Dagiti Agraduar iti Gilead Sumrekda iti Makagunggona a Wagas ti Panagbiag
“ANIAN a nagragsak nga okasion daytoy, ti graduasion ti maika-90 a klase ti Gilead!” Kadagidiay a sasao, ti tserman, ni Karl F. Klein iti Bagi a Manarawidwid, impresentarna ti programa ti graduasion. Iti pananglagipna ti panangrugi ti Watchtower Bible School of Gilead, innayonna: “Asinot’ mangipagarup, idi 1943, idi a nagraduar ti umuna a klase ti Gilead nga iti 48 a tawen iti maud-udi agtitipontayo manen para ti sabali pay a panagturpos—ti maika-90?”
Kaskasdi, idi Marso 3, 1991, maysa a di kadawyan a nabara nga aldaw idiay New Jersey, nasurok nga 4,000 a naawis a sangaili ken miembro ti pamilia ti Bethel nagtataripnongda idiay Jersey City Assembly Hall, iti laeng ballasiw ti karayan manipud New York City, para ti panagraduar dagitoy baro a misionero. Sakbay ti iseserrek iti biag ti kinamisionero, immawat dagiti agraduar iti sumagmamano a pammakada a balakad maipapan itoy kabayatan ti aldaw ti graduasionda.
Naluktan ti programa iti maysa a kanta. Kalpasanna, amin a timmabuno natukayda idi a ni Frederick W. Franz, ti 97-tawenna a presidente ti Watchtower Bible School of Gilead, impaayna ti panglukat a kararag. Kalpasanna, idi a naipaayen ti tserman dagiti panglukat a sasao, dagiti agraduar—ken amin a timmabuno—nagimdengda buyogen interes iti agsasaruno nga ababa, praktikal a palawag.
Ni Max H. Larson iti Factory Committee nagsarita nga immuna, iti tema a “Kadua a Trabahador ni Jehova.” Kalpasan ti panangiturongna ti atension iti daong a pakaisalakanan a binangon ni Noe ken ti pamiliana, kinunana: ‘Itattan ur-urnongen ni Jehova ti sangalubongan a pamilia dagiti minilion, ket panggepna nga ilasat daytoy dakkel a pamilia iti dakkel a rigat.’ Kasano? Ay ket, babaen ti moderno-aldaw a daong—ti naespirituan a paraiso! ‘Dakayo,’ pinalagipanna dagiti agraduar, ‘mapankayto iti nagduduma a paset ti daga, a sadiay agbalinkayto a kakadua a trabahador ni Jehova iti panangbangon ti moderno-aldaw a daong.’ Iti panangisagana kadakuada para iti masanguananda, kinunana: ‘Kasapulannat’ panangtrabaho iti biangyo. Kasapulannat’ panaganus. Makasabatkayto kadagiti lapped. Ditoy a kasapulanyonto dagiti paglaingan nga impaay kadakayo ti panagsanayyo.’
Ni Daniel Sydlik, miembro ti Bagi a Manarawidwid, bimmisita iti nabiit pay kadagiti nabayagen a misionero idiay Japan ken Costa Rica. Iti panangipalawagna ti tema a “Ti Adda Kadakayo ket Makagunggona a Wagas ti Panagbiag,” inramanna ti sumagmamano a makatulong a singasing a naalana manipud kadagitoy naballigi a misionero. Maysa a kabsat a babai, inlawlawagna, impasana ti sumagmamano a balakad nga inted kenkuana ti nanangna: ‘Ayatenyo ti serbisio iti tay-ak. Makigayyemkayo kadagiti tattao. Iramanyo ti kabibiagyo kadagiti dadduma, ket kaipapanannanto dayta ti kinaragsak kadakayo.’ Ti sabali pay a kabsat a babai kinunana: ‘Kabayatan ti tawtawen, nasursuromi nga apresiaren a no dikam unay mangnamnama ti dakkel kadagiti sabsabali, saankamto a nalaka a maupay. Ti aniaman a kinaanus ken kinamanagpanunot a mapadasanmi dakkel unay ti kaipapananna kadakami.’ Ti panangiyaplikar ti kasta a balakad ti awan duadua matulongannanto dagiti agraduar a kas naballigi a misionero.
“Naanuskayo koma iti isuamin,” kunaen ti 1 Tesalonica 5:14. Ni Leon Weaver iti Service Department Committee nagkumento iti daytoy a teksto bayat a nagpalawag iti tema a “Naanuskay Koma iti Isuamin a Trabahoyo.” Asinodat’ nairaman iti “amin” a pagan-anusantayo? Insungbat ti nagpalawag: ‘Dagidiay masabatyonto iti tay-ak ti serbisio. Dagiti kakabsat idiay baro a kongregasionyo. Dagiti padayo a misionero. Dagidiay adda iti Sanga. Ti asawayo. Ti bagiyo a mismo.’ Apay aganustayo iti amin a trabahotayo? ‘Kakabsat,’ inlawlawag ti nagpalawag, ‘ti kinaanus pabassitenna ti rigat ken panagdandanag. Ti kinaanus mamagkappia. Ti kinaanus biagenna ti namnama. Ti kinaanus tulongannatayo a mangtaginayon ti rag-otayo iti panagserbi.’
