda kadi sungbat? Pudno nga adda! Dagiti nasingpet-panagpuspusona immayda iti ginasgasut a ribo, manipud iti amin a direksion, a nangiparangarang kadagiti bagbagida a mabisbisinan iti kinapudno, nga agtartarigagay a mangan ken maliwliwa babaen iti Sao ti Dios, nga agsapsapul a mawayawayaan iti naespirituan manipud iti “Babilonia a Dakkel.” (Apocalipsis 17:5) Itan addadan iti uneg ti naindagaan a pagturayan ti organisasion ti Pagarian, a mangmangan iti aglaplapusanan a naespirituan a taraon.

Naisangsangayan nga Irarang-ay

Idi agtengnga iti 1940, dagiti dagdaga idiay Latin America ken ti Caribbean nairamanda kadagiti damo a nagunggonaan manipud kadagiti misionero iti Gilead. Sumagmamano laeng dagiti agibumbunannag kadagitoy a luglugar, isu a nangipaay iti pudpudno a karit iti panangipaay iti naan-anay a panangikaskasaba iti Pagarian. Kas pangarigan, ti Puerto Rico ti addaan laeng iti 25 nga agibumbunannag idi 1944. Ti Costa Rica ti addaan iti 181. Ti Mexico ti addaan iti 2,431 nga agibumbunannag idi 1944 idi simmangpet ti immuna a nagraduar iti Gilead. Ngem bayat a dagiti mawaw iti kinapudno nga indibidual rimmuarda manipud iti relihiuso a kinasipnget ket imparangarangda ti bagbagida a kas mangsapsapul iti Pagarian ti Dios, sireregta a nangasabada, ket dadduma ti simrek iti serbisio a kinapayunir. Dagiti lallaki inawatda dagiti responsabilidad. Ti resulta? Itatta, ti Puerto Rico addan naireportna a 21,943 nga aktibo a ministro, mamimpat a daras ti kaadu dagiti aktibo kadagiti 12 a dagdaga nga agrepreport idiay Caribbean idi 1947. Ti Costa Rica ad-adu ti agibumbunannagna itan ngem ti amin nga agibumbunannag iti Central America 40 a tawtawenen ti napalabas. Idi Enero daytoy a tawen, ti Mexico nangireport iti baro a kangatuan a bilang a nasurok a 206,000 nga agibumbunannag, a dayta ti agarup kas iti kaadu dagiti agibumbunannag a mangaskasaba iti intero a lubong 40 a tawtawenen ti napalabas.

Idiay Sud America umas-asping met iti dayta. Idi dagiti misionero naibaonda idiay Argentina idi 1947, addada 790 nga agibumbunannag, Ita addan 63,613 nga aktibo a ministro, 26 a daras iti bilang dagiti mangaskasaba kadagiti 12 a nagduduma a pagpagilian idiay Sud America 40 a tawtawenen ti napalabas. Ket ti ngay Brazil? Idi dagiti immuna a misionero naibaonda sadiay idi 1945, adda laeng 394 nga agibumbunannag a mangar-aramid iti trabaho a panangasaba. Ngem nagtultuloyda, ket itan ti Brazil linab-awannan ti 200,000 nga agibumbunannag. Dayta ket nasurok a 80 a daras iti bilang dagiti aktibo iti amin a Sud America idi 1947. Dagiti dadduma a pagpagilian iti dayta a kontinente addaanda met kadagiti naisangsangayan nga irarang-ay.

No mapantayo iti Adayo a Daya, makitatayo manen ti nakaskasdaaw a pammaneknek iti bendision ni Jehova bayat a ti mangwayawaya a mensahe iti kinapudno iti Pagarian ti namagbalin kadagiti rinibo a makaruar manipud iti kinasipnget. Idi dagiti immuna a misionero natudinganda idiay Japan idi 1949, ti bassit laeng a bilang a walo nga agibumbunannag ti nagreport. Kadagiti walo a dagdaga iti Asia a nangireport iti trabahoda 40 a tawenen ti napalabas, adda ti nakagupgopan a 475 nga aktibo a ministro. Itatta, addan 116,272 idiay laeng Japan.

Idiay Sud Pacipico adda laeng dua a sangsanga agingga idi 1959. Babaen iti tulong dagiti agibumbunannag manipud iti Australia nga immakar tapno agserbi sadiay dakdakkel ti pakasapulan, ken babaen iti panangikagumaan dagiti dadduma nga agibumbunannag iti kongregasion ken ti sumagmamano a misioneros, rinibo a tattao ti makaipaayan iti naimbag a damag kadagiti nadumaduma a teritoria a purpuro. Itan addadan innem a kanayonan a sangsanga iti dayta a paset iti tay-ak.

