Inulik ti Kasasayaatan Amin a Bantay
NAIYANAKAK ken dimmakkelak iti bassit nga ili dagiti bambantay ti Akindaya nga Europa. Dagiti dadakkelko Romano Katolikoda, ngem saandak pinilit a makimisa, ket idiay balay saankami nga agkarkararag a sangsangkamaysa wenno agsasarita maipapan ti relihion. Gapuna, kas ti adu kadagiti sabsabali nga agtutubo, binusbosko ti panawen ken pigsak iti ay-ayam, edukasion, ken panagdaldaliasat.
Iti ilimi, adda nakaak-aktibo a grupo nga umuuli ti bantay nga idadauluan ti maysa a naasi, aduan kapadasan a lalaki nga adut’ ammona maipapan ti bambantay. Pagyamanan kenkuana, nagbalinak a nasigo iti panaguli ti bambantay. Agtawenak idi ti 18, ket insigida a nagayatak kadagiti naranga a buybuya manipud nangangato a tuktok, ti ganas ti pannakaisango ken pannakalasat kadagiti napeggad a kasasaad, ken ti pannakigayyem kadagiti dadduma a naaddaan met kadagita a peggad.
Malaglagipko pay ti maysa nga okasion kalpasan ti pannakikaduak iti grupo iti liman a tawen. Umul-uliak iti maysa a bantay a nalaka a pagnaan ti dagana, ket kimmapuy ti konsentrasionko iti kanito a madandanonkon ti tuktokna. Idi umadaniakon iti tuktok ti maysa a dakkel a bato, daytat’ mangrugi metten a lumukay. Ti la maaramidakon isut’ lumagto nga aglisi ken mangipukkaw iti pakdaar kadagiti kaduak nga umul-uli. Maysa a nagtinnag a bato ginessatna ti lubid a namagsilpo kadakami, ket natnagak. Makaparagsak ta, ti pannakatnagko napasardeng babaen ti bassit a patag a karuotan 4 a metros idiay baba. Nupay kasta, saan a kanayon a nasayaat ti pagtungpalan dagiti bambanag iti daytoy nga ay-ayam!
Idi agtawenak ti 24, nagraduarakon iti unibersidad ket siakon ti nangidaulo ti bassit a grupo dagiti managuli ti bambantay idiay ilimi. Kalpasan ti apagbiit a panawen, nangurnongkami ti kuarta tapno gumatang ti minibus tapno mapaglugananmi ken maikargami ti aruatenmi nga agturong kadagiti ad-adayo pay a bambantay. Ngem ti lugan dakes ti kasasaadna, ket nangbusbosak ti tallo a bulan, aldaw ken rabii, a nangtartarimaan iti dayta. Idi nakasaganan, nagsapulkam amin kadagiti napeggad a trabaho a dakkel masueldona, kas ti panagtrabaho kadagiti nangangato a konstruksion, ket iti daytoy a pamay-an nakaurnongkami ti umdas a kuarta tapno makapan idiay Iran. Sadiay, idi 1974, kinalay-atmi ti 5,800 metros kangatona a bulkan nga agnagan Damavand. Nupay nalaka a nangrugi ti iyuuli, idiay tuktok masapul nga ibturanmi ti adalem a niebe, ababa a panaganges gaput’ altitud, ken nabangsit nga asuk manipud kadagiti ab-abut ti bulkan.
Iti dalan nga agawiden idiay uneg ti minibus, implanomi ti panangulimi ti Bantay Ararat ngem kinanselarmi dayta gapu iti napolitikaan a gulo. Idi 1975 napankami nag-skiing idiay Alps ti Austria, ket maigiddato iti dayta, nangibangonkami ti salip ti retretrato iti intero a pagilian a ninagananmi “Men and Mountains.” Daytoy a salip ket tinawen pay laeng a maar-aramid. Mariknami amin a ti biagmi ket naan-anay ken makapneken.