Ni Albert D. Schroeder, miembro ti Bagi a Manarawidwid ken ti orihinal a registrar ti Gilead School, simmaruno a nagsao. Agsarsarita iti tema nga “Itultuloyyo a Suroten ti Modeloyo—ni Jesu-Kristo,” imbatayna dagiti kumentona iti kapitulo 2 ti Filipos. “Salimetmetanyo daytoy a panunot [“Laglagipenyo,” footnote] nga adda kadakayo nga adda met ken Kristo Jesus,” kunaen ti Fil 2 bersikulo 5. ‘Ipakitana daytoy,’ inlawlawag ti nagpalawag, ‘a kasapulantayo ti balanse a panagpampanunot, a kas ken Jesus naaddaan ti balanse a panagpampanunot.’ Iti panangirugina ti Fil 2 bersikulo 6, nangaramid ti makapainteres a panangamiris, nga impakitana a ni Pablo immuna a nangted ti ebidensia a ni Jesus naaddaan ti balanse a panagpampanunot (Fil 2 bersikulo 6-8) ket kalpasanna imbalabalana dagiti wagas a pananggunggona ni Jehova kenkuana gapu iti natulnog a kursona (Fil 2 bersikulo 9-11). ‘Paset daytoy ti pribilehioyo,’ inleppasna, ‘ti panangikasaba ken Apo Jesu-Kristo, a tulongan dagiti dadduma a maaddaan ti isu met la a panunot nga adda kenkuana idi.’
Ania a pammakada a sasao ti impaay dagiti instruktor kadagiti estudianteda? Ni Jack D. Redford nagsao iti tema a “Ti Abilidad nga Agpanunot ti Mangsaluadto Kadakayo.” (Proverbio 2:10, 11) ‘Ita ta rummuarkayon,’ inlawlawagna, ‘ti kinaragsakyo saanto nga agpannuray iti no asinokayo wenno no ania ti adda kadakayo wenno uray ti kinapudno a nagraduarkayo iti Gilead. Ti kinaragsakyo agpannurayto iti no kasano nga agpanunotkayo. No sanayenyo dagiti abilidadyo nga agpanunot ket iyaplikaryo ti pannakaammoyo, naragsakkayto.’ Iti panangipakitana ti kinapateg ti abilidad nga agpanunot, inlawlawagna: ‘Ti nagdumaan ti umiso a tignay ken di umiso a tignay ket ti panagpanunot. Ti panunotenyo ibagana ti aramidenyo.’ Nagleppas ni J. D. Redford kadagitoy a pammaregta a sasao kadagiti estudiante: ‘Nakaad-adu dagiti intelihente a tattao iti lubong a nakapuy nga agpanunot, ket nakaad-adu dagiti tattao iti aberids a kinaintelihente ti nagbalin a nasigo a managpanunot. Gapuna gun-odenyo dayta a kinasigo. Agbalinkay a determinado a mangusar iti isipyo. Usarenyo ti pannakaammoyo. Sarangtenyo dagiti problema. Makilangenkayo kadagiti tattao. Awatenyo ti autoridad. Agbalinkay a nabunga iti trabahoyo. Agibturkayo iti annongenyo.’
Ni Ulysses V. Glass, ti registrar iti eskuelaan, pinilina ti tema a “Saranayen ni Jehova ti Imatayo,” a naibatay idiay Salmo 37:23, 24. ‘Masapul a komendarak daytoy a klase,’ kunana, ‘iti interesda nga agadal.’ Pinalagipanna ida iti sumagmamano kadagiti tulong nga impaay ni Jehova a pangsaranay kadakuada—ti Sao ti Dios, ti matalek ken naannad nga adipen iti sidong ti panangidalan ni Jesus a mangipaay ti kaipapanan ken pannakaawat kadagiti Kasuratan, ti nagduduma a publikasion, dagiti panaggigimong, ken kumbension. ‘Dagiti tulong a nausaryo iti panagadalyo,’ intultuloyna, ‘ket kas da la naespirituan a sarukod. Kasapulantay ida maipaay ti naespirituan a pannakasaranay, ket pagbalinennatay met nga agsao buyogen ti autoridad iti panangiwaragawag iti Sao ti Dios kadagiti dadduma.’ Kas pangleppas isut’ addaan kadagitoy a pammalakad para kadagiti estudiante: ‘No napno ti puspusoyo iti panagayat kadagiti tattao, sumungbatto dagiti nasingpet a puspuso. Naballigikayto iti ministerioyo, ket maammuanyonto a sarsaranayen ni Jehova ti imayo.’
