Ti Naisangsangayan a Sagut dagiti Ub-ubbing

TI NAPASNEK a panagsasao dagiti ubbing masansan pagtignayenna dagiti natataengan nga agsardeng ken agpanunot. Naminsan, kalpasan ti pannakakitada a nangaramid iti milagro ni Jesus, dagiti ubbing a lallaki nagikkisda: “Hosanna, iti Anak ni David!” Nagluksaw dagiti narelihiusuan a papangulo iti daytoy. Gaput’ pannakabulsekda iti imonda, saanda a maawatan a ni Jesus ti Mesianiko a kapuonan ni Ari David. Ngem simmungbat ni Jesus kadakuada ket kunana: “Saanyo aya a nabasa daytoy, ‘Iti ngiwat dagiti maladaga ken dagiti agsussuso [ti Dios] inan-anayna ti pannakaidayaw’?” (Mateo 21:15, 16) Itatta, ti Dios kaskasdi nga us-usarenna “ti ngiwat dagiti maladaga” a mangtulong kadagidiay ti is-isipda ket nabulsekan babaen kadagiti ulbod a sursuro.​—2 Corinto 4:4.

◻ Ni Daleen, agtawen ti 12, pinaneknekanna ti bagina a responsable nga ubing a babai idiay eskuelaan. Maysa nga aldaw isut’ nadutokan a pagbalinen nga okupado ti klase kabayatan a ti maestrada ket adda dadduma nga ar-aramidenna. Aniat’ aramidenna ita? “Naikeddengko nga ilawlawag kadagiti kaeskuelaak a dagiti tattao a nalinteg agbiagdanto nga agnanayon ditoy daga ket saan nga isuamin ket agturong idiay langit,” kuna ni Daleen. Babaen iti pammalubos ti maestra, imparang ni Daleen ti impormasionna iti klase kas maysa a pannakipatpatang iti situtulok a kaeskuelaanna. Isut’ nangbasa iti sumagmamano a kasuratan, agraman Salmo 37:29: “Ti sililinteg tawidennanto ti daga, ket agtaengto kenkuana nga agnanayon.” Ania ti riknada? “Insardeng ti maestra ti obrana ket nagdengngeg a sititimud kas kadagiti ubbing,” kuna ni Daleen. “Kalpasanna isu ti nagyaman kaniak, ket sumagmamano kadagiti ubbing ti nagsalsaludsod.”

◻ Ni Lillian, agtawen ti 5, ken dagiti dadakkelna agindegda 12 milia (19 km) manipud bassit nga ili ti Sud Africa nga isu ti masansan a pakigimgimonganda ken pangaskasabaanda iti balaybalay. Maysa a Domingo, gapu ta perdi ti lugan, naikeddeng dagiti nagannak kenkuana nga agtalinaedda lattan idiay balay. “Apay a ditay mapan mangasaba?” insaludsod ni Lillian. Gapu ta di napnek iti rasonda, kunana: “Saanko a palubosan a daytat’ mangpasardeng kaniak.” Kalpasanna ti ina nadlawna a ni Lillian ken ti bag a pangaskasabana ket awanda. Ti bassit nga ubing a babai ti okupado a bumisbisita kadagiti kakaarrubada, a sibubulos a nagipadpadawat kadagiti literatura ti Biblia​—agraman personal a Biblia ni nanangna! Maysa a baket ti nagsiddaaw iti panangilawlawag ni Lillian iti umay a Paraiso nga iti kamaudiananna inakseptarna ti pannakaitukon ti panagadal ti Biblia manipud ina ni Lillian. Daytoy a babai idi agangay nagbalin a dedikado a managdaydayaw ken Jehova.

Wen, ti Dios kaskasdi nga us-usarenna “ti ngiwat dagiti maladaga” a mangted ti dayaw. Ti kinapasnekda ti mangsagid unay iti puspuso dagiti natataengan. Ngarud, maiyanatup unay, a dagiti ub-ubbing agraman dagiti natataengan nairamanda iti engrande nga imbitasion: “Idaydayawyo ni Jehova manipud iti daga, . . . babbaro man ken babbalasang, lallakay ken ub-ubbing. Idaydayawda koma ti nagan ni Jehova, ket ti naganna laeng ti maitan-ok.”​—Salmo 148:7, 12, 13.