Maysa a Resolusion

Dagiti timmabuno iti “Nadiosan a Kinahustisia” a kumbension awan duadua a linab-awanna ti napalabas a tawen, idi 6,443,597 ti nagtitipon iti 1,098 a luglugar iti sangalubongan, a 93,882 ti nabautisaran. Ti palawag a, “Ti Mangibabain a ‘Balangkantis’” a naited kadagiti amin a “Nadiosan a Kinahustisia” a Kumbension, ket sinaruno ti maysa a nairuar a libro, iti nasurok a 20 a pagsasao, a nagpintas ti pannakailadawanna a 320-panid a libro nga Apocalipsis​—Ti Grande a Tampokna Asidegen! Imbaga ti nagpalawag kadagiti managdengngegna: “Usarenyo a naimbag daytoy a libro iti personal ken iti pangkongregasion a panagadalyo. Usarenyo, met, dayta iti panangiyanunsioyo iti lubong a ti Babilonia a Dakkel ket naikeddengen a madadael, a dagiti nasnasion ket sangsanguendan ti Armagedon, ket ti grande a tampokna magtenganto iti natan-ok a panangituray ti Pagarian ni Jehova babaen ken ni Kristo ken ti nobiana. Maragsakankayonto a makangngeg ken makapaliiw kadagitoy a bambanag, ‘ta ti naituding a tiempo asidegen’!”​—Apocalipsis 1:3.

Dakami, a nanipud 1914 agbibiagkamin “iti aldaw ti Apo” ket iti daytoy a panawen ti nadiosan a panangukom, agragsakkami iti katan-okan kadagiti amin a pribilehio, a dayta isut’ panagserbi iti Soberano nga Apo Jehova iti sidong ti Ari dagiti ar-ari, a ni Jesu-Kristo. (Apocalipsis 1:10) Kas SAKSI NI JEHOVA, pasingkedanmi a:

(1) GURAENMI ti panangibabain ti Babilonia a Dakkel, ket nangnangruna ti Kakristianuan, iti nagan dayta maymaysa a pudno ken sibibiag a Dios, a ni Jehova. Iti biangmi, PASINGKEDANMI iti amin a pusomi, sigun kadagiti sao iti Apocalipsis 4:11: “Maikarika, Jehova, sika a Diosmi, nga umawat iti dayag ken iti dayaw ken iti pannakabalin.”

(2) GURAENMI ti panangtaginayon ti Kakristianuan kadagiti sursuro a Nababiloniaan, nangnangruna maipapan iti nagkatlo a dios, ti di ipapatay ti natauan a kararua, agnanayon a pannakatutuok idiay impierno, umap-apuy a purgatorio, ken panagrukbab kadagiti ladawan​—kas iti Madonna ken iti krus. Maitunos iti Apocalipsis 22:18, 19, SITITIBKER NGA ANNUROTENMI ti naisurat a Sao ti Dios ken amin a linaon dayta.

(3) GURAENMI dagiti amin a maikontra iti Dios a pilosopia ken aramid, a gagangay iti uneg ti Kakristianuan, kas ti ebolusion, panangiyalison iti dara, aborsion, panagulbod, kinaagum, ken kinakusit. Bayat nga agdaydayawkami ken agbibiagkami, IDAYDAYAWMINTO ti Namarsua kadakami, a ni Jehova a Dios, ti Mannakabalin-amin, a dagiti dalanna nadeskribirda idiay Apocalipsis 15:3 kas “nalinteg ken napudno.”

(4) GURAENMI ti di panangipangpangag ti Kakristianuan kadagiti mensahe ni Jesus iti pito a kongregasion idiay Apocalipsis kapitulo 2 ken 3 a maipapan iti sektarianismo, idolatria, pannakiabig, ti impluensia ni Jezebel, kinabaaw, ken di panagsalukag. No iti biangmi, DENGGENMINTO KEN TUNGPALENMI ti “kuna ti espiritu kadagiti kongregasion.”

