Report dagiti Manangiwaragawag ti Pagarian
“Ti Kinapudno Luk-atannakayto”—Ken Mangyeg Ragsak
IDIAY Britania, ti kinapudno ti Biblia ti nangluk-aten iti nasurok a 113,000 a tattao idiay Britania, ken adu pay ti mangab-abrasa ti kinapudno iti inaldaw. Pudno a matungtungpalen dagiti sasao ni Jesus: “Ket maammuanyonto ti kinapudno, ket ti kinapudno luk-atannakayto.” (Juan 8:32) Daytoy a wayawaya agbunga iti ragsak, kas ipakita ti sumaganad a kapadasan manipud Britania.
◻ Bayat nga adda iti ministerio a panagbalaybalay ni Penny, insalaysay ti sanga nga opisina, maysa a baket ti medio bigla a nagkuna kenkuana, “Okupadoak.” Kuna ni Penny nga isut’ sumarungkarto manen. Sumagmamano nga aldaw kalpasanna, iti oras a dati saanna a panagsarsarungkar, isut’ mapmapan kadagidiay awan idi kadagiti pagtaenganda ket di inggagara nakapan iti daydiay met laeng a balay. Ti baket linukatanna ti ruangan ket pinastrekna ni Penny. “Ammok nga agsublikanto met laeng,” kuna ti baket, “ket nabayagak nga agur-urayen.” Nagsarsaritaanda ti namnama maipapan iti Pagarian, ket kuna ti baket manginanama a pumudno koma dayta. Isut’ 79 añosnan, ket ni lakayna ti natayen tallo a tawen sakbayna. Awan liwliwa nga inawat ti baket manipud simbaanda ket awan makitanan a rason iti panagbiagna. Kayatnan ti matay. Iti kamaudianan, kalpasan panangirugi ni Penny ti panagadal ti Biblia kenkuana, imbagana ken ni Penny a pampanunotennan ti agbekkel ngem ammona a daytat’ di umiso. Isut’ nagkararag iti Dios a mangted komat’ liwliwa kenkuana ken tulonganna a makagun-od manen ti namnama. Nagin-inut, bayat panagad-adalna, ti sennaayna nagbalinen a namnama, nga addaan nauneg a pammati ken panagyaman ken Jehova. Ginupednan ti kas kapaut ti biag a koneksionna iti simbaan, nabautisaran iti agtawenen ti 80, ket itan maysan a regular nga agibumbunannag a dakkel regtana. Pudno unay, ti kinapudno ti Sao ti Dios ti nangluk-at kenkuana ket nangyeg dakkel a ragsak kenkuana.
◻ Ti kinapudno maipapan iti Pagarian ti Dios mangyeg wayawaya manipud panangkayaw ti ulbod a relihion. Mabalin a balbaliwan met dayta ti personalidad ti maysa, ket masansan daytoy a panagbalbaliw ti mamagsiddaaw kadagiti dadduma ken tulonganna ida a makakita iti kinapudno, kas ipakita ti sumaganad a kapadasan.
Maysa nga agtutubo a babai ti timmuktok iti ruangan ti pagtaengan ti maysa a Saksi ket nagkalikagum iti panagadal ti Biblia. Aniat’ namagbalin iti daytoy? Ti nagannak ti babai ket makipagad-adal ti Biblia kadagiti Saksi ni Jehova, ket ti epektona kadagiti nagannakna—nangnangruna ken amana—ket dramatiko unay ken nakaskasdaaw a ti anak a babai ti nakellaat a talaga. Ti amana, nga agsigsigarilio ti 80 a sigarilio kada aldaw, inidianna nga interamente iti panagsigsigarilio idi nailawlawag kenkuana a di anamongan ni Jehova dayta. Ngangngani giddato kalpasan dayta nga isut’ nangisubli iti pagtartrabahuanna ti intero a stock dagiti tagilako a tinakawna kadakuada iti nawadwad a panawen. Patien ti anakna a babai nga aniaman a nakaapektar kadagiti nagannak kenkuana iti kasta a pamay-an ti maikari a sukimaten. Itan nabautisaranen dagiti dadakkelna, ket ti anak a babai mapmapanen kadagiti amin a panaggigimong.
Ti kinapudno nga inwaragawag ni Jesus nangyeg ragsak kadagidiay nadakamat iti ngato ken kadagiti dadduma pay a di mabilbilangen. Maaramidanna met dayta iti asinoman a mangakseptar ti kinapudno ti Biblia ken mangiyaplikar iti dayta iti panagbiagda.—Salmo 19:7, 8.