Ti Kinaimnas Mabalin a Pammarang Laeng
NI Eva, ti immuna ken kakaisuna a babai a pinarsua ti Dios, ti mabalin isut’ kaiimnasan pay laeng a babai a nagbiag. Ngem isu ken ni Adan a lakayna, immalsada ken ni Jehova. Gapuna napukaw ni Eva ti nasinged a pannakirelasionna iti Dios ket nakiraman a nangyeg ti nakabutbuteng a didigra iti natauan a rasa. Kalpasanna, kaskasdi awan duadua nga isut’ napintas pay, ngem ti kinaimnasna ket pammarang laengen.
Iti kamaudiananna ti kinaimnas isut’ sagut ti Dios, ken dadduma dakdakkel tinawidda iti dayta ngem kadagiti dadduma. Dadduma tartarigagayanda a naim-imnasda pay koma—wenno naguguapoda pay—ngem ti langada itatta, ket adut’ mangbusbusbos ti adu a tiempo ken kuarta a manggunggundaway manipud aniaman a kinaimnas nga ik-ikutanda. Ngem kas ipakita ti pangarigan ni Eva, ti kinaimnas laeng ket awan mamaayna iti kamaudianan malaksid no daytat’ napakuyogan kadagiti dadduma a kualidad. Ania a dadduma a kualidad? Ti maysa a kapadasan idi kaaldawan ni Ari Salomon ti makatulong kadatayo a mangsungbat iti dayta.
Banag a Dakdakkel Pay Ngem Kinaimnas
Ti libro ti Biblia a Canta ni Salomon saritaenna kadatayo maipapan ti maysa a naimnas a balasang iti away, maysa a Sulamita, nga agayat unay iti maysa a lokal a baro a pumapastor. Ti kinaimnasna ti nangatrakar iti atension ti ari, ket isut’ impaiyegna idiay Jerusalem a manginanama nga isut’ agbalinto nga asawana. Anian a gundaway para iti maysa nga agtutubo a babai! Sadiay, mabalinnanto a gundawayan ti kinapintasna ket manggun-od ti maysa a posision ti kinabaknang, pannakabalin, ken impluensia iti pagarian. Ngem ti balasang ti sitatangken a nangtungday kadagiti makapasablog a panagabante ti ari. Tinallikudan ti balasang ti kinaraniag ken kinabaknang ti Jerusalem ket nagtalinaed a matalek iti nobiona a pastor. Iti kasona, ti kinaimnas ket ad-adda pay ngem pammarang laeng. Isut’ saan a narabaw, mananggundaway, wenno naagum. Imbes ketdi, isut’ addaan makin-uneg a kinaimnas nga agkurang ken Eva nga inapona.—Canta ni Salomon 1:15; 4:1; 8:4, 6, 10.
Dagiti Silo ti Pisikal a Kinaimnas
Ti pisikal a kinaimnas, nupay matarigagayan unay, ket mabalin a mangiturong kadagiti problema a pulos saan a patpatauden ti makin-uneg a kinaimnas. Ngangngani 4,000 a tawen ti napalabasen, kas pangarigan, ni patriarka a Jacob ket addaan ti anak a babai nga agnagan Dina nga awan duadua nakapimpintas. Idi saan a nainsiriban a binusbosna ti panawenna a nakilangenlangen “kadagiti annak a babbai ti daga,” maysa a baro nga agnagan Siquem ti naatrakar unay kenkuana nga isut’ rinamesna.—Genesis 34:1, 2.
Mainayon pay, dagiti pammarang a langlanga, no saan a kinaduaan ti makin-uneg a kinaimnas, ti mangpadakkel ti panangmatmat ti maysa iti bukodna a kinapateg. Naaddaan ni Ari David ti maysa nga anak a lalaki nga agnagan Absalom, nga intay pakabasaan: “Ngem iti isuamin nga Israel awan idi ti madaydayaw unay a kas ken Absalom a gapu iti kinataerna.” (2 Samuel 14:25) Ngem ti pisikal a kinataer ni Absalom ti nangilemmeng ti makin-uneg a kinalaad: Isut’ ubbaw, nagaramugam, ken narungsot. Silalaing nga inusar ti agtutubo ti personal a kinataerna tapno adut’ mapasurotna iti Israel ken kalpasanna nakikumplot a maibusor ken amana nga ari. Idi agangay isut’ napapatay ngem saan a sakbay ti panangitapuak daytoy guapo unay a lalaki ti pagarian iti guerra sibil.
Ti Kinaguapo
Kas ipakita ti kaso ni Absalom, sawen ti Biblia dagiti lallaki agraman babbai kas napipintas. Maysa a pangarigan ti lalaki a di nasilo gaput’ kinaguapona isu ni Jose, ti ub-ubing a kabsat ni Dina iti ama. (Genesis 30:20-24) Idi isut’ maysa pay nga agtutubo, gaput’ imunda dagiti kakabsat ni Jose ti nangilako kenkuana kas maysa nga adipen tapno maipanen idiay Egipto. Sadiay, isut’ ginatang ti maysa nga opisial ti militar nga agnagan Potifar, ket gaput’ kinasingpetna ken kinagagetna, isut’ nagbalin a manangaywan iti sangakabbalayan ni Potifar. Kabayatanna, “ni Jose nagbalin a nangayed a lalaki ken nakaay-ayo a makita.”—Genesis 39:6.
Nakapataud ti asawa ni Potifar ti napigsa a panaggusto ken Jose ket awan babainna a pinadpadasna a gargarien ni Jose. Ngem ti agtutubo a lalaki impakitana nga isut’ addaan makin-uneg a kinaimnas agraman pisikal a kinapintas. Dina kayat ti agbasol a maibusor ken apona, a Potifar, ket intarayanna ti babai. Kas nagbanaganna, naipisok iti pagbaludan. Apay? Ti napaay nga asawa ni Potifar ti siuulbod a nangakusar kenkuana a mangpadpadas a mangrames kenkuana! Nupay kasta, uray daytoy napait a kapadasan ti di nangpadakes iti kapanunotan ni Jose, ket ti nagsayaat nga ulidanna iti sidong ti nakaro unay a kasasaad ti nangparegta kadagiti nasingpet-panagpuspusona a tattao nanipud idin.
Kas ipakita dagitoy a pangarigan, ti makin-uneg a kinaimnas—ti kinaimnas ti personalidad nangnangruna no daytat’ naibatay iti pammati iti Dios—adayo a napatpateg ngem kadagiti pisikal a langlanga. Dagiti agtutubo nga agngayngayangay a mangasawa ti kasapulan a silalagip koma iti daytoy. Dagiti agpatrabaho nga agsapsapul kadagiti trabahador masapul a laglagipenda dayta. Ken amintayo ti masapul a mangpanunot a nabendisionantay man ti pisikal a kinaimnas wenno saan, mabalintay a mapatanor daytoy adayo a napatpateg a makin-uneg a kinaimnas. Ngem aniat’ mangbukel iti daytoy? Ken kasanotay a patanoren dayta? Salaysayentay daytoy iti sumaganad nga artikulo.