Makiraman Dagiti Estudiante iti “National History Day”

AGKARASANGPET ti awag ti telepono iti sangalubongan nga opisina dagiti Saksi ni Jehova idiay Nueva York idi Abril iti 1991. Naggapuda kadagiti agtutubo a mangar-aramid iti proyekto a panagsirarak maipapan kadagiti Saksi.

Tunggal tawen idiay Estados Unidos, kas paset iti programa ti National History Day, makiraman dagiti estudiante iti maika-6 inggat’ maika-12 a grado iti salip a mainaig iti tinawen a tema nga imatmatonan ti eskuelaan. Ti tema ita a tawen, “Dagiti Kalintegan iti Historia,” ket mainaig iti maika-200 a bisperas ti Bill of Rights ti E.U. Naipaay ti maysa a listaan ti mainaig nga impormasion a tumulong kadagiti estudiante a mangpili iti topiko a salaysayenda.

Agarup 500,000 nga estudiante ti nakiraman iti pito a klase ti salip. Ti makapainteres kadagiti Saksi isut’ presentasion ti sumagmamano manipud iti maikawalo a grado nga isuda ti nangabak ken kamaudiananna nangiparang idiay Washington, D.C.

Dua a 14-años nga ubbing a babbai manipud idiay Pennsylvania, da Nicole DiSalvo ken ni Gwen Naglak, a di Saksi ni Jehova, ti nangpili iti dua a kaso iti panagsaludo iti bandera a nakainaigan dagiti Saksi idi 1940’s. Iti panagsirarakda, nakiumanda kadagidiay nairaman iti kaso a Minersville School District v. Gobitis ken West Virginia Board of Education v. Barnette, ken binisitada ti sangalubongan nga opisina dagiti Saksi ni Jehova tapno adu pay ti maammuanda maipapan iti pammati dagiti Saksi.a

Oral a Presentasion

Nangiparang ni Nicole iti oral a presentasion a napauluan “Ti Kinatured nga Agtugaw.” Inladawanna ni Lillian Gobitas ket pinabbiagna ti rikrikna ken tured ti estudiante a ni Lillian bayat nga insalaysaynat’ personal a pangngeddeng ni Lillian a di agsaludo iti bandera iti baet ti panangilaksid kenkuana dagiti kaeskuelaanna. Impariknana ti rag-o ni Lillian iti tunggal panagballigina iti legal a pamay-an a nakagteng iti Korte Suprema idi 1940. Nagkawes iti nangisit tapno iladawanna ti ukom ti Korte Suprema, imbitlana ti kapanunotan ti Korte maibusor ken Miss Gobitas. Nupay naabak ti kaso, inladawan ni Nicole ti pammati ni Lillian nga umiso ti pangngeddengna.

Naisurat a Presentasion

Ti papel ni Gwen Naglak, “Maysa a Pagilian iti Sidong ti Dios,” inusigna ti kasasaad ti lubong idi 1935 ken ti kinapudno a nagkedked dagiti Saksi ni Jehova nga agsaludo iti bandera. Narikna ti managbasa ti epekto daytoy idi nga iti damo ni William, 10, kalpasanna ni Lillian, 12, nailaksidda idiay eskuelaan.

Kadagiti kaso iti korte a kasaruno iti pannakailaksidda idiay Pennsylvania, nagdesision amin nga ukom iti pabor ti pamilia Gobitas. Nupay kasta, impan dagiti opisiales ti eskuelaan ti kaso iti Korte Suprema. Sadiay, idi Hunio 3, 1940, nagkeddeng ti Korte maibusor kadagiti Gobitas. Maysa a resultana isut’ pannakairurumen dagiti rinibo a Saksi ni Jehova. Inadal a naimbag ni Gwen dagiti pasamak ingga iti desision ti Korte Suprema idi 1943, idi a binaliktad ti Korte ti desision idi 1940.

Iti pangserrana, insurat ni Gwen: “Dayawek da Lillian ken ni William gapu iti kinaturedda a mangaramid iti panagriknada a naimbag ken panangilabanda iti pammatida. Iti panangmatmatko, isuda ti pudno a mangipatpateg iti pagilianda.”

Grupo a Panangiparang

“Nadibinuan a Bilin, Maysa a Konstitusional a Kalintegan,” isu ti paulo ti grupo a panangiparang ti dua pay nga estudiante iti maikawalo a grado, da Robert Young ken ni Stacey Wright, taga Virginia, agpadada a Saksi ni Jehova. Inladawan ni Robert ti maysa a reporter ti diario a mangin-interbiu ken Lillian Gobitas, nga inladawan ni Stacey.

Ni Robert ken Stacey, iti panangiwanwan ti dadakkelda, nagdaliasatda iti nasurok a 4,000 kilometro a mangsapsapul iti impormasion para iti proyektoda. Karaman kadagiti nakalapda a kinapudno, impalgak ti panagsirarakda a ti panagsaludo iti bandera idiay Estados Unidos ket namunganay idi maika-19 a siglo. Ket nasdaawda a nakatakuat a sinupiat ni George Washington ti panagsapata iti kinasungdo iti pagilian.

Ad-adda nga inapresiar dagitoy nga agtutubo dagiti sasao ni Propesor C. S. Braden, isu a nagkuna iti librona a These Also Believe, maipapan kadagiti Saksi ni Jehova: “Nangibanagda iti pagilasinan a serbisio iti demokrasia babaen ti pannakidangadangda tapno maitalimeng dagiti sibil a kalinteganda, ta iti pannakidangadangda adut’ nagappuananda tapno magun-odan dagidiay a kalintegan maipaay iti tunggal minoridad a grupo idiay America.”

[Footnote]