Naigunamgunam Kadagiti Nagraduar ti Gilead a Sukayen ti Laing iti Nasayaat a Pannakikomunikar
IDI Domingo, Marso 4, 1990, nasurok a 4,100 a tattao ti nangpunno ti Jersey City Assembly Hall dagiti Saksi ni Jehova para ti graduasion ti maika-88 a klase ti Watchtower Bible School of Gilead. Ti 24 a nagturpos naggapudat’ 6 a pagilian ket itan maipatuloddan iti agdagup 13 a pagilian.
Nangrugi ti programa iti alas 10:00 t.b. Kalpasan ti panagkanta, ni George Gangas, a nasurok ngem 90 años itattan ken miembro ti Bagi a Manarawidwid, nanglukat babaen ti napasnek a kararag ken Jehova. Simmaruno iti daytoy, ti tserman, a ni C. W. Barber, a miembro met ti Bagi a Manarawidwid ken graduado met ti maika-26 a klase ti Gilead, insalaysayna biit ti napartak a panagbalbaliw ti eksena ti lubong. Nagkonklusion babaen iti panagkunana: “Nikaanoman awan pay ti nakaskasdaaw unay a gundaway nga agbalin kas dagiti saksi ti kinatan-ok ni Jehova ken ti kinalintegna.” Kalpasanna intuloynan nga ipakaammo dagiti nadumaduma nga agpalawag iti programa ti agsapa.
Ni Vernon Wisegarver, a miembro ti Factory Committee idiay Brooklyn, pinilina ti tema nga “Agbalinkay a Nasigo iti Trabahoyo.” Babaen ti panangusarna ti ilustrasion ti maysa nga agpampanday iti away a nangaramid ti maysa a napigsa a kadena, a naikabit iti maysa a sinipete, a nangisalakan kadagiti biag dagiti amin nga adda iti barko kabayatan ti maysa a bagyo, inyarigna dagiti graduado ti Gilead kas ti agpampanday. Babaen ti panangisuroda kadagiti tattao ti Biblia, matulonganda ida a mangibangon kadagiti makaispal-biag a kadena dagiti nadiosan a kualidad, nga us-usaren ti kinalaing a napatanorda bayat ti panagsanayda iti Gilead. Pinaregtana dagiti graduado nga itultuloyda nga asaen ti laingda a mangisuro ken agtakder iti imatang ti naindaklan kadagiti amin nga Ar-ari kas “dagiti nalaing a managobra.”
Sumaruno, ni Jack Barr, miembro ti Bagi a Manarawidwid, nagsao iti topiko a “Nanamenyo ket Kitaenyo ta ni Jehova Naimbag.” Dagiti komentona naibatayda iti Salmo 34:8, a kunana: “Nanamenyo ket kitaenyo ta ni Jehova naimbag; naragsak ti napigsat’ pammagina a tao a kumamang kenkuana.” Binagbagaanna ida: “Ramananyo amin nga adda iti pakaitudinganyo kas misionero. Padasenyo amin. Dikay agbuteng iti dayta, Iti kasta malak-amyonto ti kinaimbag ni Jehova iti pamay-an a pulos dikay pay napaspasaran idi. Saankay a napili. Dikay kunkunaen, ‘Diak kayat daytoy.’ Ramananyo dayta.”
Ni Charles Woody, miembro ti Brooklyn Service Department Committee, nagpalawag iti napilina a tema a “Panangsalimetmet ti Natimbeng a Panangmatmat iti Bagitayo.” Kinunana: “Maragsakantayo a makikadua kadagidiay natimbeng panangmatmatdat’ bagbagida, a saan a ti kaykayatda laeng ti masursurot, dagidiay napartak a mangkomendar ken mangpabileg kadagiti dadduma, ken nupay adut’ pannakaammoda, dida iparparikna a dagiti dadduma nakunengda.” Kinunana pay: “Kas misioneros kayatyo nga allukoyen dagiti tattao iti kinapudno, saan nga abugen ida. Ti napakumbaba a kababalinyo ket nagpateg a tulong a mangragpat iti daytoy.”
