Dagiti Nagturpos iti Gilead Awatenda ti Sagut a Misionero a Serbisio
IDI MARSO 1, 1992, dagiti 22 a kameng ti maika-92 nga agturpos a klase ti Watchtower Bible School of Gilead immawatda iti maysa a sagut—ti sagut a misionero a serbisio. Idi nagpalawag iti klase, kuna ni Lloyd Barry ti Bagi a Manarawidwid: “Sapay koma ta awatenyo dayta a nakaskasdaaw a sagut buyogen dakkel a rag-o, ket sapay koma ta usarenyo dayta iti panangiyeg rag-o kadagiti sabsabali.”
Agarup 4,662 a naawis a sangaili ken kameng ti pamilia ti Bethel ti nagtitipon idiay Jersey City Assembly Hall, idiay New Jersey, maipaay iti programa ti panagturpos. Sabali pay a 970 ti nagdengngeg kadagiti pasilidad ti Watchtower Society idiay Brooklyn, Wallkill, ken Patterson idiay Nueva York babaen iti telepono. Amin ti siaannad a nagimdeng bayat a naikkan dagiti nagturpos kadagiti pammakada a balakad a tumulong kadakuada a mangtagipateg unay iti sagut a misionero a serbisio ken tapno sisisirib nga usarenda dayta.
Nanglukat ti programa babaen nabara a pannakakanta ti kanta numero 155, “‘Agiinnawatkayo’!” Kalpasanna, natignay ti amin bayat a ni Frederick W. Franz, ti 98 ti tawenna a presidente ti Eskuelaan ti Gilead, nangidatag iti naimpusuan a kararag. Kalpasanna, ti tserman, ni Carey Barber ti Bagi a Manarawidwid, inabrasana ti amin iti programa ti panagturpos ken kunana: “Pulos nga awan pay idit’ dakdakkel a pagkasapulan kadagiti misionero ngem ita.” Kalpasan dagiti kumentona, inyam-ammona ti maysa a serie dagiti ababa, makatulong a palawag.
Ni Curtis Johnson ti Bethel Home Committee ti immuna a nagsao, a binukelna ti tema a “Taripatuenyo a Naimbag ti Hardinyo.” Kuna ni Kabsat Johnson a no maala dagitoy a kabbaro a misionero dagiti pakaitudinganda, tunggal maysa kadakuada ti maaddaan naespirituan a hardin a kultibarenna. (1 Corinto 3:9) Ti ili ni Jehova iti intero a lubong ket naespirituan a hardin nga agpatpatarubo iti kinalinteg ken dayaw iti sango amin dagiti nasnasion. (Isaias 61:11) ‘No kasanoyo a taripatuen ti naespirituan a hardinyo iti masanguanan,’ impaganetget ti nagpalawag, ‘apektarannanto unay ti balligiyo iti pakaitudinganyo kas misionero.’ Aniat’ tumulong kadakuada a mangtaripato a naimbag iti naespirituan a hardinda? ‘Ni Jehova makapagbalin a nakired a salaknib iti aglawlaw ti naespirituan a hardinyo. No determinadokayo a mangsukay kadagiti nalinteg nga ar-aramid, agtalinaed a nasinged kenkuana iti kararag, ken kalpasanna agaramid a maitunos kadagiti kararagyo.’
Simmaruno, nagpalawag ni Lloyd Barry iti tema a “Kanayon nga Agrag-o iti Apo.” (Filipos 4:4) Buyogen nasurok a 25 a tawen a kapadasan ti kinamisionero idiay Japan a pagadawanna, isut’ naaddaan sumagmamano a praktikal a singasing tapno tulonganna dagiti nagturpos a mangtagiragsak iti sagut a misionero a serbisio. Kunana: ‘Matakuatanyonto a ti rag-o nga adda kadakayo iti serbisio ti Dios tulongannakayo a mangparmek iti adu kadagiti pakapadagsenan ken nalabit dadduma kadagiti pisikal a parikut a pakaipasanguanyo.’ (Proverbio 17:22) Pinalagipanna dagiti nagturpos a mabalin a makapasarda kadagiti kondision ken kasasaad a naiduma unay manipud kadagiti nakairuamanda. Mabalin a kasapulanda a sursuruen ti maysa a baro a pagsasao. ‘Kasapulan nga ikarigatanyo nga adalen ti pagsasao. Ngem no kabaelanyo ti siwayawaya a makikomunikar kadagiti tattao iti bukodda a pagsasao, daytoy mangnayon met iti rag-oyo.’
