Sangalubongan a Panangipablaak ti Naimbag a Damag

TI Pagarian ti Dios agturturayen! Daytoy ti kasasayaatan kadagiti damdamag. Isut’ gapuna nga idi 1989 nasurok a 3,700,000 a Saksi ni Jehova iti intero a lubong ti sireregta a nangiwaragawag ti “naimbag a damag” nga impadto ni Jesus ken ti “naimbag a damag” nga impablaak ti anghel iti sirmata ni Juan. (Mateo 24:14; Apocalipsis 14:6) Kas kinuna ni apostol Pablo: “Ti awengda nagsaknap iti amin a daga, ken dagiti sasaoda agingga kadagiti pungpungto ti mapagnaedan a daga.” (Roma 10:18) Ket dagiti indibidual iti ngangngani tunggal nasion ken kaputotan ken pagsasao ken il-ili siraragsakda a nangabrasa iti awisda nga “agbutengkay iti Dios ket isu dayawenyo.”​—Apocalipsis 14:7.

Awanen Panangiseguro ti Biag

Maysa kadagita isut’ maysa a lalaki idiay Inglatera a nagbiaganna manipud ti saan a kinaseguro ti biag. Ni Ken ket maysa nga ahente ti insurance, ket idi isut’ simmarungkar iti sangakabbalayan dagiti Saksi ni Jehova, sinaludsodanda: “Kayatmo aya ti agbiag iti maysa a lubong a sadiay ket saanton a kasapulan ti seguro de bida?” Aniat’ kayatda a sawen? A sigun iti Biblia, iti sidong ti Pagarian ti Dios adu a bambanag a mamagbalin iti biag nga agpangpangadua itattan, agraman sakit ken ipapatay, ket awandanton.

Posible aya ti kasta a banag? Wen, inkari dayta ti Dios a mismo. Kas pangarigan, kuna ti Biblia: “Ti Dios met laeng addanto kadakuada [ti sangatauan]. Ket punasennanto ti amin a lulua kadagiti matada, ket awanton ni patay, ket awanto metten ti sasaibbek wenno sangsangit wenno rigrigat. Ta dagidi immuna a bambanag napalabasdan.” (Apocalipsis 21:3, 4) Aniantot’ mangyeg ti kasta a panagbalbaliw? Ti Pagarian ti Dios. Sigun iti Saot’ Dios, iti mabiiten “burakennanto ken ibusennanto amin dagitoy a [moderno-aldaw a napolitikaan a] pagpagarian, ket agtalinaedto iti panawen a di nakedngan.”​—Daniel 2:44.

Dagiti kasuratan kas kadagitoy ti naiyeg iti atension ti ginasgasut a milion a tattao babaen kadagiti Saksi ni Jehova bayat ti sangalubongan a panangaskasaba a kampaniada. Adu, kas ken ni Ken, ti nakailasin a saan laeng a panangtartarigagay a panagpampanunot daytoy. Ti ebidensia ket makaallukoy. Dagitoy nasantuan a karkari mapagtalkanda ket daytat’ dandanin matungpal.

Ti Nabalbaliwanen nga Ipatpateg

Dagidiay a dumngeg kadagiti Saksi ni Jehova bayat nga ikalkallangoganda ti naragsak a panangipablaak ti anghel nailasinda a ti panagbuteng iti Dios ken panangted-dayaw kenkuana ramanenna ti ad-adda pay ngem basta panamati kadagiti karkari ti Biblia. Daytat’ mangbalbaliw pay ti intero a panangmatmatda ken adut’ pinalag-ananna kadagiti pakapapaayan iti biag.

Natakkuatan ni Rafael ken ti asawana ti kinapudno daytoy. Agnaedda idiay Argentina, ket idi nagassawada nasurok a 40 a tawtawen ti napalabasen, pinagbalinda a kalat iti biag ti agtrabaho a sigagaget ken agurnongda maipaay iti natalged a masanguananda. Nupay kasta, 21 a tawtawen kamaudiananna, ti laeng maipakitada iti kinagagetda isut’ bassit a pagtaengan a kankanayon a maritritubar. Saanen a nataltalged ti riknada ngem idi damo a panagasawada.

Idi kuan nangngeganda ti naimbag a damag manipud kadagiti Saksi ni Jehova ket naammuanda ti nasaysayaat a kita ti kinabaknang ken nasaysayaat a kita ti kinatalged. Ni Jesus, iti Sermonna idiay Bantay, nasaona daytoy idi a kinunana: “Saankayo nga agurnong kadagiti gupgupit nga agpaay kadakayo ditoy daga, isu a ti sanga ken ti lati dadaelenda ida, ken isu a dagiti mannanakaw kalienda ket takawenda. Ngem agurnongkayo kadagiti gupgupit sadi langit, isu a ti sanga ken ti lati dida dadaelen, ken isu a dagiti mannanakaw dida kalien ken takawen.”​—Mateo 6:19, 20.