Ni Lyman Swingle, a miembro ti Bagi a Manarawidwid, sumaganad a nagpalawag iti tema a “Dagiti Sumaganad a Kapitulo, Aniantot’ Ibagada Kadatayo?” Inrugina babaen ti panagkunana: “Ita nga aldaw rinugianyo ti baro a kapitulo iti biagyo. Aniantot’ isuratyo kadagitoy a kapitulo manipud ita nga agtultuloy iti masanguanan?” Pinalagipanna ida: “Isuamin nga aramidenyo rebbeng a mangiyeg dayaw ken dayag ni Jehova,” ken sana innayon: “Siguraduenyo a dagiti desisionyo ket naibatayda iti Sao ti Dios. Laglagipenyo ti Proverbio 3:7, a nagkuna: ‘Saanka koma a masirib kadagita matam met laeng.’ Sapay koma ta matalekkayo a mangitungpal ti nakaitudinganyo.” Isut’ nagpatingga babaen iti panagkunana: “Agtalekkami a dikay koma pulos malmalpas ti panangisuratyo ti biograpoyo, tapno agbiagkay koma iti agnanayon.”
Sumaganad, ni Jack Redford, maysa kadagiti instruktor ti eskuelaan, binagbagaanna dagiti nagraduar: “Agbalinkay a Sibibiag a Datdaton.” Rinugianna babaen ti panagkunana: “Ti serbisio a kinamisionero ket maysa a biag ti panagsakripisio. . . . Ay-ayatendakayo gaput’ espirituyo a managsakripisio.” Nagadaw manipud Filipos 2:17, a sadiay kuna ni apostol Pablo nga isut’ maibuybuyat kas daton a mainum, kayatna a sawen isut’ situtulok a mangipaay ti bagina kas sibibiag a daton, insaludsodna: “Ngem kasano a dagiti misionero arigdat’ daton a mainum?” Insalaysayna ngarud ti dua a kapkapadasan maipapan kadagiti misionero a nangbusbos ti bagida iti nalablabes ngem ti kasapulan. Ti maysa nagaramid ti 16,000 a ladrilio kadagiti mismo nga imana ket binangonna ti damdamo a Kingdom Hall iti nakaitudinganna a pagilian. Daydiay maysa a kapadasan ket maipapan ti maysa a kabsat a babai a nangkuyog ken lakayna idiay kabakiran, a ti kasasaad ti panagbiag ket kadaanan unay. Dagiti lokal a kakabsat a babbai ti mangapresiar unay kenkuana agsipud ta bigbigenda nga isut’ mangibuybuyat ti bagina kas maysa a ‘sibibiag a daton.’ Ngem idin impalagip ti agpalpalawag kadagiti estudiante a ti daton wenno sakripisio awan pategna no daytat’ saan a napakuyogan ti panagtulnog. Iti inna panangusar ti salaysay maipapan ken Ari Saul ken dagiti Amalecitas, isut’ namagbaga: “Laglagipenyo a kanayon a ti panagtulnog naim-imbag ngem ti sakripisio. Dikay padpadasen ti tumawar ken Jehova. Aramidenyo a kanayon ti ibagana kadakayo.”
“Kalpasanna inyam-ammo ti tserman ti sabali pay nga instruktor ti eskuelaan, ni Ulysses Glass. Nangrugi ni Brother Glass a kunkunana: “Ti maika-88 a klase ket maysa a naragsak a klase. Dadduma a klase ket nararagsakda met. Apay, ngarud, a di koma maitan-ok ti ragsakyo?” Impakitana a ti ragsak “ket saan nga isut’ kalat no di ket bunga dagiti umiso nga ar-aramid. Daydiay pamay-an nga idadanon sadiay isut’ mangyeg ti gunggona.” Inadawna ti maysa nga autor a ti biagna nagbalbaliw babaen ti pannakakitana ti sasao a: “Ti panagballigi ket maysa a panagdaliasat, saan nga isut’ pagpatinggaan.” Inkari ti autor nga isardengnan ti mangrukrukod ti ragsak babaen iti pannakagteng kadagiti destinasion imbes a matmatanna ti intero a panagbiagna kas maysa a tuloy-tuloy a panagdaldaliasat. “Awan dalan nga agturong iti ragsak,” kunana. “Ti kinaragsak isut’ dalan.” Kuna ni Kabsat Glass a daytoy a klase naalana ti kababagas dagidiay a sasao. Isut’ nagpatingga babaen kadagiti sasao manipud maika-84 a Salmo ket sana kinuna: “Itultuloyyo ti magna kadagiti nadanum a luglugar.” Aniaman dagiti masabatyo a parikut, sapay koma ta ti kinaragsak a kukua dagidiay agayat ken agbuteng ken Jehova agtultuloy a tagikuaenyo.”
