Ti Panagpayunir ti Kalsada nga Agturong iti Paraiso
ITI maysa a nasin-aw, nalamiis nga aldaw iti Marso idiay New Jersey, agarup 4,300 ti nagtitipon idiay Jersey City Assembly Hall of Jehovah’s Witnesses. Naggapuda kadagiti amin nga Estados Unidos ken kasta met kadagiti adu a dadduma a pagpagilian. Daytoy a naisangsangayan a gimong ti natignay babaen kadagiti paspasamak a naaramid 43 a tawtawenen ti napalabas idi a maysa a naisangsangayan nga eskuelaan a pagsanayan kadagiti misionero ti naipasdek iti sidong ti panangimaton ti agdama idi a presidente iti Watch Tower Bible and Tract Society, ni Nathan H. Knorr.
Daytoy a gimong iti Marso isu ti graduasion ti maika-80 a klase iti Watchtower Bible School of Gilead. Ngem ania ti nanggutugot iti kasta a bunggoy nga umay a maipaay iti graduasion? Dayta ti manamnama a kasasaad ti programa.
Dagiti Kababalin ti Misionero—Ti Tulbek iti Balligi
Ti tsirman iti programa isu ni Karl Klein, maysa a miembro iti Manarawidwid a Bagi dagiti Saksi ni Jehova. Inyam-ammona ti umuna a nagpalawag, ti dati a misionero idiay Japan, ni Lloyd Barry, ken itan maysan a miembro iti Manarawidwid a Bagi, a nagsao maipapan iti tema nga “Iti Pammatiyo Inayonyo dagiti Ar-aramid.” Isut’ namalakad: ‘Kalpasan ti lima a bulan a nainget a pannakasanay iti Gilead, ti ayat ken pammatiyo masapul nga addan iti kangitingitan. Itan, bayat a mapankayo kadagiti destinoyo, masapul nga inayonyo dagiti ar-aramid.’ (Santiago 2:22, 23) Kinunana a kas ken Jehova masapul a ‘bumangonda a masapa’ ket usarenda a naimbag ti intero nga aldaw iti serbisioda.—Jeremias 7:25.
Ni Daniel Sydlik, sabali pay a miembro iti Manarawidwid a Bagi, nangted iti makaparegta a balakad maipapan iti tema a “Masukayanyo ti Umiso a Kababalin.” Iti aniaman a kasasaad, kinunana, mabalin nga alaenyo ti positibo wenno negatibo a kababalin. Babaen ti panangibatayna ti komentona iti Malakias 3:15, 16, inyilustrarna no kasano kalaka ti makasarak kadagiti pagbiddutan iti kabbaro a pagilian. “Nabannayatkay koma a mangsapul iti pagbiddutan,” intuloyna a kinuna. “Maaddaankay koma iti naragsak a kababalin a bendisionanto ni Jehova.”
Dagiti dadduma a nagpalawag, agraman ni Ulysses Glass, ti rehistrador iti eskuelaan, impaganetgetna ti pannakasapul ti panagibtur, pannakapnek iti maaramidan, ken kinatured. Ni Jack Redford, dati a misionero ken maysa kadagiti mannursuro iti eskuelaan, nangted iti praktikal a balakad maipapan iti panagtalinaed a mannakaawat. Laglagipenyo, kinunana, a “dagiti mamasirib balbaliwanda dagiti panunotda, dagiti maag pulos a dida baliwan ti panunotda!” Gapuna binalakadanna dagiti kabbaro a misionero nga ibagayda ti bagbagida a kas ni apostol Pablo, nga ad-adawen pay dagiti lokal a bumiberso. (Aramid 17:28) “Agsabongkayo iti nakaimulaanyo. . . . Agtalinaedkayo a mannakaawat ken managparabur,” kinunana iti panagserrana.
Ti kangrunaan a palawag ti graduasion ti inted ti presidente ti Watch Tower Society, ni Frederick W. Franz, nga itan 92 añosnan. Babaen iti tema a “Ti Panagpayunir Itan Maysa a Kalsada nga Agsubli iti Paraiso Ditoy Daga,” linagipna ti pannakaibangon ti Gilead School, “maysa nga ubing iti gubat ken anak iti pammati” a nangrugi iti tengnga iti Gubat Sangalubongan II. Babaen ti panangusarna iti Isaias 62:10 kas temana a teksto, impakitana no kasano a dagitoy a kabbaro a misionero makipasetdanto iti daytoy a dakkel a trabaho a panangibangon iti naglawaan, natibker a kalsada isu a dagiti kabbaro iti pudno a panagdayaw makapagnada nga agturong iti naisublin a Paraiso. Tapno serraan ti programa iti agsapa, naiyawat dagiti diploma kadagiti 24 a graduado.
Ti sesion iti malem iramanna ti maysa a makaliwliwa a panangrepaso dagiti nagraduar kadagiti bambanag a nasursuroda idiay eskuelaan, agraman ti pakpakauna dagiti masanguanan a karit a sanguendanto. Ti programa nagpatingga babaen iti naan-anay a nakawesan a drama iti Biblia a nakalawlawag a nangiyilustrar no kasano a ni Rahab, ken kalpasanna dagiti Gabaonitas, nangipakitada iti pammati a nangiturong iti pannakaisalakanda.—Josue, kapitulo 2 agingga iti 6 ken 9.
Mairaman kadagiti 24 a nagraduar iti daytoy a maika-80 a klase iti Gilead School, ti nakagupgopan a 6,234 a misionero ti napanen iti isuamin a lubong a mangidaulo iti trabaho a panangasaba kas panangtungpal iti Mateo 24:14.