Ania Kadi a Talaga ti Ebanghelio?

NO PANAWEN ti Christmas, mangngeg ken personal pay ketdi a pagsasaritaan dagiti tao iti adu a pagilian ti Ebanghelio. Kadawyan unay ti termino, ngem ad-adu pay aya ti kaipapanan dayta ngem ti pagarupen ti kaaduan? Adda kadi naisangsangayan a kaipapanan ti Ebanghelio kadakayo ken kadagiti ingungotenyo?

Ti “ebanghelio” kaipapananna “naimbag a damag,” ket maawat la ketdi ti naimbag a damag saan laeng nga iti panawen ti Christmas no di ket iti uray ania a panawen. Ngem saan a basta naimbag a damag laeng ti Ebanghelio. Maysa dayta nga espesipiko a naimbag a damag a naggapu iti masnup a gubuayan maipapan iti partikular a banag. Kinaagpaysona, maysa dayta a mensahe nga inkeddeng ti Dios a maipakaammo iti amin a sangatauan.

Tinukoy ni Eugênio Salles, arsobispo ti Rio de Janeiro, Brazil, dayta naimbag a damag idi indagadagna: “Rebbeng nga agtignaytayo a maitunos iti Ebanghelio a saan ket a kadagiti ideolohia.” Umiso ti arsobispo. Nupay kasta, masapul nga ammotayo no ania dayta nga Ebanghelio tapno makapagtignaytayo a maitunos iti dayta. Kasanotayo a maammuan dayta? Ken kasano a tulongannatayo ti panagtignay a maitunos iti Ebanghelio?

Ania ti Ebanghelio?

Masansan a sabali ti pagawatan dagiti dadduma iti Ebanghelio. Idi 1918 indayaw ti Federal Council of the Churches of Christ idiay America ti naongawen a Liga de Naciones kas napolitikaan nga ebkas ti Pagarian ti Dios ditoy daga ken inwaragawagda a “nairamut [dayta] iti Ebanghelio.” Di naragpat dayta a bagi ti kalatna a mangsaluad iti talna. Nalawag, nagkamali ti konsilio. Awan pakainaigan ti Liga de Naciones iti Ebanghelio.

Kadagiti kallabes a tawen innaig dagiti mangitantandudo iti liberation theology ti Ebanghelio kadagiti kapanunotanda para iti napolitikaan wenno sosial a repormasion. Ti panangaramidda iti kasta linaksidda ti pudpudno nga Ebanghelio. Kinuna ti magasin ti Brazil a Veja: “Pinaboran ti Iglesia Katolika ti sosial a pagarian, a liniwayanna dagiti naespirituan a kasapulan dagiti miembrona. Masansan a dagiti laeng makaallukoy nga argumento kontra kadagiti sosial a di kinahustisia ti nasarakan dagidiay nangsapul ti sao ti Dios iti sermon.”

Mabalin a naimbag a damag kadagiti dadduma ti panangpadur-as iti kasasaad ti panagbiag wenno panangbalbaliw kadagiti napolitikaan a sistema. Ngem, saan nga isu dayta ti naimbag a damag, ti Ebanghelio. Iti panangaklonna iti pannakapaay ti simbaanna a mangikasaba iti pudpudno nga Ebanghelio, kinuna ti maysa nga obispo: “Naliwayanmi ti naespirituan a panangisuro kadagiti miembromi nanipud idi dekada ti 1960 gapu iti materialistiko nga impluensia iti doktrinami.”

Isingasing ti maysa a report iti magasin ti E.U. a Time a simmiasi met dagiti Protestante iti Ebanghelio. Kunaen ti magasin: “Saan laeng a napaay dagiti kadawyan a denominasion a mangipaawat ti mensaheda; saanda a masinunuo no ania a talaga ti mensahe.” Ania aya ti rumbeng a mensaheda? Ania ti Ebanghelio?

Panangilasin iti Ebanghelio

Depinaren ti Webster’s Ninth New Collegiate Dictionary ti “Ebanghelio” kas “ti mensahe maipapan ken Kristo, ti pagarian ti Dios, ken pannakaisalakan.” Nadepinar met ti sao nga “ebanghelio” kas “panangipatarus iti Nakristianuan a mensahe (ti social gospel)”; “ti mensahe wenno dagiti sursuro ti maysa a relihiuso a mannursuro.” Maitutop kadi amin dagitoy a depinasion? Saan, no ti Ebanghelio ti pagsasaritaan. Naibatay iti Biblia ti pudpudno nga Ebanghelio; gapuna, ti laeng umuna kadagidiay tallo a depinasion ti umiso. Dagiti naudi a dua iyanninawda laeng ti wagas ti pannakaaramat itan ti sao nga “ebanghelio.”

