“Sukimatenyo ti Bagbagiyo No Addakayo iti Pammati”
Dagiti Tampok Manipud Maikadua a Corinto
NI APOSTOL Pablo maseknan maipapan kadagiti Kristiano idiay Corinto. Kasanodanto a matmatan ti balakad a naited iti umuna a suratna kadakuada? Isut’ adda idiay Macedonia idi simmangpet ni Tito nga addaan paborable a report a ti surat pinagladingitna dagiti taga Corinto iti panagbabawi. Anian ti panangparagsak dayta ken Pablo!—2 Corinto 7:8-13.
Insurat ni Pablo ti Maikadua a Corinto manipud Macedonia, nalabit kalpasan ti ngalay ti tawen 55 K.P. Iti daytoy a surat, sinalaysayna dagiti addang nga alaen tapno masalimetmetan ti kinadalus ti kongregasion, a pinabilegna ti tarigagay a tumulong kadagiti napanglaw a manamati idiay Judea, ken indepensana ti kina-apostolna. Kaaduan kadagiti naikuna ni Pablo tulongannatayo a ‘mangsukimat ti bagbagitayo no addatayo pay met laeng iti pammati.’ (13:5) Gapuna, aniat’ maadawtayo manipud itoy a surat?
Ministro iti Dios ti Liwliwa
Impakita ti apostol a bayat a ti Dios liwliwaennatayo iti amin a pakarigatantayo, rebbeng a liwliwaentayo met dagiti dadduma ken ikararagantay ida. (1:1–2:11) Nupay adda ni Pablo ken dagiti kakaduana iti nakaro a pannakalipit, inggaga ti Dios ida. Kaskasdi, makatulong dagiti taga Corinto babaen iti panangikarkararag kadakuada, kas met ti panangikarkararagtayo kadagiti dadduma a mangabrasa iti pudno a pammati. Ngem daydiay ngay imoral a tao a nadakamat idiay 1 Corinto kapitulo 5? Nalabit isut’ nailaksid ngem nagbabawi. Anian ti pannakaliwliwana idi dagiti taga Corinto inyawatda ti panangpakawan ket siaayat nga insublida iti tengngada.
Ti sasao ni Pablo parang-ayenna ti panangapresiartayo iti Nakristianuan a ministerio, a papigsaenna ti takdertayo iti pudno a pammati. (2:12–6:10) Apay, dagiti ministro ti baro a tulag addaandat’ pribilehio a “mairaman iti naballigi a prusision” a ti Dios ti mangidadaulo! Ni Pablo ken dagiti katrabahuanna ti addaan nasudi a ministerio gapu iti asi a naipakita kadakuada. Kas kadakuada, dagiti agdama a napulotan addaandat’ ministerio ti pannakikappia. Kaskasdi, amin dagiti Saksi ni Jehova pabaknangenda dagiti dadduma babaen iti ministerioda.
An-anayenyo ti Kinasanto ken Managparaburkayo
Impakita ni Pablo a dagiti Kristiano a ministro masapul nga an-anayenda ti kinasanto iti panagbuteng ken Jehova. (6:11–7:16) No agtakdertayo a sititibker iti pammati, masapul a liklikantay ti pannakaisangol kadagiti di mamati, ken masapul nga agdalustayo kadagiti pakatulawan ti lasag ken espiritu. Dagiti taga Corinto nagdalusda babaen ti panangilaksid iti imoral a managdakdakes, ket naragsakan ni Pablo a ti immuna a suratna pinagladingitna ida a nangiturong iti panagbabawi a maipaay iti pannakaisalakan.
Naammuantay met a dagiti ministro a managbuteng iti Dios nagunggonaanda gaput’ kinamanagparaburda. (8:1–9:15) Maipapan iti tulong kadagiti napanglaw a “sasanto,” insitar ni Pablo ti nagsayaat nga ulidan dagiti taga Macedonia. Isudat’ managparabur iti nasursurok ngem ti abilidadda, ket nangnamnama a makitana ti isu met laeng a kinamanagparabur iti biang dagiti taga Corinto. Ti panangtedda—ken ti panangtedtayo—rebbeng nga agaon iti puso, ta “ti Dios ayatenna ti mangted a siaayat” ken pabaknangenna ti ilina iti isuamin a kita ti kinamanagparabur.
Ni Pablo—Maysa a Managayat nga Apostol
No adda aniaman a magapuanantayo iti serbisio ni Jehova kas dagiti ministro, agpannakkeltayo koma kenkuana, saan nga iti bagbagitayo. (10:1–12:13) Tutal, babaen laeng kadagiti naespirituan nga igam a “mannakabalin iti Dios” a mabalintay a dupraken dagiti ulbod a panagrasrason. Dagiti natatangsit a “sinan apostol” kadagiti taga Corinto dida pulos maartapan ti rekord ti panagibtur ni Pablo kas ministro ni Kristo. Kaskasdi, tapno di aglablabes ti pannakaitan-okna, saan nga inikkat ti Dios ti “siitna iti lasag”—nalabit ti nakapuy a panagkitana wenno dagidiay ulbod nga apostol. Imbes ketdi maipasindayag latta ni Pablo ti kinakapuyna tapno “ti pannakabalin ni Kristo” agtalinaed kenkuana kas maysa a tolda. Kas maysa a tao a nagtakder a sititibker iti pammati, isut’ saan a nakapkapuy ngem kadagiti sinan apostol. Nakita dagiti taga Corinto dagiti pammaneknek a pinataud ti kina-apostol ni Pablo kadakuada “babaen ti isuamin a panaganus, babaen kadagiti pagilasinan ken datdatlag ken nadumaduma a kita ti pannakabalin.”
