“Iti Prusision ti Balligi”
TI PRUSISION ti balligi ket maysa idi a naisangsangayan a panangrambak ti panagballigi iti maysa a kabusor. Maysa kadagiti kangatuan a dayaw nga ipaay ti Senado a Romano iti manangparmek a heneral isut’ panangipalubos kenkuana a selebraran ti panagbiktoriana iti kasta a pormal, nakangingngina a prusision. Dinakamat ni apostol Pablo a namindua ti prusision ti balligi kadagiti sursuratna. Ngem, sakbay nga usigentayo dagiti sasaona, padpadasenyo nga iladawan iti panunotyo ti kasta a prusision. Arapaapenyo ti umariwekwek a nanglinea kadagiti lansangan bayat a daytat’ agin-innayad a lumabas idiay Via Triumphalis ken sumang-at iti agsikko-sikko a dalan agturong iti templo ni Jupiter iti tuktok ti Turod Capitolino ti Roma.
“Dagiti nabanglo a sayamusom manipud kadagiti mapupuoran a rekado maiwarasda nga aglaplapusanan a lumasat kadagiti templo ken iti igid dagiti lansangan, a mangpunno iti angin iti bangloda,” insurat ni eskolar a James M. Freeman. “Iti prusision adda ti senado ken dagiti kangrunaan nga umili ti estado, a babaen iti presensiada padayawanda ti nangkonkista. Dagiti kabaknangan a samsam ti gubat, kas iti balitok, pirak, amin a kita ti ig-igam, dagiti bandera, dagiti natakkon ken nangingina nga ar-aramid ti arte, ken isuamin a pagarupen ti manangkonkista wenno ti naparmek a kapapatgan, naawitda a makitkita ti napekpek a siudad. Dagiti preso ti gubat mapilitanda met nga agmartsa iti prusision. Ti heneral, a ti panagballigi naikeddeng a pakaidayawanna, naglugan iti maysa a karuahe nga isut’ gagangay a porma ken guyguyoden dagiti uppat a kabayo. Ti kawesna nabordaan ti balitok, ket ti tunikana kadagiti sabsabong. Iti kannawanna isut’ sanga ti laurel, ket iti kannigidna adda maysa a setro; bayat nga iti mugingna adda korona ti Delphic a laurel. Iti tengnga ti panagpukpukkaw dagiti soldado ken panagsipat dagiti umili ti konkistador naibagkat kadagiti lanlansangan agingga idiay templo ni Jupiter, a sadiay napuoran dagiti datdaton, ket kalpasanna adda ti panagpiesta ti publiko idiay templo.”
Inusar ni Pablo ti prusision ti balligi kas pangngarig idi insuratna ti maikadua a suratna kadagiti Kristiano idiay Corinto idi tawen 55 ti Kadawyan a Panawentayo. Kunana: “Ngem yaman pay iti Dios isu a kanayon a mangiturong kadakami iti prusision ti balligi a makikadua ken Kristo ket gapu iti pannakaaramatmi iparangarangna ti sayamusom ti pannakaammo kenkuana met laeng iti isuamin a disso! Ta iti Dios dakami ti maysa a makaay-ayo a banglo ni Kristo kadagiti maisalakan ken kadagiti mapukaw; kadagiti naud-udi dakami ti angot ni patay a maipaay iti patay, ket kadagiti immun-una dakami ti banglo ti biag a maipaay iti biag.”—2 Corinto 2:14-16.
Ditoy ni Pablo ken dagiti dadduma a napulotan a Kristiano naiparangarangda kas napeklan nga iturayan ti Dios, “a makikadua ken Kristo.” Nailadawanda kas annak, kakapitan, ken dagiti soldado a sumursurot iti parada ni Jehova ken isut’ mangiturturong iti prusision ti balligi a magmagna iti nabangbangluan a ruta. (Kitaenyo Ti Pagwanawanan, Hulio 15, 1990, pinanid 10-15.) Daytoy makaiyilustrar a pannakausar ti kasta a prusision ipamatmatna met a dagidiay mangilaksid ti naimbag a damag ti Pagarian ti Dios mainanamada laeng ti ipapatay. Ngem anian a naiduma kadagiti napulotan a paspasurot ni Jesus! Addaandat’ namnama ti pannakaisalakan nga agturong iti imortal a nailangitan a biag a kadua ni Kristo. Ket dagiti met ngay nasungdo a kakaduada, a dedikado met iti Dios? Addaanda met ti naragsak a namnama ti biag iti naindagaan a paraiso, a sadiay ti Dios “punasennanto ti amin a lulua kadagiti matada, ket awanton ni patay, ket awanto metten ti sasaibbek wenno sangsangit wenno rigrigat.” (Apocalipsis 21:1-4; Lucas 23:43) Pasetkay aya daytoy naragsak a bunggoy?
Maysa a naiduma a ladawan ti naiparang idiay Colosas 2:15, a sadiay insurat ni Pablo: “Idi nga inabakna dagiti kinaturay ken dagiti pannakabalin, [ti Dios] imparangna iti napatak ti panagballigina kadakuada kas naparmek, nga iturturong ida iti prusision ti balligi a prusision babaen iti dayta.” Ditoy dagiti kabusor a gobierno ken turturay iti sidong ni Satanas a Diablo nailadawanda kas dagiti nakayawan ken balud iti prusision ti balligi. Ni Jehova a Konkistador ti namaglamolamo kadakuada ket ipabuyana ida iti publiko kas dagiti naabak. Naparmekda “babaen iti dayta,” kayatna a sawen, iti “kayo a pagtutuokan” ni Jesus. Ti ipapatayna iti kayo nangted ti pakaibatayan ti pannakaikkat “ti surat” (ti Linteg ti tulag) ket pinagbalinna a posible para kadagiti Kristiano a mawayawayaan manipud pannakakayaw kadagiti sataniko a pannakabalin ti kinasipnget. (Colosas 2:13, 14) Anian ti rebbeng a panangapresiartay koma iti kasta a Nakristianuan a wayawaya!