Report dagiti Manangiwaragawag ti Pagarian
Idiay New Zealand—Maysa nga Aldaw a Laglagipen
“NARAGSAKANKAMI a naan-anay iti pannakikadua kadakayo. Dikamto pulos maliplipatan dayta!”
“Iti amin a nateokratikuan a pannakitimtimpuyogko, diak pay pulos nakapadas iti aniaman a kas iti daytoy.”
“Kasla tagtagiragsakentayon ti maysa nga aldaw idiay baro a sistema dagiti bambanag.”
Dagitoy ti sumagmamano kadagiti komento dagiti delegado iti programa a pannakaidedikar iti pagtaengan ti sanga ti Watch Tower Bible and Tract Society idiay New Zealand, Nobiembre 29, 1986. Apay a natignay unay dagitoy a tattao? Agsipud ta daytat’ pudpudno a nakallalagip nga aldaw. Palubosandakami a mangiranud kadakayo ti dadduma kadagiti rason no apay.
Umuna, ti nagpintasan a pasdek a naidedikar ti namagbalin a nakallalagip ti aldaw. Ni John E. Barr, kameng ti Bagi a Manarawidwid dagiti Saksi ni Jehova, ti nangiladawan ti kaibangbangon a Kingdom Hall ken ti kasilpona a pasdek ti sanga kas “nakapimpintas, elegante, makaay-ayo . . . Ti nalpasen a trabaho isarsarmingna ti naannad nga atension aginggat’ kabassitan a detalye, iti kinapintas. Kasla amin ti agkakabagay.”
Ti Nakristianuan a Panagkakabsat
Sa, nakallalagip ti pannakakita kadagiti adu a nababayagen iti serbisio, dagiti Saksi nga agserserbin ken Jehova a simamatalek iti nakaad-adu a tawtawen. Kinapudnona, dagitoy ti mangbukel ti kaaduan kadagiti 658 a naaw-awis a bisita. No makisinnarakda kadagiti datin a gagayyem, nga adu kadakuada ti saanda a nakitkita iti pinulpullo a tawtawen, kasla ken Pablo ti panagriknada, idi a, kalpasan iti nawatiwat a panagdaliasat, nasarakanna dagiti kakabsat a taga Roma: “Ket idi makita ni Pablo [dagiti kakabsatna], nagyaman iti Dios ket napabileg unay.” (Aramid 28:15) Tapno maimatangan dagita nga ulidan iti naandor a kinasungdo ken kinamatalek—dadduma nga adda agpapan pay nakapuy a salun-at—ket gubuayan iti pammaregta ken panagyaman.
Ti aldaw ti nakallalagip met, gapu iti napasaran a nabara nga internasional a panagkakabsat. Dagiti Saksi ni Jehova ket naitiponda iti sangalubongan a panagkakabsat, ket daytoy ti napaneknekan dagiti sangaili a naggapu iti nakaad-adayu kas iti Australia, ti Estados Unidos, Canada, Britania, ken Taiwan, agraman dagiti naggapu idiay Papua New Guinea, Samoa, ken dadduma pay a purpuro iti South Pacific. Nagsangpet dagiti telegrama manipud adu a saanda a mabalin iti personal nga umay, agraman kablaaw manipud iti Bagi a Manarawidwid, dagiti kamkameng ti pamilia ti Brooklyn Bethel, ken ti maika-82 a klase ti eskuelaan dagiti misionero idiay Gilead. Pudno unay, makapabileg iti pammati a maammuan iti interes dagiti adu a kakabsat iti adu a dagdaga iti pannakaidedikar ti pasdek ti sanga idiay New Zealand.
