Dagiti Saludsod Manipud Kadagiti Managbasa

◼ Idiay Mateo 10:21, mamakpakdaar aya ni Jesus nga adu a kakabsat iti kongregasion bumusordanto kadagiti naespirituan a kakabsatda?

Saan, saan nga isu dayta ti punto ti pakdaar ni Jesus, a mabasa: “Mainayon pay, ti kabsat a lalaki iyawatnanto ni kabsatna a lalaki ken patay, ket ti ama iti anakna, ket dagiti annak tumakderdanto a bumusor kadagiti dadakkelda ket papapataydanto ida.”​—Mateo 10:21.

Ipakita ti konteksto nga imbaga ni Jesus daytoy kadagiti 12 nga apostolna idi nga imbaonna ida iti panangaskasaba a biahe idiay Israel. Adu kadagiti imbagana ti addaan kangrunaan a kaipapanan agpaay kadagiti apostol. Kas pangarigan, kinunana a maikkandanto ti pannakabalin a mangaramid ti namilagruan a panangagas, panangparuar kadagiti sairo, ken uray pay panangpagungar. (Mateo 10:1, 8; 11:1) Ti historia paneknekanna a saan nga amin a Kristiano immawatda ti kakasta a namilagruan a pannakabalin, a mangpaspasingked a kasarsarita ditoy ni Jesus ti maymaysa laeng a grupo dagiti agdengdengngeg​—dagiti apostolna.

Kaskasdi, dadduma kadagiti imbaga ni Jesus pudno a nagsaknapda manipud panangaskasaba a biahe dagiti apostol. Imbagana kadakuada: “Agaluadkayo kadagiti tattao; . . . Maisaklangkayto kadagiti agturay ken ar-ari maipuon kaniak, kas pangpaneknek kadakuada ken kadagiti nasnasion.” (Mateo 10:17, 18) Iti dayta a biahe, sinango dagiti 12 ti ibubusor, ngem awan pammaneknek a naipanda “iti saklang dagiti agturay ken ar-ari” a pangpaneknek “kadagiti nasnasion.”a Kadagiti naud-udi a tawen, nagparang dagiti apostol iti saklang dagiti agturay, kas kada Ari Herodes Agrippa I ken II, Sergio Paulo, Gallio, ken uray pay ni Emperador Nero. (Aramid 12:1, 2; 13:6, 7; 18:12; 25:8-12, 21; 26:1-3) Gapuna adda naud-udi a sumagmamano pannakaiyaplikar dagiti sasao ni Jesus.

Naitultuloy ti balakad ni Jesus iti pakdaar: “Ti kabsat a lalaki iyawatnanto ni kabsatna a lalaki ken patay.” Dina tuktukoyen dagiti naespirituan nga agkakabsat kasta met a dina tuktukoyen dagiti naespirituan nga amma wenno annak kadagiti sumaruno a sasaona iti Mt 10 bersikulo 21: “Ti ama [iyawatnanto] ti anakna, ket dagiti annak tumakderdanto a bumusor kadagiti dadakkelda ket papapataydanto ida.” Kayat a sawen ni Jesus a dagiti apostol inanamaenda ti kinaranggas wenno ibubusor uray pay manipud kadagiti kakabagian.​—Mateo 10:35, 36.

Kasapulan dagiti apostol ti panagibtur iti dayta a panangaskasaba a biahe. Intuloy ni Jesus: “Kaguradakayto dagiti amin a tao gapu iti naganko; ngem ti makapagibtur agingga iti panungpalan isunto ti maisalakan.”​—Mateo 10:22.

Dadduma kadagiti imbaga ni Jesus iti dayta nga okasion ket addaan kaipapanan kadatayo kas Saksi ni Jehova itatta. Ti ipagpaganetget ti panangaskasabatayo isut’ Pagarian. Aramidentayo ti ministeriotayo nga awan baybayadna ket sapulen dagiti tattao nga interesado iti mensahe wenno dagiti maikari iti dayta. Mayanatup ti panagannad. Dagiti bumusbusor addada iti aglawlaw. No dadduma dagiti kakabagian, kaarruba, wenno katrabahuan pataudenda dagiti nakaro a problema, kangrunaanna kadagidiay napasnek a tattao a mangrugrugin a mangsurot ti kurso ti pudno a Kinakristiano. Inulit ni Jesus ti pakdaar maipapan ti kasta nga ibubusor idi inladawanna “ti pagilasinan” ti kaaddana. (Mateo 24:3, 9, 10; Lucas 21:16, 17) Inulitna met nga imbaga a kasapulantayo ti ‘agibtur agingga iti panungpalan tapno maisalakantayo.’ Wen, kasapulantayo ti agibtur agingga iti panungpalan ti agdama a biag wenno agingga nga agpatingga daytoy sistema dagiti bambanag ket mabalintay ti sumrek iti baro a lubong.​—Mateo 24:13.

[Footnote]