Kasano a Magunggonaannakayo ti Ebanghelio?
MARARAEM ti Biblia gapu iti pategna iti literatura—uray kadagiti dadduma nga ateista. Nupay kasta, manmano dagiti mangbasa iti dayta nga addaan panggep a mangiyaplikar iti sasawenna. Maysa pay, yantangay agarup dua ribo a tawenen ti kabayag ti naimbag a damag a linaon dayta, adu a tao ti kasla mamati a nasken a mapabaro dayta. Nagpaso kadin ti Ebanghelio? Nikaanoman.
Adda dagiti lallaki ken babbai, ubbing ken natataengan, a riniwriw itan ti bilangda, a makaammo a ti Biblia ket nagpateg a gubuayan ti tulong. Kas mabasa iti pakauna ti Today’s English Version: “Saan laeng a naindaklan a literatura ti Biblia a rumbeng a dayawen ken salimetmetan; Naimbag a Damag nga agpaay iti amin—maysa a pakaammo a masapul nga awaten ken ipatungpal iti inaldaw a panagbiag.”
Aniat’ kaipapanan ti Ebanghelio kadakayo? Us-usarenyo kadi dayta kas bagnos iti inaldaw a panagbiagyo? Usigenyo no kasano a ginunggonaan ti naimbag a damag ti sumagmamano a nangipangag iti dayta idi umuna a siglo ken no kasano a nagunggonaan dagiti dadduma iti panawentayo.
Tattao a Tinulongan ti Ebanghelio
Idi kaaldawan ni Jesus adda dagiti indibidual a kas dagiti nagaget a mangngalap ken agtagibalay a naallukoy iti naimbag a damag ken nakaammo iti kinapudno maipapan iti panggep ti Dios agpaay iti tao. Binaliwan iti kasta unay ti naimbag a damag ti panagbiagda ken masansan nga inyeganna ida iti dakkel a bang-ar. Kas pangarigan, naagasan ni Maria Magdalena kadagiti dakes nga espiritu. Pinanawan ni Zaqueo, dati a panguluen dagiti agsingsingir ti buis, ti naagum a wagas ti panagbiagna. (Lucas 8:2; 19:1-10) Natulongan dagiti bulsek ken agkukutel idi immayda ken Jesus, daydiay nangaskasaba ti naimbag a damag. (Lucas 17:11-19; Juan 9:1-7) Naikuna a siuumiso ni Jesus: “Dagiti bulsek makakitada manen, ket dagiti pilay magnada, dagiti agkukutel madalusanda ket dagiti tuleng makangngegda, ket dagiti natay mapagungarda, ket dagiti napanglaw makaskasabaanda iti naimbag a damag.”—Mateo 11:5.
Nupay kasta, ti napatpateg ngem ti pannakapaimbagda isu ti panangbaliw ti naimbag a damag iti kinatao ti adu kadagidiay a daksanggasat. Napno iti namnama iti masanguanan dagiti nasingpet-panagpuspusona a tattao. Nagtalekda iti Pagarian ti Dios—banag a nasaysayaat ngem ti aniaman a social gospel. (Mateo 4:23) Saan a nakeltay ti namnamada gapu iti ipapatay ni Jesus. Iti panangdeskribirna kadagiti bambanag uray kalpasan dayta a pasamak, kunaen ti Aramid 5:42 maipapan kadagiti adalanna: “Inaldaw-aldaw iti templo ken kadagiti balbalay dida namingga a manursuro ken mangikaskasaba ti naimbag a damag maipapan ken Kristo, ni Jesus.” Idi umuna a siglo, immawat dagiti tao kadagiti adu a daga iti naespirituan a tulong gapu ta impangagda ti kasta a panangasaba.
Ti Pagarian ti kaimbagan a damag idi. Naimbag a damag kadi pay laeng ti mensahe ti Pagarian?
Aniat’ Kaipapanan ti Naimbag a Damag Ita?
No tarigagayanyo ti natalna, natalged a lubong, ngarud sigurado a naimbag ti damag ti Pagarian. Kinaagpaysona, iti lubong nga addaan iti riniwriw a mabisbisin a tattao, agraman dagiti nakaam-amak a sakit a mamagpeggad iti tunggal maysa, ken ti makapadanag nga ilalanlan ti krimen, ken ti panagsaknap ti napolitikaan a di kinatalged, isu laeng dayta ti pudpudno ken manayon a naimbag a damag. Isu dayta ti kakaisuna a namnama iti pudpudno nga irarang-ay.