Kalpasanna immayen ti tampok a diskuro ti agsapa, nga imbitla ti sabali pay a miembro ti Bagi a Manarawidwid, ni Karl Klein, a nangpili ti tema a “Panangsukay ti Nakristianuan a Komunikasion.” Rinugianna dayta babaen ti panangipalagipna kadagiti amin a ni Jehova ti naindaklan kadagiti amin a mannakikomunikar. Ti Anakna a bugbugtong, ti Logos, nausar kas Kangrunaan a Pannakangiwat ni Jehova, ket impakaammona ti pagayatan ken bilbilin ti Dios kadagiti naindagaan a parparsua. Idi adda ditoy daga ni Jesus, nagsiddaaw dagiti adu a tattao iti panangisursurona. Dida pay pulos nakangngeg ti tao a nagsao kas kenkuana. Idiay Mateo 28:19, 20, pinaregta ni Jesus dagiti adalanna nga agbalin a nalaing a mannakikomunikar babaen iti ipapanda iti lubong, nga isursuro dagiti bilbilinna kadagiti dadduma ken pagbalinen met ida nga adalan.
Sa, babaen ti panagsaona a direkta kadagiti misionero iti masanguanan, ni Kabsat Klein kunana nga addada uppat a daldalan a rebbeng a pakaseknan koma dagiti misionero maipapan iti panangsukay kadagiti laing ti nasayaat a pannakikomunikar: iti nagbaetan ti asawa a lalaki ken babai, kadagiti dadduma iti pagtaengan ti misionero, kadagidiay adda iti sanga nga opisina a nakaitudinganda, ken kadagidiay masabetda iti tay-ak ti serbisio. “Mangrugikayon a makikomunikar sakbay pay a lukatanyo ti ngiwatyo,” kuna ni Kabsat Klein. “Ti taktakderyo ken panagkawkawesyo ti mangikomunikar kadagiti pangripiripan iti bumalay.” Kalpasanna isut’ nangted ti sumagmamano nga ilustrasion a mangpaneknek ti puntona ket nagpatingga kadagitoy a pammagbaga: “Naemmakay koma. Pagtalinaedenyo a silulukat ti linea ti komunikasion. Pagreggetanyo ti agbalin a nasaysayaat a mannakikomunikar.”
Kalpasan ti pannakaibasa dagiti kablaaw, dagiti diploma ti merito naiyawatda iti tunggal maysa kadagiti nagraduar babaen iti tserman. Kalpasanna ti klase nangipresentar ti maysa a resolusion a naiturong iti Bagi a Manarawidwid ken iti pamilia ti Bethel, a binasa ni Paul Angerville a taga Guadeloupe.
Ti sesion iti malem nangrugi babaen iti Panagadal ti Pagwanawanan. Kalpasan dayta, dagiti estudiante nangiparangda ti programa a nangted gundaway kadagiti agbuybuya a makakita bassit ti atmospera iti pagklaseanda a siled, tapno mapaliiw dagiti impormal a panagtataripnongda kadagiti kukuartoda, ken makangngeg ti adu a kapkapadasanda iti tay-ak nanipud iyaayda idiay Gilead lima a bulan a nasapsapa. Kamudiananna, adda nagpintas a drama nga nga addaan tema a Panangaramid ti Umiso iti Imatang ni Jehova. Ti drama ket inyakto dagiti agibumbunannag a taga Lyndhurst, New Jersey, a Kongregasion. Ti aldaw nagpatingga babaen iti pangserra a kanta, a sinaruno ti kararag nga indauluan ni Fred Franz, ti 96-años a presidente ti Sosiedad.
[Kahon iti panid 27]
ESTATISTIKA TI KLASE
Bilang dagiti pagilian a nairepresentar: 6
Bilang dagiti pagilian a nakaitudingan: 13
Bilang dagiti babbaro: 2
Bilang dagiti kasado: 11
Bilang dagiti estudiante: 24
Promedio nga edad: 32.7
Promedio a tawen iti kinapudno: 14
Promedio a tawen iti amin-tiempo a ministerio: 9
[Ladawan iti panid 26]
Maika-88 a Nagraduar a Klase ti Watchtower Bible School of Gilead
Iti listaan ditoy baba, dagiti intar nanumeruanda manipud sango nga agpalikud ken dagiti nagan nailistada manipud kannigid nga agpakannawan iti kada intar. (1) Magney, D.; Rogers, L.; Foster, S.; Foley, R.; Untch, L.; Jonasson, G. (2) Buri, H.; Buri, B.; Krammer, M.; Hudson, D.; Underkoffler, J. (3) Angerville, P.; Olsson, M.; Jones, A.; Untch, R.; Krammer, A.; Hudson, C. (4) Foley, L.; Magney, J.; Jones, A.; Jonasson, H.; Foster, M.; Rogers, M.; Underkoffler, R.