Ti historia iti irarang-ay iti Africa ket nakaragragsak met. Ti 17 a pagpagilian nga agrepreport idi 1947 addaan iti nakagupgopan nga agibumbunannag a 24,896. Ngem babaen ti itutulong dagiti misionero iti panangisaknap iti naimbag a damag a sipapartak, ginasgasut a ribo ti di nagbayag nangiparangarangen iti bagbagida tapno agsapul ken Jehova ken iti kinalintegna. Itatta, idiay laeng Nigeria, agarup 130,000 a Saksi ti sireregta a mangiwarwaragawag iti damag ti Pagarian.

Awan duadua a ti mangwayawaya a Sao iti kinapudno tungtungpalennan ti pagayatanna. Daytat’ agbalballigin iti nakaibaonanna. (Isaias 55:10, 11) Itan ta adda ti kasta unayen nga apit a maur-urnong, dayta met laeng a Sao ti mangipanamnama kadatayo a ni Jehova mangibangonto iti ad-adu pay a nasanay a manangipastor. (Idiligyo iti Jeremias 23:4.) Ti Bagi a Manarawidwid ammoda a naimbag ti ad-adda a pannakasapul dagiti kualipikado a lallaki a mangaywan kadagiti responsabilidad iti tay-ak agraman kadagiti nadumaduma a sangsanga iti Sosiedad. Naaramiden dagiti addang a makatulong iti panangsabet iti daytoy a kasapulan.

Ti “Mimisterial Training School”

Dakayo a graduado iti maika-82 a klase iti Gilead, agraman dagiti amin nga adda ditoy iti daytoy makapabileg unay nga okasion, ti maragsakanto a makaammo nga inton otonio iti 1987 maysa a baro nga eskuelaan ti malukatan. Daytoy a “Ministerial Training School,” kas ti pangawagto iti dayta, ket pasetto iti Watchtower Bible School of Gilead, gapuna dagiti kakabsat kadagiti dadduma a dagdaga mabalinda ti agatender. Ti umuna a klase ti mainanama a mangrugi iti agarup Oktubre 1 daytoy a tawen idiay siudad ti Pittsburgh, Pennsylvania, E.U.A., ti immuna a sentro ti panagrang-ay iti Sosiedad. No maturposen ti umuna a klase, dadduma a klase ti maaramidto nga agpapada ti kawatiwatda kadagiti nadumaduma a paspaset iti Estados Unidos.

Dagiti piho a Nainkasuratan a kasapulan ti masapul a masabet dagidiay a maiserrek. Ti panagsanay ti maipaay a damo kadagiti agsolsolo a papanglakayen ken ministerial nga ad-adipen nga addaan iti nasayaat a salun-at. No dadduma ti payunir, nasaysayaat pay. Dagidiay a maawis iti eskuelaan ti masapul a situtulok nga agserbi, apaman a malpas ti pannakasanayda, sadinoman ti pakasapulan iti sangalubongan a tay-ak. Daytoy sapulenna ti espiritu ni Isaias, a mangipaay iti bagina a situtulok, a kunkunana: “Adtoyak! Ibaonnak.” (Isaias 6:8) Dakayo a graduado iti daytoy maika-82 a klase, agraman dagiti misionero nga agserserbin kadagiti ginasgasut a dagdaga, mabalinyo ti manginanama a maaddaankayto kadagiti dadduma a nasanay a kakabsat a lallaki a makipagtrabaho a kaduayo a sangsangkamaysa.

Ti interamente a baro a curriculum ti naisagana a maipaay iti “Ministerial Training School.” Ti eskuelaan ti naipasdek a ti panggepna isu ti panangsanay kadagiti kualipikado a kakabsat a lallaki nga addaan iti organisasional a kapadasan kas papanglakayen wenno ministerial nga ad-adipen iti kongregasion.

