Panangaskasaba Kadagiti Pagnegosyuan—Estilo Hapones
TI BILIN ni Jesu-Kristo nga iyadelantar ti trabaho a panangaskasaba “agingga iti ungto ti daga” masapul nga iramanna dagiti luglugar ti negosio. (Aramid 1:8) Idiay Japan, ti panangikaskasaba ti Pagarian kadagiti tattao nga agtartrabaho kadagiti ahensia publiko ken kadagiti opisina ti dadakkel a kompania idatagna ti kalalainganna a karit. Dagiti agibumbunannag ti Pagarian iti maysa a kongregasion nangaladat’ permiso a mangaskasaba babaen kadagiti magasin iti maysa a pasdek ti opisina iti siudad no oras ti pangngaldaw. Saan laeng nga inkararag dagiti agibumbunannag ken Jehova nga ikkanna koma ida ti tured no di ket inikkanda met ti dakkel nga atension ti panagkawkawesda ken ti kababalinda ken nangisaganada pay kadagiti lapel cards a mangipakpakita ti nagnaganda ken mangipabigbig kadakuada kas Saksi ni Jehova.
Ti maysa a Saksi asitganna ti maysa a trabahador, a kunkunana: “Dispensarennak biit, naikkanak ti pammalubos a makisao kadagiti tattao ditoy. Mabalinnak kadi a denggen bayat a mangmanganka?” Masapul a mangipakita dagiti Saksi ti nasayaat a pangngeddeng ken usarenda dagiti sasao “a kasla natempla iti asin.” (Colosas 4:6) Iti umuna nga ibibisitada, nakaipaimada ti 39 a magasin, ngem inabutnat’ uppat a panagsarungkar tapno masaknapan ti intero a walo-grado a pasdek a pagtartrabahuan ti 1,500 a tattao. Nakaipaimada ti dagup a nasurok ngem sangagasut a magasin ket nakairugida kadagiti ruta ti magasin ken nakapagaramidda ti panagsarungkar.
Maysa kadagiti agibumbunannag ti simmarungkar manen iti maysa a manedyer. Idi nangngegna ti maysa a kasuratan a naibasa manipud ti New World Translation, kunana: “Daytoy a Biblia ket naglaka a tarusan. Daydiay nabasak idi ket kadaanan a Hapones ket nagrigat a basaen.” Maysa a kopia ti New World Translation ti naiyeg kenkuana iti sumaganad a lawas.
Mabalinanyo pay aya ti mangaramid ti ad-adu iti teritoria ti kongregasionyo a mangikaskasaba ti naimbag a damag iti “amin a kita ti tattao,” agraman dagidiay adda kadagiti distrito ti negosio?—Idiligyo ti 1 Timoteo 2:4.