Nupay saannatay isursuro ti Biblia nga agbalin nga impraktikal maipapan ti namaterialan a kinabaknang, daytat’ mangigunamgunam kadatayo a ditay ikabkabil ti namnamatayo iti kakasta a bambanag. (Eclesiastes 7:12) Imbes ketdi, pagreggetantayo a magun-odan ti naespirituan a kinabaknang babaen ti panagadal ti Biblia, nga ammuen ti pagayatan ti Dios, ken pagbalinen ti panangaramid iti dayta a pagayatan a kangrunaan iti panagbiagtayo. (Mateo 6:33) Rinugian ni Rafael ken ti asawana ti agurnong iti daytoy naespirituan a kinabaknang, ket mariknada itan a pudpudno a nabaknangda, saan a gaput’ pinansial a kasasaadda, no di ket gaput’ pannakirelasionda iti Dios. (Apocalipsis 3:17, 18) Ti mensahe ti Pagarian ti Dios ket naimbag unay a damag kadakuada.

Ti Napasayaat a Panagasawa

Ti naimbag a damag addaan pudpudno a pannakabalin nga agaramid ti naimbag. Kas pangarigan, ni John, nga agnaed idiay Inglatera, saan nga interesado iti Biblia, ngem interesado ni baketna ken dagiti annakda. Gapuna rinugiandat’ tumabuno ti panaggigimong dagiti Saksi ni Jehova bayat a ni John ti makipagin-inum a kadua dagiti gagayyemna. Kas bungana, isut’ naigamer ti nalabes a panagin-inum, panagsigarilio, ket, idi agangay, ti imoralidad. Kamaudiananna, inabandonarnat’ pamiliana a nakikabbalay iti sabali a babai.

Nangrugin ti kaso maipapan ti panagsina. Ngem nagsiddaaw ni John ta ni baketna​—a naadalnat’ Nakristianuan a kababalin manipud panagad-adalna ti naimbag a damag​—ti kaskasdi a nangtrato kenkuana a siaayat. Di maawatan ni John no apay. Tallo a lawas sakbay nga agpinal ti diborsio, naaddaan epekto ti Nakristianuan a kababalin ti asawa ni John. Inyebkasnat’ pudpudno a panagbabawina gaput’ kababalinna, ket napasardeng ti kaso ti diborsio. Itan agsuksukimaten a mismo ni John iti naimbag a damag ken makipagad-adalen ti Biblia kadagiti Saksi ni Jehova. Itan isu metten ti maysa a Kristiano, ken, kadua ti asawana, ibagbaganan kadagiti dadduma ti naimbag a damag ti Pagarian.

Kadagitoy nga al-aldaw ti marmarpuogen nga ipatpateg ti pamilia, adut’ agkasapulan ti tulong iti ituktukon ti naimbag a damag a naggaput’ Biblia. Maysa kadagiti Saksi ni Jehova idiay Peru nakatugawna ti maysa a koronel ti army bayat ti panagluganna ti eroplano. Nagpatpatangda ket rinugian ti koronel nga imbuksilan ti parparikut ti pamiliana, agraman ti pannakaadikto ni baketna iti droga ket ngangngani pumanawen a tumipon iti ub-ubing a lalaki. Sitataktika nga impakita ti Saksi kenkuana a ti Biblia mangted ti naimbag, natibker a pammagbaga maipapan kadagiti bambanag ti pamilia ta dayta ti nakatulong a personal kenkuana a nangsolbar kadagiti parikut ti mismo a pamiliana.​—Efeso 5:21–6:4.

Nagyaman ti koronel iti Saksi gapu kadagiti makaliwliwa a sasaona ket nagsuskribir kadagiti magasin a Pagwanawanan ken Agriingkayo! tapno manayonanna pay ti pannakaammona iti naimbag a damag. Kalpasanna, idi a pumampanawen ti Saksi idiay eroplano, maysa nga agtutubo a pagassawaan ti sidadaras a nangkamakam kenkuana ket kiniddawda ti makisao met kenkuana. “Agtugtugawkami laeng iti sanguananyo,” kunada, “ket nangngegmi ti panakipatpatangmo iti daydiay lalaki. Kayatmi met ti agsuskribir kadagidiay a magasin.” Kayatda met a maammuan ti naimbag a damag a mangparang-ay iti biag.