Dagiti Pundasion Insaad dagiti Matalek a Saksi
Ti mapalagipan ti naunday a historia iti trabaho a panangaskasaba idiay New Zealand a nangiturong iti pannakaibangon dagitoy kaudian a pasdek ti sanga ti makaparagsak ken mamagbalin met a nakallalagip ti aldaw. (Idiligyo ti Hebreo 10:32.) Kas kinuna ti maysa a nagpalawag: “Kas ti kapateg dagiti pisikal a pundasion iti nagpintas a baro a sangal ti Bethel, ad-adda pay a napatpateg dagidiay piguratibo a pundasion nga insaad dagiti nasungdo, managsakripisio a kakabsat a lallaki ken babbai no agsublitayo iti pangrugian daytoy a siglo.”
Daytoy ti sinaruno ti panangsaludsod kadagiti 11 a matalek a lallaki ken babbai a naaddaanen ti dagup a 680 a tawtawen iti dedikado a serbisio. Sinalaysayda ti maysa kadagiti damdamo a kumbension idiay New Zealand, idi 1913. Malaglagipda pay dagiti rigat ti panagpayunir idiay South Island idi 1930’s, dagiti rigrigat kadagiti tawtawen ti Gubat Sangalubongan II idi naiparit ti organisasion, ti pannakabukel ti sanga ti New Zealand idi 1947, ti idadateng dagiti immuna misionero ti Gilead, ken ti pannakaibangon ti damdamo a Kingdom Hall iti pagilian idi 1950. Ti agpapareho a rikna dagidiay napagsaludsodan ket: “Anian ti panagyamyamanmi nga addakami ditoy ken makita dagiti pammaneknek iti irarang-ay nga, idi immuna nga al-aldaw, dikam pulos natagtagainep nga agbalin a kasta!”
Ti Bendision ni Jehova
Nalabit ti kangrunaan a banag a namagbalin a di maliplipatan dayta nga aldaw isu ti pannakaammo a ti bendision ni Jehova ti nangiwanwan iti trabaho a panagbangon ken daytat’ namagbunga iti dayta. Maiyanatup unay, maysa a seksion ti programa ti aldaw ket napauluan ti: “Ti Naimbag nga Ima ti Diostayo nga Adda Kadatayo.”—Nehemias 2:8.
Nakita ti naimbag nga ima ni Jehova iti kinamanangtulong ken kooperasion dagiti lokal a negosiante ken agtuturay, agraman dagiti Nakristianuan a kualidad nga imparangarang dagiti trabahador mismo iti pagbangonan. Maysa a negosiante, a nangbisita iti pagibangbangonan, ti nagkuna: “Diak pay pulos nakapadpadas iti sadinoman a lugar ti rikna ti kinatalna ken ti kinatalinaay a napadasak ditoy.”
Nakita ti bendision ni Jehova iti kinamanagparabur dagiti ordinario a Saksi iti intero a pagilian a nangsuportar a pinansial iti proyekto. Dayta met iti napaliiw iti kinatulok dagidiay nangitulnog ti bagbagida a mangaramid ti aktual a trabaho. Iti isuamin, 1,237 ti nangipatulod kadagiti aplikasion a nangiboluntario ti serbisioda, dadduma ti nagdaliasatda idiay pagbangonan manipud kadagitoy adayu a dagdaga nga iti bukodda pay a gastos tapno mangbusbos iti sumagmamano a lawas wenno bulan a tumulong iti panagbangon. Kuna ti maysa a kabsat a lalaki: “Ti itutulong iti pagbangonan ket isut’ nagbalbaliwan ti biagko.”
Kas kinuna ni Kabsat Barr iti palawagna iti dedikasion, ti baro a pasdek ti sanga ti rebbeng a mamatmatan kas “maysa a makinruar, makitkita nga ebidensia a ti Mesianiko a Pagarian ti Dios ket adda a naipasdeken.” Wen, daytat’ pudpudno a nakallalagip nga aldaw para iti New Zealand. Iti panagpatinggana, adda iti naimpusuan nga isusungbat iti biang amin dagiti timmabuno iti resolusion a mangikarkari “ti naan-anay a panangsuportarda iti organisasion ni Jehova kas ireprepresentar ti sangatayo.”