Ti Pannakasapul iti Irarang-ay

Simmaruno iti piesta iti aldaw ti Pentecostes idi 33 K.P., ti kongregasion Kristiano ti aktibo unay iti panangisaknap iti naimbag a damag idiay Jerusalem, iti isuamin a Judea ken Samaria, ken kalpasanna, agingga iti ungto ti daga. (Aramid 1:8) Agarup idi tawen 60 K.P. ni apostol Pablo, isu a nangidaulo iti trabaho a panagebanghelio kadagiti nasnasion, nagsurat kadagiti taga Colosas, a kunkunana: “Gapu iti inanama a naidulin kadagiti langlangit a maipaay kadakayo isu a nangngegyon gapu iti sao ti kinapudno ti ebanghelio, a dimteng kadakayo a kas met iti isuamin a lubong adda nga agbungbunga ken dumakkel.” Kalpasanna innayonna a dagidiay a padana a manamati ‘dida koma pakuti iti pananginanama iti ebanghelio a nangngegda a naikaskasaba iti amin a parsua iti baba ti langit.’​—Colosas 1:5, 6, 23.

Iti ababa laeng a tiempo, dagiti immuna a Kristiano naisaknapdan ti naimbag a damag iti isuamin a lugar. Impaay ni Jehova ti irarang-ay, a ti bilang dagiti ad-adalan ti immadu iti kasta unay. Daytoy kasapulanna dagiti ad-adu pay a kualipikado a lallaki a mangisuro iti kongregasion ken mangipastor iti arban. Maysa nga agtutubo a manangaywan a naikkan iti kasta a rebbengen isu ni Timoteo. Ania ti imbalakad ni apostol Pablo nga aramiden ni Timoteo? Awan sardeng ti panagsanayna: “No ipalawagmonto kadagiti kakabsat dagitoy a bambanag, sikanto ti maysa a naimbag a ministro ni Kristo Jesus, a nataraonan kadagiti sao ti pammati ken ti naimbag a sursuro a sinurotmo . . . Ket agwatwatka a maipaay iti nadiosan a debosion kas kalatmo.” (1 Timoteo 4:6-8) Daytoy ti napatpateg ngem ti panangipamaysa kadagiti personal a pagayatan wenno panggep, agraman ti panangwatwat ken panangsanay iti bagi. Tapno naan-anay a maitungpalna iti ministeriona, ni Timoteo masapul a salwadanna ti bagina ken ti sursurona.

Dakayo a graduado iti daytoy a klase iti Gilead immawatkayo ti pannakasanay a maipaay iti trabahoyo a kinamisionero. Dagiti nagsasayaat a naespirituan a sagsagut ti impaay kadakayo dagiti kualipikado a mangisuro a manangaywan. Itan adda agur-uray a nagsayaatan a programa iti panangisuro a maipaay kadagiti kualipikado a lallaki nga addaan kadagiti kapadasan iti panangaywan kadagiti rebbengen iti kongregasion. Dagitoy masanaydanto a buyogen iti panangmatmat iti nadiosan a debosion, isu a mangtulongto kadakuada a mangtaginayon kadagiti umiso a panangmatmat ken mangkabal kadakuada a mangipamaysa iti insurat ni Pablo ken ni Timoteo: “Awan koma ti pakaumsian ti kinaubingmo. No di ket, sika koma ti ulidan kadagiti namati iti sao, iti panagbiag, iti ayat, iti pammati, iti kinadalus. . . . Umagawaka iti panagbasbasa, iti pammagbaga, iti panangisursuro. Gagetam dagitoy a bambanag; isuda laeng ti sanguem, tapno ti irarang-aymo maiparangarang koma kadagiti isuamin.”​—1 Timoteo 4:12, 13, 15.

Kas iti kaso ni Timoteo, dagidiay natudingan a kakabsat a lallaki kadagiti rebbengen iti kongregasion itatta, agraman dagiti agtutubo a lallaki, ti makabigbig koma a daytoy ket mainugot ken naganat a tiempo a panangiparangarangda iti irarang-ayda. Babaen iti panangaramid iti kasta, paneknekanda iti naimpusuan a pamay-an a maikarida kadagiti nadiosan a pagalagadan ken addaanda iti napudno a pangngeddeng a mangaywan kadagiti naespirituan a pagimbagan, iti kasta kualipikadoda a maipaay iti dadduma pay a pribilehio iti serbisio.​—Filipos 2:20, 21.

Gapu iti pakasapulan ita iti daytoy a tukad iti pannakaibanag iti nadiosan a panggep, maysa a pribilehio nga usarennatayo ni Jehova iti sadino a lugar iti uneg ti organisasionna. Anian ti panagyamantayo kenkuana kas ti Naindaklan a Pastortayo ken Naimbag a Pastortayo, ni Jesu-Kristo, iti daytoy baro, naintiempuan a probision ti organisasion, ti “Ministerial Training School”!