Isut’ gapuna nga impadto ni Jesus maipapan iti kaaldawantayo: “Daytoy naimbag a damag ti pagarian maikaskasabanto iti amin a mapagnaedan a daga kas pammaneknek iti isuamin a nasion; ket iti kasta umayton ti panungpalan.” (Mateo 24:14) Matungtungpalen dagitoy a sasao iti naisangsangayan a pamay-an bayat nga ikaskasaba dagiti Saksi ni Jehova ti naimbag a damag iti nasuroken a 200 a dagdaga. Komendaran ti publikasion a Katoliko a Nova Evangelização 2000, dagiti Saksi gapu itoy, a kunkunana: “Sadinot’ pakasarakantayo kadagiti Saksi ni Jehova? Kadagiti ruangan dagiti balay. Ket iti panagbalin a Saksi ni Jehova, malaksid iti panagbalin a kukua ni Jehova, ti maysa masapul nga agbalin a saksi. Gapuna, masarakantayo ida nga agtartrabaho, mangipakpakaammo, mangisarsarita iti kapadasanda.”
Nupay kasta, awan ti automatiko a magunggonaan iti naimbag a damag. Dagiti laeng mangipangag ken agtulnog ti matulonganna. Tapno iyilustrar daytoy a punto, inted ni Jesus ti pangngarig maipapan iti agmulmula. Dagiti nagduduma a kita ti daga a nagdissuan dagiti bukel iladawanda dagiti nagduduma a kita ti kasasaad ti puso dagiti dumngeg iti naimbag a damag. Kinuna ni Jesus: “No uray siasino a makangngeg ti sao maipapan iti pagarian ngem dina maawatan, umay ti managdakdakes ket rabsutenna ti naimula iti pusona . . . Ti naimula iti nasayaat a daga, isu daytoy ti dumngeg iti sao ket maawatanna, isu a mangted ti bunga ket agbunga, dagiti dadduma sagsangagasut, dagiti dadduma sagninem a pulo, dagiti dadduma saggatlo pulo.”—Mateo 13:18-23.
Kas idi umuna a siglo, di pagreggetan ti kaaduan a tao ita a tarusan ti naimbag a damag. Dida maawatan, isu a saanda a magunggonaan. Dagiti dadduma apresiarenda ti naimbag a damag ken sursuruenda no kasano nga itunos ti panagbiagda iti pagayatan ti Dios. Isu a mabendisionanda. Ania a grupo ti pakaibilanganyo?
Ti Bileg ti Ebanghelio Ita
Paneknekan dagiti kapadasan a ti pannakatarus iti naimbag a damag tulonganna dagidiay “awanan inanama ken awanan Dios.” (Efeso 2:12; 4:22-24) Kinasapulan ni Roberto a taga Rio de Janeiro ti tulong. Nanipud idi agtutubo, nalulok ti kabibiagna, a naigamer iti droga, imoralidad, ken panagtakaw. Nagtungpal iti pagbaludan. Bayat nga adda sadiay nakipagadal ni Roberto ti Biblia iti maysa a Saksi a bumisbisita. Rimmang-ay iti kasta unay iti naespirituan ta nakissayan ti naikeddeng a panaggianna iti pagbaludan.
Idi nawayawayaanen, naam-ammo ni Roberto ti balasitang a dinarup ken binutbutengna idi iti paltog. Makiad-adal met ti Biblia kadagiti Saksi ni Jehova. Aniat’ napasamak? Ti sumaganad ket paset ti surat a mangisalsalaysay iti dayta a pasamak: “Damoda a nagam-ammo idiay Kingdom Hall nanipud panangdarupna. Makatignay ti panagsarakda. Nagsangit ken naginnarakupda kas agkabsat. Agpadpada nga idaydayaw itan ti dati a mannanakaw ken ti biktimana ni Jehova.”
Kinasapulan ti sabali pay nga indibidual, ni Isabel, ti tulong gapu ta napudot ti panagul-ulona. Isut’ naigamer iti espiritismo ken panangkulam ken tinutuok dagiti demonio. Bayat a nakipagadal ti Biblia kadagiti Saksi ni Jehova, nasarakanna a pudno a nakatulong ti naimbag a damag. Kalpasan ti sumagmamano a tiempo, nakalapsut iti panangtengngel dagiti demonio ken binaliwanna ti kinataona—kamaudiananna nasursurona a tenglen ti pungtotna. Maysa itan a matalek a Kristiano, a naanus iti pannakilangenna kadagiti sabsabali.