Kas ministro ken apostol, adda iti puso ni Pablo dagiti naespirituan nga intereses dagiti kapammatianna, kas rebbeng nga adda met kadatayo. (12:14–13:14) Isu ‘ti siaayat nga aggasto a naan-anay gapu kadagiti karkararuada.’ Ngem agamak ni Pablo di la ket ta inton makasangpet idiay Corinto, makakitanto ti sumagmamano a di nagbabawi kadagiti ar-aramid ti lasag. Gapuna, binagbagaanna amin a sukimatenda a kanayon no addada pay iti pammati ken inkararag a “saan[da] koma nga agaramid ti dakes.” Iti panangserra, inggunamgunamna kadakuada nga agrag-oda, a mabaliwanda ken maliwliwada, nga agpanunotda a sangsangkamaysa, ken agbiagda a sitatalna. Anian a nagsayaat met a pammalakad kadatayo!
Itultuloyyo ti Panangsuot!
Gapuna isingasing ti maikadua a surat ni Pablo kadagiti Kristiano a taga Corinto ti nadumaduma a pamay-an a panangitultuloy a panangsuot no addatay pay met laeng iti pammati. Pudno unay a dagiti sasaona rebbeng koma a tignayennatayo a mangliwliwa kadagiti dadduma, kas met ti panangliwliwa ti Dios kadatayo kadagiti amin a pakarigrigatantayo. Ti kinuna ti apostol maipapan iti Nakristianuan a ministerio rebbeng a gutugotennatayo a mangibaklay a simamatalek iti dayta bayat nga an-anayentayo ti kinasanto iti panagbuteng ken Jehova.
Ti panangiyaplikar ti balakad ni Pablo pagbalinennatayo koma met a managparabur ken natulong. Kaskasdi, ti sasaona tignayennatay koma nga agpasindayag gapu ken Jehova, saan nga iti bagitayo. Padakkelenda koma ti naayat a pannakaseknantay kadagiti kapammatiantayo. Ket pudno unay a dagitoy ken dadduma pay a punto iti Maikadua a Corinto makatulongda kadatayo nga ‘itultuloy a sukimaten no addatayo iti pammati.’
[Kahon/Ladawan iti panid 26]
ISARMING TI DAYAG NI JEHOVA: Idi simmalog ni Moises manipud Bantay Sinai nga addaan kadagiti taptapi ti Pammaneknek, ti rupana rimmaniag gapu ta ti Dios nakisao kenkuana. (Exodo 34:29, 30) Dinakamat ni Pablo daytoy ket kinunana: “Ngem datay amin, ti rupatayo awan abbongna ket kasla sarming nga ipakpakitatayo ti dayag ni Jehova, agbalintayo nga umasping met la kenkuana, a mapadayagtayo a mapadayag kas naggapu iti Espiritu ni Jehova.” (2 Corinto 3:7-18) Dagiti maig-iggaman a sarming idi un-unana naaramidda kadagiti metal kas ti bronse wenno gambang ken napasilengda un-unay tapno maaddaanda ti nasayaat a mapagsarmingan a rabaw. Kas dagiti sarming, isarsarming dagiti napulotan ti dayag ti Dios a sumilnag kadakuada manipud ken Jesu-Kristo, nga agin-inut a ‘mangbalbaliw kadakuada iti langa’ nga ipaay ti mangisarsarming-dayag nga Anak ni Jehova. (2 Corinto 4:6; Efeso 5:1) Babaen ti nasantuan nga espiritu ken iti Kasuratan, partuaten ti Dios kadakuada “ti baro a personalidad,” a mangisarming kadagiti bukodna a kualidad. (Efeso 4:24; Colosas 3:10) Nailangitan wenno naindagaan man ti namnamatayo, sapay koma ta iparangarangtayo dayta a personalidad ken patgentay ti pribilehio a mangisarming ti dayag ti Dios iti ministeriotayo.
[Kahon/Ladawan iti panid 27]
“DAGITI KABAL TI KINALINTEG”: Maysa a pamay-an a nangirekomendaran ni Pablo ken dagiti katulonganna iti bagbagida kas dagiti ministro ti Dios ket babaen “iti kabal ti kinalinteg iti makannawan ken iti makatigid.” (2 Corinto 6:3-7) Ti kannawan maus-usar idi a mangiggem ti kampilan, ket ti kannigid isut’ mangiggem iti kalasag. Nupay madarupda manipud amin a paset, sikakabal da Pablo ken dagiti kakaduana a maipaay iti naespirituan a pannakibakal. Daytat’ nadangadang kontra kadagiti ulbod a mannursuro ken “dagiti sinan apostol” tapno ti kongregasion idiay Corinto saanda a maipanaw manipud debosion ken Kristo. Saan a nagtungpal ni Pablo kadagiti igam ti managbasol a lasag—ti panagulbod, allilaw, wenno kinasikap. (2 Corinto 10:8-10; 11:3, 12-14; 12:11, 16) Imbes ketdi, “dagiti kabal” a nausar ket kinalinteg, wenno kinahustisia, dagiti pamay-an a panangiyadelantar ti pudno a panagdayaw maibusor iti amin a panangduprak. Us-usaren itatta dagiti Saksi ni Jehova dagita a “kabal ti kinalinteg” a maipaay iti isu met laeng a panggep.