Report dagiti Manangiwaragawag ti Pagarian
Panangikaskasaba ti Naimbag a Damag “Agingga iti Ungto ti Daga”
“DAYTOY naimbag a damag ti pagarian maikaskasabanto iti amin a mapagnaedan a daga kas pammaneknek iti amin a nasnasion; ket iti kasta umayton ti panungpalan.” Kastat’ kuna ni Jesus kadagiti adalanna di nagbayag sakbay ti ipapatayna. Di nagbayag kalpasan ti panagungarna, kinunana pay: “Dakayto ti saksik sadi Jerusalem ken iti isuamin a Judea ken Samaria ken agingga iti ungto ti daga.” (Mateo 24:14; Aramid 1:8) Itatta, dagitoy a padpadto matungtungpaldan iti nasurok ngem 200 a dagdaga, agraman iti pagilian ti Peru idiay Sud America.
Nasurok a 32,000 a Saksi ti mangikaskasaba ti naimbag a damag iti dayta nagpintas a daga, ket ti teritoriada pudno a ramanenna ti sumagmamano kadagiti ungto ti daga: ti nangangato nga Andes, a dumanon iti kangato nga addat’ nagbaetan ti 4,000 ken 4,500 metros, ken kasta met ti napudot a kabakiran ti Amazon, a sadiay madanon laeng dagiti tattao babaen kadagiti bilog. Inreport ti sanga ti Peru:
◻ “Idiay kabakiran, addaankam ti walo nga espesial payunir a naituding iti dua a babassit a bilog a maaw-awagan lanchas. Dagitoy babassit a bilog mabalin a tumpawda iti 0.3 metro a danum, gapu itoy posible a maidanon ti panangikaskasaba ti naimbag a damag kadagiti adu a baro a disso kadagiti babassit a karayan. Agingga itatta, dagiti kakabsat nga agus-usar kadagitoy a bilog nakaipaimadan ti ginasgasut a ribo a magasin, libro, ken dagiti Biblia iti intero nga Amazon Valley ti Peru. Kas direkta a resultana, uppat a baro a kongregasion ti naipasdek, agraman lima a naiputputong a grupo nga agrepreport ti serbisioda ken adda panaggigimongda. Manamnama a dagitoy a grupo di agbayag agbalindanton a kongregasion.”
◻ Maysa nga ili idiay kabakiran ti timpuar iti aglawlaw ti pagibombaan nga estasion para iti Trans-Andean a tubo ti asete, a mangipan ti asete manipud kabakiran agingga iti nakangatngato nga Andes agingga pay iti akinlaud a kosta. Gaput’ kaadda dagiti trabahador kadagiti tubo ti asete, daytoy nga ili addaan agarup 20 a bar ken nakalatlatak kas lugar a pakabartekan ken pagraragsakan. Nupay kasta, kalpasan ti panangipaay dagiti espesial payunir ti naan-anay a pammaneknek, adut’ dimngeg iti mensahe ti Pagarian, ket itan uppat laengen a bar ti nabati iti ili! Bayat ti nabiit pay a bisita ti manangaywan ti sirkito, 189 a tattao ti immay iti palawag publikona. Adda itan maysa a grupo dagiti 7 nga agibumbunannag iti ili, ken nasurok a 45 a tattao ti makigimgimong. Di agbayag, babaen iti bendision ni Jehova, daytantot’ agbalinen a kongregasion.
◻ Iti maysa kadagiti 221 a kongregasion iti kabisera a siudad ti Peru, nga isu ti Lima, maysa a 29-años a lalaki isalaysayna no kasanot’ pannakagun-odna ti kinapudno. Gapu ta nagsardengen iti panageskuela iti edad a 13, isut’ kimmappon iti barkada dagiti butangero ket rinugianna ti karera a pannakilablaban, panagdroga, ken imoralidad. Kalpasan ti dua tawen a maipapilit a panagserbi iti militar, nangrugi a maaddaan sakit ti isip. Sa, idi 1983, maysa a napakumbaba, naemma a kabsat a babai ti nakisarita kenkuana bayat ti ministeriona a panagbalaybalay. Iti damdamona, nangngegna ti maipapan iti baro a lubong ti ayat ken talna. Nairugi ti panagadal ti Biblia, ket babaen iti naayat a tulong manipud iti kongregasion ken panangpapigsa ni Jehova, nabalinanna a pinarmek dagiti bisiona. Idi 1986 isut’ nabautisaran ket itan agserserbin kas ministerial nga adipen iti kongregasion.
Pudno unay, dagiti sasao ni Jesus a maikaskasabanto ti Pagarian “agingga iti ungto ti daga” matungtungpalen idiay Peru a buyogen dagiti nakaskasdaaw a bunga, a nakagunggonaan dagiti adu iti dayta a daga nga agbisbisin ken mawaw iti kinapudno.