Wen, saan laeng a maysa a teoria ti naimbag a damag. Addaan dayta iti pudpudno a bileg a mangbaliw kadagiti biag. (1 Corinto 6:9-11) Ad-adu pay ti aramidenna. Itudona met dagiti masanguanan a bendision.
Dagiti Mapasungad a Bendision
Sigun iti Sao ti Dios, nakaskasdaaw a namnama ti adda iti masanguanan. Makitatayto ti kaitungpalan ti kararag ni Jesus nga umay koma ti Pagarian ti Dios ken maaramid koma ti pagayatanna ditoy daga a kas sadi langit. (Mateo 6:10) Din agbayag, maikkatton ti agdama a sistema dagiti bambanag agraman ti makariribuk a kinakillo ken kinaranggasna, ket agturayton ti nailangitan a gobierno ti Dios, ti Pagarianna, kadagiti nalinteg-panagpuspusona a tattao a situtulok a mangipangag ken agtulnog iti naimbag a damag.—Daniel 2:44.
Sumarunonto dagiti dakkel nga irarang-ay bayat a maidalan dagiti matalek a tattao a mamagbalin ti daga a paraiso a pagtaengan nga agnanayon dagiti naemma. (Salmo 37:11, 29) Talaga a naimbag a damag no mapukaw nga agnanayon ti krimen, sakit, bisin, polusion, ken dagiti gubat! Mailadawanyo kadi ti bagiyo ken ti pamiliayo nga agnanaed iti dayta baro a lubong ti kinatalna ken naan-anay a salun-at nga awan ti panagamak iti sakit wenno ipapatay?—Apocalipsis 21:4.
Pudno, ibilang ti adu a saan a realistiko wenno arapaap ti kasta a naimbag a damag. Ngem nagkamalida. Naibatay ti naimbag a damag iti kapigsaan nga ebidensia, ken minilion a biag ti binaliwannan. Gapuna, dikay maupay no saan a mamati dagiti dadduma.
Darepdepenyo ti maysa a masirib a tao a gumatang ti daga iti rumangrang-ay a lugar, a namnamaenna a magunggonaan iti dayta. Adda aya mangbabalaw kenkuana gapu ta kasta ti panangusarna iti kuartana? Awan. Mabalin nga ibaga dagiti tao nga umiso ti ar-aramidenna. Apay ngarud a dikay panunoten ti masanguanan mainaig iti Pagarian ken agpuonan, no ar-arigen, iti naimbag a damag? Yantangay ti panangakseptar iti naimbag a damag kaipapananna ti pannakaisalakan, awanen sabali pay a mangyeg iti nasaysayaat a gunggona.—Roma 1:16.
Kasanokayo a makapuonan iti naimbag a damag? Umuna, situtulok nga agpaisurokayo iti Dios. Kalpasanna agtignaykayo a maitunos iti maadalyo. Tungpalenyo dagiti pamunganayan nga alagaden, kas inlanad ti mammadto a Hebreo idi ugma: “Ania aya ti kalikaguman ni Jehova kenka no di laeng ti panangalagad ti kinahustisia ken agayat ti kinamanangaasi ken pannagna a sipapakumbaba iti Diosmo?” (Mikias 6:8) Kasapulan ti tiempo ken panagregget iti panangsursuro a makipagna iti Dios. Nupay kasta, dagiti Saksi ni Jehova, a timmulong kada Roberto ken Isabel, pagragsakanda ti tumulong kadakayo itoy a banag—a kas iti panangtulongda kadagiti minilion a sabsabali pay iti adun a tawen.
Bayat nga ur-urayenyo ti kaitungpalan dagiti kari ti Dios, saluadanyo ti puonanyo babaen ti panagbiag a maiyannurot iti naimbag a damag, panangtagiragsak iti talna ti isip ken panangipasdek iti nasingsinged a pannakirelasion iti Dios. Natalgedto ti puonanyo—uray no agsuek ti ekonomia wenno rumsua ti napolitikaan a riribuk. Ket inton kamaudiananna, ikkannakayto iti nakaskasdaaw a gunggona. Ania dayta a gunggona? Insurat ni apostol Juan: “Ti lubong aglabas ken ti tarigagayna, ngem ti agaramid iti pagayatan ti Dios mataginayon.”—1 Juan 2:17.
[Ladawan iti panid 7]
Agdisso dagiti bukel ti naimbag a damag iti nagduduma a kita ti daga
[Credit Line]
Garo Nalbandian