Iti panangbukelna iti tema a “Pagtalinaedenyo dagiti Matayo iti Gunggona,” simmaruno a nagpalawag ni Eldor Timm ti Factory Committee. Ania ti gunggona? Biag nga agnanayon! Tapno maragpat dayta masapul a pagtalinaedentayo a naipamaysa dagiti matatayo iti dayta. Sinalaysay ti nagpalawag ti sumagmamano kadagiti pagaspingan ken pagdumaan dagiti Kristiano a makilumlumba agpaay iti biag ken dagiti tumataray kadagiti atletiko a pannakisalip idi umuna a siglo. Kas kadagiti tumataray, dagiti Kristiano masapul nga agsanayda a sipipigsa, tungpalenda dagiti paglintegan, ken warwaranda dagiti bagbagida kadagiti nadagsen a babantot. Ngem saan a kas kadagiti literal a tumataray, dagiti Kristiano addada iti tungpal-biag a lumba ken pagreggetanda ti maysa a gunggona nga agnanayon. Imbes nga adda laeng maymaysa a mangabak, isuamin a mangtaray iti lumba agpaay iti biag agingga iti kalat awatennanto ti gunggona. Ingngudo ni Kabsat Timm: “Tapno maragpat ti gunggona ti biag, masapul a makikappiatayo ken Jehova, ti Manangted iti gunggona. Ket tapno makikappia ken Jehova, masapul a makikappiatayo kadagiti kakabsattayo.’
Ni Milton Henschel ti Bagi a Manarawidwid simmaganad a nagpalawag iti tema a “Baeten Liwliwa Manipud kadagiti Kasuratan, Addaantayo ti Inanama.” (Roma 15:4) ‘Iti naudi a lima a bulan,’ inrugi ti nagpalawag, ‘naagawakayo iti Biblia. Naipasdeken ti maysa a dakkel a kinasinged. Addaankayo iti nabileg nga inanama. Bayat a rummuarkayo agturong kadagiti pakaitudinganyo, pangngaasiyo ta laglagipenyo no apay a nabileg ti inanamayo. Daytat’ gapu ta nagtalinaedkayo a nasinged kadagiti Kasuratan.’ Tapno mangipakita iti maysa a pangarigan ti salaysay ti Biblia a mangiyeg inanama, tinukoy ti nagpalawag ti Oc-ocom kapitulo 6 aginggat’ 8, a mangipalagip no kasano a ni Gideon ket nakomisionan a mangisalakan iti Israel manipud panangparigat dagiti Midianita. Kalpasan panangilawlawagna iti salaysay ken ti kinapategna iti kaaldawantayo, kunana: ‘No addaankayo iti gundaway a makaasideg kadagiti Kasuratan ken agpanunot maipapan kadagitoy a banag, daytat’ mangrepresko kadakayo. Makagun-odkayo ti tured.’
Magagaran ti amin a dumngeg no ania a pammakada a balakad ti ited dagiti dua a kangrunaan nga instruktor ti eskuelaan kadagiti estudiante. Immuna a nagpalawag ni Jack Redford iti tema nga “Aramidenyo ti Umiso a Banag.” Pinalagipanna dagiti nagturpos: ‘Idiay Gilead nasanaykayo a naimbag no ania ti umiso sigun kadagiti Kasuratan. Ita mapankayo kadagiti makakarit a misionero a pakaitudingan. Ket ammomi a nalabit makasarakkayonto kadagiti narikut a problema. Agpapan pay itoy, ken agpapan pay bukodyo a rikrikna, ammomi a maaramidanyo ti umiso a banag.’ Aniat’ tumulong? Maysa a banag, isu ti kaadda ti umiso a panangmatmat kadagiti sabsabali. Kuna ti nagpalawag: ‘Dikay inanamaen ti kinaperpekto manipud kinaimperpekto.’ Ti kaadda ti umiso a panangmatmat kadagiti makasuot a kasasaad ti makatulong met. ‘Addaantayo amin kadagiti ragsak ken ladingit iti biag,’ kunana. ‘Asinoman matamingna dagiti ragsak. No kasanoyo a tamingen dagiti ladingit isu ti mangikeddeng no makaandurkayo iti misionero a serbisio.’—Santiago 1:2-4.
Ti registrador ti eskuelaan, ni Ulysses Glass, pinilina ti tema nga “Aniat’ Namnama para iti Masanguanan?” Iti naamaan a tonada, pinaregtana dagiti nagturpos a salimetmetanda a nasged ti inanamada. (Proverbio 13:12) ‘Ti panangrugi ti pannakapukaw ti inanama ket mabalin a saan a madlaw,’ inlawlawagna. ‘Dagiti kasasaad mabalin a pagbalinendatayo nga okupado kadagiti bagbagitayo imbes nga iti pannakirelasiontayo iti Dios. Nalabit nga agsakittayo wenno mariknatayo a di-umisot’ panangtrato kadatayo dagiti sabsabali. Dadduma ti mabalin nga addaan ad-adu a material a bambanag ngem kadatayo wenno mabalin a makagun-od kadagiti nasaysayaat a resulta iti ministerio, ket mabalin a medio agimuntayo. No palubosantayo dagiti kakasta a bambanag nga agin-inut a manglapunos kadatayo, di agbayag ti kinaagpayso ti namnama ti Pagarian ket agkupasto iti puso ken isiptayo, ket mabalin nga uraytayto la sumardeng nga agibtur iti lumba agpaay iti biag.’ Aniat’ maaramidan? ‘Masapul a maaramid ti positibo a tignay no kayattayo a paungaren ti namnamatayo. Masapul a punuentayo dagiti pampanunot ken puspusotayo kadagiti sigurado a kari ti Dios ken iturongtayo ti naan-anay nga asikasotayo iti kinapudno ti Pagarian ti Dios. Ken masapul nga isublitayo ti komunikasiontayo ken Jehova, ta sigurado a mangituggod daytoy iti rag-o.’