Pannakapaay
Nupay kasta, idi agtawenakon ti 30, mangrugin a masikoranak iti panagul-uli ti bantay ket nagpampanunotak: ‘Kastoy la ngatan ti adda iti biag?’ Kunat’ dadduma kaniak a mangasawaakon, ngem addada gagayyemko a naasawaanen, ket kasla saanda a naragsak unay. Uray dagiti pagassawaan a ti relasionda ket napanday iti peggad ken ganas ti panaguli ti bambantay ket kasla napukawda ti ragsakda iti kinapudno ti inaldaw-aldaw a panagbiag. Diak ammo no apay a ti panagasawada ket di naragsak, ngem uray no kayatko met ti mangasawa, diak kayat ti agbalin a naliday kas kadakuada.
Mainayon pay, adda nadlawko a panagbalbaliw kadagiti agtutubo a napan nagulit’ bambantay. Iti dati, adda a kanayon ti espiritu ti pannakadisiplina, kooperasion, ken pannakigayyem kadagiti kampo nga Alpino. Itan, dagiti agtutubo ken kurang kapadasanna nga ub-ubbing a lallaki ket saanda a disiplinado ket saanda a kontento a makaaramid ti in-inut a panagrang-ay. Kayatda ti agpasikat ket mangalada kadagiti panaguli a nakarigrigat ken napeggad unay kadakuada. Gapu ta mariknak nga ad-adda ti pannakapaayko, naaddaanak kadagiti naunday, nauneg a diskusion ken Bonjo a gayyemko. Iti kamaudiananna insingasingna a makisaritaak iti padak a managuli ti bantay, a ni Henry.
Pinabulodannak ni Henry ti libro a, Ti Kinapudno a Mangiturong iti Biag nga Awan Inggana, ket apaman a nabasak dayta, nagsiddaawak a makakita no kasanot’ panangisalaysayna ti salsaludsod a nabayagkon a pinampanunot iti pusok. Ta gayam ni Henry ket makipagad-adal ti Biblia kadagiti Saksi ni Jehova, gapuna sinaludsodko no mabalinko ti makiraman. Immanamong, ket iti dua a tawen naigamerak iti nainget a panagadal ti Biblia ken iti aniaman a pagbasaan ti Biblia a maiggamak.
Panagadal ti Biblia
Bayat nga umun-uneg ti pannakaammok, rumangrang-ay met ti marikriknak a rag-o. Narabaw laeng ti pannakaammok iti relihion a Romano Katoliko, ngem masdaawak a makakita a ti Kinakristiano idiay Biblia saan nga agpampannuray kadagiti seremonia, tradision, ken kadagiti di nainkalintegan nga emosion. Imbes ketdi, ramanen dayta dagiti nangato a prinsipio ti moral a mangapektar ti tunggal aspeto ti Nakristianuan a panagbiag. Mainayon pay, nakellaatak a makakita a ti Biblia lohikal unay ket saanna a suppiaten dagiti sientipiko a teoria a sititibker a napaneknekanen.
Ti Saksi a mangidadaulo ti panagadal kaniak ken ni Henry dinakam pinilit a mangbalbaliw ti opinionmi ken wagas ti panagbiagmi. Ti basta ar-aramidenna isut’ panangilawlawag a naimbag no aniat’ kunkunaen ti Biblia. Gapuna, intultuloyko ti panagul-ulik ti bambantay kadagidiay umuna a dua a tawen a panagadal. Ngem bayat nga umun-uneg ti pannakaammok, nabigbigko a para kaniak ti panagul-uli ti bantay ket maysan nga adiksion. Ti aksidente a pannakatnag ti bato ti nangipalagip met kaniak ti sasao ni Jesus ken Satanas idi a ni Satanas ti nangkarit kenkuana nga itinnagna ti bagina manipud tuktok ti templo: “Dikanto ikabil ni Jehova a Diosmo ti pakasuotan.” (Mateo 4:5-7) Nabigbigko a daytoy nga aramid ket panangipakita ti di panagraem iti biag nga inted ni Jehova kaniak.
