Ti Biag ken Ministerio ni Jesus

Panagsagana a Sumango iti Pannakaidadanes

KALPASAN panangisurona kadagiti apostolna kadagiti metodo a panangaramid iti panangasabada, pinakdaaran ni Jesus ida maipapan kadagiti bumusbusor. Kunana: “Adtoy! Siak ibaonkayo a kasla karnero iti tengnga dagiti lobo . . . Agalluadkayo kadagiti tattao; ta iyawatdakayto kadagiti pangukoman, ken kadagiti sinagogada saplitendakayto. Ket maisaklangkayto pay kadagiti agturay ken ar-ari a maipuon kaniak.”

Agpapan pay iti nakaro a pannakaidadanes a maipasango kadagiti paspasurotna, impasigurado dagiti karkari ni Jesus: “Ngem inton iyawatdakayo, dikay agdanag no kasano ti panagsaoyo wenno ania ti sawenyonto; ta iti dayta met laeng nga oras maitedto kadakayo no aniat’ sawenyonto; ta saan a dakayo ti agsao no saan ket a ti espiritu ni Amayo ti agsao a mangaramat kadakayo.”

“Ket,” intuloy ni Jesus, “ti kabsat a lalaki iyawatnanto ni kabsatna a lalaki ken patay, ket ti ama iti anakna, ket dagiti annak tumakderdanto a bumusor kadagiti dadakkelda ket papapataydanto ida.” Innayonna pay: “Ket kaguradakayto dagiti amin a tao gapu iti naganko; ngem ti makaitured agingga iti panungpalan isu ti maisalakanto.”

Ti panangasaba ket dakkel ti pategna, gapuna impaganetget ni Jesus ti pannakasapul ti panagannad tapno agtalinaed a siwayawaya a mangaramid iti trabaho. “Ngem inton idadanesdakayo iti maysa a siudad, pumanawkayo a mapan iti sabali,” kunana, “ta pudno kunak kadakayo, Dikayto pay la napagna dagiti siudad ti Israel dimtengton ti Anak ti tao.”

Pudno nga inted ni Jesus daytoy nga instruksion, pakdaar, ken pammaregta kadagiti 12 nga apostolna, ngem daytat’ nairanta met nga agpaay kadagidiay makiraman iti sangalubongan a panangaskasaba kalpasan iti ipapatay ken panagungarna. Daytoy ti impakita ti kinapudno a kinunana a dagiti ad-adalanna ket ‘guraento amin dagiti tattao,’ saan laeng a dagiti Israelitas a nakaibaonan dagiti apostol a pangasabaan. Mainayon pay, kaawatan a dagiti apostol ket saanda a naisango kadagiti gobernador ken ar-ari idi imbaon ida ni Jesus iti ababa laeng a panangaskasabada. Ken kasta met, dagiti manamati ket saanda a naiyawat ken patay babaen kadagiti miembro ti pamiliada.

Gapuna nga idi kunana a dagiti adalanna saandanto pay la a napagna dagiti pagnaenda a pangasabaan “dimtengton ti Anak ti tao,” naimpadtuan nga ibagbaga ni Jesus kadatayo a dagiti adalanna didanto pay la a napagna a naan-anay ti sirkito ti intero a napagnaedan a daga iti panangaskasaba maipapan iti naipasdeken a Pagarian ti Dios sakbay a dumtengton ti naipadayag nga Ari a Jesu-Kristo kas ti manangikisap ni Jehova inton Armagedon.

Iti panangitultuloyna iti instruksionna iti panangasaba, kuna ni Jesus: “Ti adalan saan a natantan-ok ngem iti mannursuro kenkuana, ken saan met a natantan-ok ti tagabo ngem ni apona.” Gapuna rebbeng a namnamaen dagiti pasurot ni Jesus nga umawat iti isu met laeng a dakes a pannakatrato kas kenkuana gapu iti panangikaskasaba ti Pagarian ti Dios. Kaskasdi isu ti namagbaga: “Ket saanyo a pagbutngan dagiti mamapatay iti bagi ngem ti kararua dida mabalin a papatayen; ngem pagbutnganyo ketdi daydiay makabalin a mangpukaw iti kararua ken iti bagi idiay Gehenna.”

Nangipakita ti ulidan ni Jesus iti daytoy a banag. Awanan buteng nga inibturanna ti ipapatay imbes nga inkompromisona ti kinasungdona iti Daydiay addaan iti isuamin a pannakabalin, ni Jehova a Dios. Wen, ni Jehova saan laeng a makapapatay iti “kararua” (kayatna a sawen iti daytoy a kanito isut’ masakbayan ti maysa kas sibibiag a kararua) ti maysa no di ket mabalinnanto pay a pagungaren ti maysa a tao a mangtagiragsak ti biag nga agnanayon. Anian a managayat, nadungngo a nainlangitan nga Ama ni Jehova!

Sumaganad pinaregta ni Jesus dagiti adalanna iti maysa a pangngarig a nangitampok iti kinamanagayat ni Jehova kadakuada. “Saan aya a malako ti dua a billit tuleng iti maysa a sentabo?” insaludsodna. “Ket uray maysa kadakuada ti saan a matnag iti daga no saan nga ipalubos ni Amayo. Ket uray dagiti buokyo nabilangda amin. Gapuna dikay agbuteng: ta napatpategkayo ngem kadagiti adu a billit tuleng.”

Ti mensahe ti Pagarian nga imbilin ni Jesus nga iwaragawag dagiti adalanna ket isunto ti mamagbingaybingay kadagiti sangakabbalayan, ta dadduma a kamkameng ti pamilia awatenda dayta ket dadduma laksidenda dayta. “Dikayo pagarupen nga immayak a mangiyeg ti talna iti rabaw ti daga,” inlawlawagna. “Immayak saan a mangted ti talna, no di ket ti kampilan.” Gapuna, iti kameng ti pamilia a mangabrasa iti kinapudno ti Biblia sapulenna ti kinamaingel. “Ti agayat ti ama wenno ina a nangnangruna ngem siak,” kuna ni Jesus, “ken ti agayat iti anak a lalaki wenno babai a nangnangruna ngem siak ket saan a maikari kaniak.”

Iti panamagpatinggana iti bilbilinna, inlawlawag ni Jesus a dagiti umawat kadagiti adalanna ti nangawat met kenkuana. “Ket uray siasino a mangpainumto iti maysa kadagiti babassit nga ub-ubbing iti sangabaso laeng a danum a nalamiis iti nagan ti maysa nga adalan, pudno kunak kadakayo, a dinanto mapukaw ti gunggonana.” Mateo 10:16-42.

◆ Ania dagiti pakdaar nga impaay ni Jesus kadagiti adalanna?

◆ Ania a pammaregta ken liwliwa ti intedna kadakuada?

◆ Apay a dagiti bilbilin ni Jesus agaplikar met kadagiti moderno-aldaw a Kristiano?

◆ Iti ania a pamay-an a ti adalan ni Jesus saan a natantan-ok ngem ti mannursurona?