Ni Karl Klein ti Bagi a Manarawidwid impaayna ti palawag iti panagturpos. Ti temana ket “Apay Agbalin a Napakumbaba?” Ket aniat’ sungbat iti dayta a saludsod? ‘Agsipud ta isu dayta ti umiso ken nalinteg a banag nga aramiden, ti nainsiriban ken naayat a banag nga aramiden,’ inlawlawagna kadagiti panglukat a sasaona. Nakayawan dagiti dumdumngeg bayat a sinalaysayna dagiti uppat nga ulidan ti kinapakumbaba a nasayaat a tuladentayo met: (1) Ni Jehova a Dios, a napakumbaba la ketdi idi nakilangen ken Abraham ken Moises (Genesis 18:22-23; Numeros 14:11-21; Efeso 5:1); (2) ni Jesu-Kristo, nga ‘impababana ti bagina ket nagtulnog agingga ken patay iti kayo a pagtutuokan’ (Filipos 2:5-8; 1 Pedro 2:21); (3) ni apostol Pablo, isu a ‘nagpaadipen iti Apo buyogen kadakkelan a kinapakumbaba ti isip’ (Aramid 20:18, 19; 1 Corinto 11:1); ken (4) ‘dagidiay mangidadaulo kadatayo,’ kas ti immuna a presidente ti Sosiedad, ni Kabsat Russell, a naminsan nagsurat: “Ti trabaho a nakaay-ayuan ti Apo a pangusaran kadagiti nanumo a laingtayo ket saan a trabaho a datayo ti nangpataud no di ket trabaho nga ibangbangontayo manen, pabpabaruentayo, ken pagtutunosentayo.” (Hebreo 13:7) Imbalabala ni Kabsat Klein dagiti ad-adda pay a nabileg a rason iti panagbalin a napakumbaba. Sigurado, ti panangipangag iti balakad nga agbalin a napakumbaba tulonganna dagiti nagturpos a mangaramid iti nainsiriban a panangusar iti sagut a misionero a serbisio!
Kalpasan dagidiay a kumento, inranud ti tserman dagiti kablaaw a naawat manipud nagduduma a paset ti daga. Dimtengen ti tiempo ti iyaawat dagiti nagturpos kadagiti diplomada. Naggapuda manipud pito a pagilian—Canada, Finland, Francia, Mauritius, ti Netherlands, Sweden, ken ti Estados Unidos. Ngem dagiti pagmisioneroan a pakaitudinganda ti mangipan kadakuada kadagiti 11 a pagilian—Bolivia, Estonia, Grenada, Guatemala, Honduras, Hungary, Mauritius, Peru, Togo, Turkey, ken Venezuela.
Kalpasan maysa a baet ti programa, nangrugi ti programa iti malem babaen napaababa a Panagadal ti Pagwanawanan nga indauluan ni Joel Adams ti Service Department Committee. Kalpasan dayta, impabuya dagiti nagturpos dagiti sumagmamano a kapadasan iti tay-ak ti serbisio a tinagiragsakda kabayatan ti panawen ti panageskuelada. Kamaudiananna, ti drama nga Apay Raemen ti Teokratiko nga Urnos? ket naiparang agpaay iti pannakapakired ti intero a dumdumngeg, agraman dagiti nagturpos.
Pudno unay, dagitoy a nagturpos pimmanawda agturong kadagiti ganggannaet a nakaitudinganda buyogen balakad ken pammaregta a tumulong kadakuada a mangaramat iti sagut ti misionero a serbisio tapno mangiyeg rag-o saan laeng a kadagiti bagbagida no di ket kadagiti met sabsabali.
[Tsart iti panid 22]
Estadistika ti Klase
Bilang dagiti pagilian a nairepresentar: 7
Bilang dagiti pagilian a nakaitudingan: 11
Dagup a bilang dagiti estudiante: 22
Promedio nga edad: 33.4
Promedio a tawen iti kinapudno: 16.7
Promedio a tawen iti amin-tiempo a ministerio: 11.8
[Ladawan iti panid 23]
Ti Maika-92 a Nagturpos a Klase ti Watchtower Bible School of Gilead
Iti listaan ditoy baba, dagiti intar nanumeruanda manipud sango nga agpalikud ken dagiti nagan nailistada manipud kannigid nga agpakannawan iti kada intar.
(1) Chan Chin Wah, M.; Bouancheaux, N.; Chapman, B.; Östberg, A.; Cole, L.; Jackson, K.; Meerwijk, A. (2) Smith, J.; Wollin, K.; Chapman, R.; Gabour, N.; Chan Chin Wah, J.; Smith, C.; Edvik, L. (3) Bouancheaux, E.; Östberg, S.; Cole, K.; Jackson, R.; Gabour, S.; Edvik, V.; Meerwijk, R.; Wollin, G.