Gapu itoy inyawatko ngarud ti responsabilidad iti grupomi a managuli ti bambantay iti sabali a sanayen nga umuuli ket nakitak a saanen a narigat ti bumallasiw manipud panaguli ti bambantay nga agturong iti Kinakristiano. Bayat nga impadpadawatko wenno inlaklakok amin nga alikamenko—skis, paguli a lanlandok, carabiners, marmartilio, pagkawit a lansa, ken wasay ti yelo—maikunak a sipupudno, iti sasao ni apostol Pablo, a para kaniak dagita itan ket “adu a rugit.” (Filipos 3:8) Maysa a rikna ti nauneg a pannakapnek ti immapay kaniak idi a nabalinakon ti timmipon iti grande a trabaho a panangidayaw ti nagan ti Dios iti publiko. Idi 1977 siak ken ni Henry insimbolomin ti dedikasionmi ken Jehova babaen iti bautismo ti danum.
Panangaskasaba kadagiti Dadduma
Iti dayta a tiempo, addada agarup 15 a miembro ti grupomi a mananguli ti bantay idiay ilimi, ket in-inut a siak ken ni Henry ti nangaskasaba kadakuada amin. Anian a ragsak idi a ti kabsatko, a maysa met a miembro, agraman ken baketna, nangrugida metten a makipagadal ti Biblia ket nabautisaranda idi 1981. Di nagbayag, timmipon ni Bonjo kadakami, agraman ti maysa pay, ti maikalima iti klab dagiti managuli ti bantay. Saankamin nga agul-uli ti nangangaton a bambantay. Ti kadadakkelan a ragsakmi ket isut’ panangsarungkar kadagiti tattao iti lobong nga addaan panangapresiar iti kinapudno ti Biblia. Daytoy a panagbalbaliw ti inawat met a siraragsak ni nanangko, a kanayon nga agdandanag iti panagul-ulimi ken ni adingko. Idi agangay, ni nanangmi ti timmipon metten kadakami iti nadalus a panagdaydayaw ken Jehova.
Itan ti tarigagayko a mangasawa ket napukawnan ti kinaganatna. Pagyamanan iti Sao ti Dios, ammokon dagiti prinsipio a tumulong kaniak nga agballigi iti panagasawa, ngem ita siraragsakak nga agmaymaysa ken agserserbi ken Jehova nga awan samsamirana. Kunan Salomon: “Ti manakem a babai nga asawa aggapu ken Jehova.” (Proverbio 18:22; 19:14) Gapuna, naikeddengko ti aguray a siaanus ken Jehova a mangited iti daytoy a sagut kaniak, a kabayatanna agbibiag iti pamay-an a maikariakto nga asawa a lalaki inton mapagteng dayta. Isu idi 1982 nga inted ni Jehova kaniak ti nakaay-ayat a bendision ti nasayaat nga asawa a babai.
Siak ken ni baketko ti agtataeng pay laeng kadagiti bambantay, ket kaskasdi nga inayatko ida. Ngem ti kangrunaan a pakaseknanmi ita ket isut’ panangtulong kadagiti tattao nga umuli iti sabali a bantay. Ania a bantay dayta? Daydiay nadakamat iti padto ni Isaias: “Ket maaramidto kadagiti maud-udi nga al-aldaw a ti bantay ti balay ni Jehova mabangonto iti rabaw dagiti bambantay, ket maibayogto a nangnangruna ngem kadagiti turturod; ket isuamin a nasion agayusdanto agingga kenkuana. Ket adu dagiti inilin-ili a mapanto ken agkuna: ‘Umaykayo, ket sumang-attayo iti bantay ni Jehova, iti balay ti Dios ni Jehova; ket isuronatayonto kadagiti dalanna, ket magnatayonto kadagiti danana.’ Ta iti Sion ti rummuaranto ti linteg, ket iti Jerusalem ti rummuaranto ti sao ni Jehova.” (Isaias 2:2, 3) Anian a ragsak ti pannakauli iti daytoy, ti kasasayaatan amin a bantay!—Naipatulod.