(5) GURAENMI ti imoralidad ken kinalulok ti Kakristianuan ken kadagiti klerona, ket abrasaenmi ti nabatad a pangngeddeng ni Jehova a nailanad iti Apocalipsis 21:8 a dagidiay agtultuloy iti kinarugitda​—mannakiabig, managulbod, ken umarngi dita​—madadaeldanto a naan-anay. NAIMPUSUAN A SUPORTARANMI dagiti estandarte ti Biblia no iti sekso, panagasawa, ken biag ti pamilia.

(6) GURAENMI ti sinigsiglon ti kabayagna a naespirituan a panagbalangkantis dagiti klero ti Babilonia a Dakkel gaput’ pannakikomplotda kadagiti agtuturay toy lubong tapno maragpatda ti pannakabalin, kinabaknang, ken mangirurumen a panangdominar kadagiti komon a tao. IKARIMI a tulonganmi dagidiay nasingpet panagpuspusoda tapno tungpalenda ti awis ti anghel idiay Apocalipsis 18:4: “Rummuarkayo kenkuana, ilik.”

(7) GURAENMI ti nawadwad a dara a sungsungbatanda a nagresulta iti nasurok a 100 a milion a biag a naisakripisio iti gubat iti daytoy la a siglo, a maigapu nga ad-adda iti pannakiabig ti dakkel a balangkantis kadagiti napolitikaan nga agtuturay. AGRAGSAKKAMI ta asidegen ti naituding a tiempo nga iwayat ti Dios ti nalinteg a panangukomna iti Babilonia a Dakkel, kas sibabatad a naibaga idiay Apocalipsis 18:21-24.

Bilang Saksi ni Jehova, IBILANGMI A RAG-O KEN PRIBILEHIO nga iyanunsio iti lubong nga idi 1914 “ti pagarian ti lubong nagbalin a pagarian ti Apotayo [a ni Jehova] ken iti Kristona.” (Apocalipsis 11:15) IKARIMI nga itultuloymi a situtured nga ipakaammo dagiti panangukom ni Jehova iti Babilonia a Dakkel ken iti panangipakdaar iti yaayen ti Armagedon a gubat ti Dios. DETERMINADOKAMI a mangikallangugan, a sipipigsa ken “iti tunggal nasion ken tribo ken dila ken ili,” ti naimbag a damag nga adtoyen ti “maysa a baro a langit ken maysa a baro a daga” a mangbendision iti sangatauan. (Apocalipsis 14:6; 21:1) AGRAGSAKKAMI ta kas resulta daytoy a proklamasion, maysa a dakkel nga umariwekwek a nasurok a tallo a milion manipud kadagiti amin a nasion adda itan a naikaykaysa kadakami iti intero a lubong. Kaduami ti anghel nga agtaytayab iti nagtangatangan, dakam amin ideklarami: “Agbutengkay iti Dios ket itedyo kenkuana ti dayag, agspiud ta dimtengen ti oras a panangukomna, gapuna agdaydayawkayo iti Daydiay nangaramid iti langit ken iti daga ken baybay ken kadagiti ubbog dagiti danum.”​—Apocalipsis 14:7.

[Salsaludsod]

1. Iti ania nga agragsak itan dagiti Saksi ni Jehova?

2. Iti tunggal maysa kadagiti pito a punto iti Resolusion, ibagayo no (a) ania ti kagura dagiti Saksi ni Jehova ken no (b) ania a positibo a pammatalged ti inaramid dagiti Saksi.

3. (a) Ania a rag-o ken pribilehio ti adda kadagiti Saksi ni Jehova (b) Ania ti determinasion dagiti Saksi (c) Ania met ti determinado nga aramidentayo? (d) Iti ania a panagrag-o ken deklarasion ti pakiramanan dagiti Saksi ni Jehova?