Ti maudi a nagpalawag iti programa iti bigat isu ni Carey W. Barber iti Bagi a Manarawidwid, a nangpili iti tema a “Sumrekkayo iti Nailet a Ruangan.” Iti panagkumentona iti Lucas 13:23, 24, inlawlawagna: ‘Adu ti mangayat kadagiti bendision iti biag, ngem nagbassitan dagiti situtulok nga agregget a sipipinget a manggun-od kadagita.’ Datayo met ngay? ‘Naimbag no saludsodantay ti bagbagitayo, “Aniat’ kaipapananna kaniak a personal ti ladawan ti nailet a ruangan?”’ Dagidiay a mapaay a sumrek iti nailet a ruangan mapaayda, saan a gapu ta imposible dayta, ngem agsipud ta saanda a situtulok nga iyagawa ti bagbagida. ‘Saan nga adu unay ti kalikaguman ni Jehova kadatayo,’ inlawlawag ti nagpalawag. ‘Babaen ti tulong ni Jehova,’ inleppasna, ‘sapay koma ta amintayo ti sirarag-o nga umagawa a sipipinget a sumrek iti nailet a ruangan nga agturong iti baro a lubong ti agnanayon a biag, talna, rag-o, ken kinaragsak, agpaay iti agnanayon a dayag ni Jehova!’
Kalpasan dagitoy a sasao, inyebkas ti tserman dagiti kablaaw a naawat manipud nadumaduma a paset ti daga. Dimtengen ti tiempo para kadagiti agraduar nga umawat kadagiti diplomada. Naggapu dagiti estudiante manipud innem a pagilian—Alemania, Canada, Estados Unidos, Finland, Gran Britania, ken Switzerland. Ti destinoda, nupay kasta, ipanna ida kadagiti daga kas ti Argentina, Benin, Bolivia, Dominican Republic, Papua New Guinea, Peru, St. Lucia, ken Taiwan. Ket kasanot’ panagrikna dagiti nagraduar iti aldaw ti graduasionda? Iti maysa a makatukay a surat a naiturong iti Bagi a Manarawidwid ken iti pamilia ti Bethel, kinunada iti pasetna: “Agtalekkami iti suporta ti Bagi a Manarawidwid, ti pamilia ti Bethel, ken ti intero nga organisasion ni Jehova. Bayat a sanguenminto dagiti suot, dayta a suporta ket banag nga ipatpategminto. Pudno nga agyamankami gapu itoy.”
Kalpasan ti intermision, ti programa iti malem nangrugi iti napaababa a Panagadal iti Pagwanawanan, nga indauluan ni Karl A. Adams. Kalpasan dayta, dagiti estudiante indramada dagiti pudpudno-iti-biag a kapadasan iti panangdanon iti puso iti panangisuro ti Sao ti Dios. Kamaudiananna, amin dagiti timmabuno, agraman dagiti nagraduar iti maika-90 a klase, tinagiragsakda ti naintiempuan a drama a napauluan Liklikanyo dagiti Panagdandanag iti Biag, nga impabuya dagiti lokal nga agibumbunannag.
Ti tserman, ni Karl Klein, nagsao agpaay iti isuamin idi kinunana iti pangserra a sasaona: “Pudno unay a nagsayaat para kadatayo ti naadda iti daytoy maikatlo nga aldaw ti Marso 1991!” Ti nakaay-ayat a programa nagleppas kalpasan ti maysa a pangserra a kanta, a sinaruno ti kararag ni Harold J. Dies.
[Kahon iti panid 27]
Estadistika ti Klase
Bilang dagiti pagilian a nairepresentar: 6
Bilang dagiti pagilian a nakaitudingan: 10
Dagup a bilang dagiti estudiante: 24
Promedio nga edad: 31.2
Promedio a tawen iti kinapudno: 15
Promedio a tawen iti amin-tiempo a ministerio: 11
[Ladawan iti panid 26]
Ti Maika-90 a Nagraduar a Klase ti Watchtower Bible School of Gilead
Iti listaan ditoy baba, dagiti intar nanumeruanda manipud sango nga agpalikud ken dagiti nagan nailistada manipud kannigid nga agpakannawan iti kada intar. (1) Miller, M.; Helenius, S.; Marsh, L.; Kleeman, A.; Loosli, Y.; Nizan, H. (2) Skogen, R.; Nutter, D.; Noack, E.; Diehl, L.; Hair, J. (3) Marsh, C.; Helenius, H.; Loosli, M.; Danio, A.; Danio A.; Nizan, D. (4) Miller, L.; Noack, J.; Hair, L.; Kleeman, W.; Skogen, D.; Diehl, S.; Nutter, W.