No Kasano ti Mangasaba iti Lugar ti Negosio
1. Ania dagiti pagsayaatan ti panangasaba iti lugar ti negosio?
1 Kayatyo kadi ti mangasaba iti teritoria a manangpasangbay ti kaaduan a tattao ken manmano dagiti saanyo a madanon? Mabalin a maaramidyo dayta iti mismo a teritoria ti kongregasionyo. Kasano? Babaen ti isasarungkar kadagiti tiendaan sadiay. Masansan a nasayaat ti resulta ti panangasaba dagiti agibumbunannag kadagiti tiendaan.
2. Kasano a maorganisar ti panangasaba iti lugar ti negosio?
2 Kadagiti dadduma a kongregasion, paset ti naituding a teritoriada dagiti lugar ti negosio. Ti kabsat a mangas-asikaso iti teritoria mabalin nga isaganana dagiti mapa dagitoy adu ti taona a lugar ti negosio. No adda dagiti lugar ti negosio a karaman kadagiti mapa ti teritoria a kabalbalayan, nalawag a mailasin koma dagitoy a saan a paset ti teritoria a pagnanaedan dagiti tattao. Iti dadduma a teritoria, mabalin a paggiddanen a wanasen dagiti lugar ti negosio ken kabalbalayan. No diyo pay napadas ti nangasaba iti lugar ti negosio, irugiyo babaen ti panangasabayo iti sumagmamano a babassit a tiendaan.
3. Ania ti tumulong kadatayo tapno epektibo ti panangasabatayo kadagiti tiendaan?
3 Usarenyo ti Simple a Pamay-an: No mangasabakayo kadagiti tiendaan, nasken nga agkaweskayo a kas iti panagkawesyo no makigimongkayo iti Kingdom Hall. Nasayaat met no iranayo ti mapan no saan nga okupado ti tiendaan. No mabalbalin, sumrekkayo no awan ti kostumer. Kiddawenyo ti makisarita iti makinkukua wenno agbambantay iti tiendaan. Ababa ken direkta koma ti presentasionyo. Ania ti mabalinyo nga ibaga?
4-6. Ania ti mabalintay nga ibaga no mangaskasabatayo iti agbambantay wenno makinkukua iti tiendaan?
4 No makisaritakayo iti agbambantay wenno iti makinkukua iti tiendaan, mabalinyo nga ibaga ti kastoy: “Manmano a madanonmi dagiti negosiante iti pagtaenganda, isu a sarsarungkarandakayo iti panggedanyo. Salaysayen dagiti magasinmi dagiti agdama a pasamak iti lubong.” Kalpasanna, itampokyo ti maysa nga ababa a punto manipud iti maysa a magasin.
5 Wenno mabalinyo a padasen daytoy a simple a pamay-an: “Adu dagiti mayat a makaammo iti ad-adu pay maipapan iti Biblia ngem bassit ti tiempoda. Ilawlawag daytoy a polieto ti libre a panagadal a tumulong kadakayo a mangammo kadagiti sungbat dagiti saludsodyo maipapan iti Biblia.” Kalpasanna, ipakitayo ti panid 4-5 ti polieto a Kayatyo Kadi a Maammuan ti Ad-adu Pay Maipapan iti Biblia?
6 No makitayo nga okupado ti agbambantay iti tiendaan, mabalin a mangitukonkayo laengen iti maysa a polieto sayo kunaen: “Dumaw-asakto manen no saankayo nga okupado. Kayatko a maammuan no ania ti makunayo iti daytoy a polieto.”
7. Kasanotayo a masukay ti interes ti maysa a tao iti lugar ti negosio?
7 Panangsukay iti Interes: Mabalin a makaikonduktakayo pay ketdi iti panagadal iti Biblia iti lugar ti negosio. Maysa nga special pioneer ti regular a mangitultulod kadagiti magasin iti maysa a negosiante. Idi inyebkas ti lalaki ti apresasionna iti mabasbasana, indemostra ti payunir ti panagadal iti Biblia, nga inusarna ti broshur a Kalikaguman. Naipasdek ti panagadal iti mismo a panggedan ti lalaki. Kas panangipakita iti konsiderasion, 10 agingga iti 15 a minuto laeng ti busbusbosen ti payunir tunggal agadalda. Itultuloytayo met koma a biroken dagiti maikari babaen ti panangasaba iti lugar ti negosio.