Ti Nabalbaliwan a Panagbiag

Mainayon pay, ti naaon iti Biblia a naimbag a damag ti nangbalbaliw kadagiti tattao. Kas kinuna ni apostol Pablo: “Ti sao ti Dios nabiag ken napigsa.” (Hebreo 4:12) Pudno daytoy iti kaso ti maysa nga agtutubo a lalaki idiay Macedonia, Grecia. Isut’ nakellaat a makaammo a, sigun iti Biblia, Jehova ti nagan ti Dios. Gapuna indawatna iti maysa a gayyemna nga isut’ daras a mangiyam-ammo kenkuana kadagiti Saksi ni Jehova. Dua a panagpatang ti naiyurnos kadagiti Saksi, a tunggal maysa ti pimmaut ti agarup uppat nga oras. Kalpasanna rinugian ti agtutubo a lalaki ti regular a panagadal ti Biblia, a ti umuna pimmaut agingganat’ alas dos iti parbangon!

Manipud iti dayta umuna a panagadal, sipapardas nga intunosen ti agtutubo a lalaki ti panagbiagna kadagiti pagannurotan ti Biblia. Isut’ timmabuno iti panaggigimong maipaay iti panagdayaw a kadua dagiti Saksi ni Jehova ket nakagteng iti punto nga inayatna un-unayen ti Namarsuana. Ket iti kasumbangirna ni Jehova ti nangbendision met kenkuana. Iti umuna a lawas a panagadalna ti Biblia, pinapukisannan ti atiddog a buokna. Iti maikadua a lawas, insardengnan ti ipapanna kadagiti cafés ken discos tapno agsapul kadagiti nagugulo a kakadua. Iti maikatlo a lawas, imbellengnan ti maudi a sigariliona. Kalpasan ti panagadalna iti dua a bulan, timmiponen kadagiti Saksi a mangibagbaga kadagiti dadduma ti naimbag a damag ti Pagarian. Wen, isut’ maragsakan nga inyeg dagiti Saksi ni Jehova ti naimbag a damag iti lugarna ditoy daga.

Ti Naimbag a Damag Idiay Pagbaludan

Uray dagiti rehas ti pagbaludan saanda a lapped iti naimbag a damag. Idiay España maysa nga agtutubo a lalaki nga agnagan José ti agserserbi iti atiddog a sentensia iti pagbaludan gaput’ armado a panagtakaw ken dadduma a kriminal nga ar-aramid. Nupay kasta, naibaga dagiti Saksi ni Jehova kenkuana ti naimbag a damag, ket ti mensahe ti Biblia ti nangbalbaliw a naan-anay iti panangmatmatna. Ni Jehova ti ‘nangpapigsa’ kenkuana.​—Filipos 4:13.

Kuna ni José a mabalin a busbosennan ti intero a panagbiagna iti daytoy a sistema dagiti bambanag iti likudan dagiti rehas gapu iti dati a kababalinna. Ngem isut’ nabautisaran ket itan maysan a Kristiano. Ni baketna ket sititibker a mangsupsuportar kenkuana, ket padpadasenna nga ipaayan ti anakda a lalaki ti Nakristianuan a panangpadakkel. Kabayatanna, iranranud ni José ti naimbag a damag kadagiti padana a balud, tattao a narigat a madanon dagidiay agnanaed iti ruar dagiti pader ti pagbaludan. Itan ti kaduana iti selda ket maysa metten a bautisado a Kristiano.

Sumagmamano laeng dagitoy a pangarigan a pangipakita ti bungbunga ti sangalubongan a kampania a panangaskasaba dagiti Saksi ni Jehova. Pudno unay, ti naimbag a damag nga impablaak ti di makita nga anghel ket inkallangogan dagiti Saksi ni Jehova “kas naimbag a damag nga agnanayon kadagiti agnaed iti rabaw ti daga, ken kadagiti amin a nasnasion ken kaputotan ken pagsasao ken il-ili.”

Isut’ kasayaatan a damag, ken daytat’ kakaisuna a namnama ti sangatauan. Igunamgunammi ti inkay panangipangag iti dayta. Kas kada Ken ken John idiay Inglatera, kas ken ni Rafael ken ti asawana a taga Argentina, kas ken José idiay España, ken kas kadagiti linaksa-laksa pay a dadduma, tumipontayo iti anghel a mangdagdagdag kadagiti amin nga “agbutengkay iti Dios ken isu dayawenyo, ta dimteng ti oras ti panangukomna, ket agdaydayawkayo iti Daydiay nangaramid iti langit ken iti daga ken iti baybay ken kadagiti ubbog dagiti dandanum.”​—Apocalipsis 14:7.