Maitunos itoy a kapanunotan, kunaen ti Vine’s Expository Dictionary of New Testament Words nga iti Kristiano a Griego a Kasuratan (ti “Baro a Tulag”), ti Ebanghelio “kaipapananna ti naimbag a damag maipapan iti Pagarian ti Dios ken ti pannakaisalakan babaen ken Kristo, a maawat babaen ti pammati, maibatay iti mamagkappia nga ipapatayna.” Napateg a maawatantayo daytoy gapu ta ti umiso a pannakatarus iti pudpudno a naimbag a damag dakkel ti epektona iti agdama a pagimbagantayo ken masanguanan a kinaragsaktayo.

Naidumduma a Mensahe

Kas ipakita ti nadakamat a reperensia, dakkel ti nakaikawingan ti Ebanghelio ken Jesu-Kristo​—ta naawagan ti uppat a salaysay ti Biblia maipapan iti biagna ditoy daga kas ti uppat nga Ebanghelio. Nanipud pay iti rugi ti natauan a biagna, ti damag maipapan ken Jesus ket naimbag a damag. Iti panangipakaammona iti pannakayanak ni Jesus, kinuna ti maysa nga anghel: “Adtoy! Yegankayo ti naimbag a damag [wenno, ebanghelio] ti dakkel a rag-o a maipaayto kadagiti amin a tattao, ta ita nga aldaw nayanak kadakayo ti maysa a Manangisalakan, isu ti Kristo nga Apo.”​—Lucas 2:10, 11.

Ni kappasngay a Jesus ti agbalinto a Kristo, ti naikari a Mesias. Ipalgakna ti panggep ti Dios a mangisalakan, idatonna ti perpekto a natauan a biagna a maipaay iti sangatauan, mapagungar, ket kalpasanna mapili nga Ari ti Pagarian ti Dios. Pudno a naimbag a damag! Daytat’ gapuna a ti mensahe maipapan kenkuana ket naawagan ti Ebanghelio.

Bayat ti ababa a ministeriona ditoy daga, nakaregregta ni Jesus a nangikasaba ti naimbag a damag. Mabasatayo iti Ebanghelio ni Mateo: “Ni Jesus linawlawna dagiti amin a siudad ken purok, a nangisursuro kadagiti sinagogada ken nangikaskasaba ti naimbag a damag ti pagarian.” (Mateo 9:35) Ti panangaskasabana ket saan laeng a tapno pasayaaten ti rikna dagiti tao. Iti rekord ni Marcos, kinuna ni Jesus: “Naturposen ti naikeddeng a panawen, ket ti pagarian ti Dios asidegen. Agbabawikayo, dakayo a tattao, ket patienyo ti naimbag a damag.” (Marcos 1:15) Wen, binaliwan ti naimbag a damag ti biag dagidiay nangipangag ken nagtulnog iti dayta.

Kalpasan ti ipapatay ni Jesus, intuloy dagiti pasurotna nga inkasaba ti Ebanghelio. Saanda laeng nga inwaragawag ti Pagarian no di pay ket innayonda ti naragsak a damag a nagungaren ni Jesus iti makanawan ti Dios idiay langit ken indatagnan ti pateg ti perpekto a natauan a biagna a maipaay iti sangatauan. Kas ti pinili ti Dios nga agturay iti intero a daga kas Ari ti Pagarian ti Dios, isu ti Ahente ti Dios a mangdadael kadagiti kabusor ti Dios ken mangisubli ti daga a paraiso.​—Aramid 2:32-36; 2 Tesalonica 1:6-10; Hebreo 9:24-28; Apocalipsis 22:1-5.

Itatta, adda pay iraman ti naimbag a damag. Sigun kadagiti amin a pammaneknek ti kaitungpalan ti padto, naitronon ni Jesus, ket agbibiagtayon iti maudi nga al-aldaw daytoy sistema dagiti bambanag. (2 Timoteo 3:1-5; Apocalipsis 12:7-12) Sipapardas nga umas-asideg ti tiempo inton dadaelenen ti Pagarian dagiti kabusor ti Dios. Adda pay aya naim-imbag a damag ngem dayta?

Makitatayto iti sumaganad nga artikulo no kasano kabileg ti Ebanghelio. Dayta ti nakatulong iti maysa a babai a limmapsut iti black magic. Dayta ti nakatulong iti maysa a lalaki a naibalud gapu iti panagtakaw a nakasarak iti kinaragsak. Ken dakkel met ti maitulong dayta kadakayo​—no ipangagyo ken agtulnogkayo iti naimbag a damag.