Report Dagiti Manangiwaragawag ti Pagarian
Madre iti 25 a Tawen Naammuanna ti Kinapudno iti Kamaudianan
IMPADTO ti Biblia a “dakkel nga umariwekwek” manipud amin a nasnasion umaydanto ken agdayawdanto iti naespirituan a templo ni Jehova. (Apocalipsis 7:9) Mapaspasamak daytoy itattan, ket maragsakantayo a makakita nga adu, babaen iti tulong ti kinapudno ti Dios, ti mangbungbungtolen kadagiti kawar ti ulbod a relihion. Dagiti sumaganad a kapadasan ti mangiyilustrar iti daytoy.
◻ Maysa a babai idiay Roma, Italia, ti nangisalaysay: “Manipud pay idi bassitak ti kadadakkelan nga arapaapko isut’ panagbalinkonto a maysa a madre, gapu ta tinarigagayak iti amin a pusok ti agserbi iti Dios. Natungpalko daytoy nga ambisionko idi agtawenak ti 32, idi Disiembre 8, 1960, idi simrekak iti umiso a panagkarik iti panagtulnog, kinapanglaw, ken kinadalus. Ti trabahok ket isut’ panangaywan iti aldaw ken rabii iti agarup 30 a napanglaw ken abandonado nga ubbing a naul-ulilan wenno annak dagiti balud. Addaanak ti pannakapnek iti trabahok.
“Nagunggon ti pammatik kalpasan ti sangapulo a tawen a panagserbik idi rimsua ti susik iti uneg ti institusion. Nasdaawanak no apay, no ti Dios ti mangiturturong kadakami, ipalubosna ti kasta a panagsususik ken gulo iti mismo a balayna.”
Ti madre addaan kabsat a babai nga agindeg idiay Francia ken maysa kadagiti Saksi ni Jehova. Isut’ nangaskasaba iti madre babaen iti surat ken pinatulodanna ti New World Translation of the Holy Scriptures. Insalaysay ti madre: “Kalpasan ti 23 a tawen, daytat’ umuna a pannakaiyasidegko iti Saot’ Dios.” Idi laeng nga inawatna ti panagadal ti Biblia babaen kadagiti Saksi ni Jehova. Kunana: “Bayat ti irarang-ayko iti panagadal, naammuak ni Jehova a Dios ken dagiti kalkalikagumanna agraman dagiti nakaskasdaaw a kualidadna. Madi pay ti riknak idi maammuak a saanna nga anamongan ti panagusar ti ladladawan, gapu ta ti institusion napunno kadagiti imahen iti isuamin a kadakkel ken kita. Naawatak a no kayatko nga ay-ayuen ni Jehova, saanak a makapagtalinaed iti dayta a lugar. Kalpasan ti 25 a tawen iti napeklan a serbisio kas madre, iti kamaudianan nasarakakon ti kinapudno. Gapuna idi Oktubre 1, 1985, inyawatkon ti pakaammo ti panaglusulosko, a nagladingitan dagiti superiorko.
“Tinulongandak dagiti naayat a kakabsatko a lallaki ken babbai agpadpada iti naespirituan ken iti namaterialan. Siyayaman ken Jehova ken iti organisasionna, nabautisaranak idi Agosto 30, 1986, ket nangrugiakon iti dalan nga agturong iti biag nga agnanayon.”
Binendisionan ni Jehova ti Tarigagay ti Tin-edyer nga Agserbi iti Dios
◻ Maysa a maestra idiay Brazil a maysa kadagiti Saksi ni Jehova ti nakadlaw bayat nga agkorkorek ti papel idiay eskuelaan a maysa a 14-años nga estudiante ti nangisurat maipapan iti tarigagayna a makaammo ti ad-adu pay maipapan iti Dios. Rinugianna ti panagadal ti Biblia iti estudiante, ngem bayat ti irarang-ay ti balasang, ti Katoliko a pamiliana ti nangiparit ti panagadal ken dinadaelda dagiti pagbasaanna. Rinugian ti agtutubo nga estudiante ti panagadal ti Biblia bayat ti recess ti eskuelaan, ngem nasukalan manen. Gapuna ti panagadal naitultuloy babaen iti sursurat. Ngem, di nagbayag, nasukalan ti pamiliana dagiti sursuratna ket pinuoranda ida. Ti ama nangrugi a mangpilit kenkuana a mapan iti Misa. Isut’ kumuykuyog ngem mangitugot ti kopia Ti Pagwanawanan a basaen bayat ti misa, nga ilemmeng dayta kadagiti panid ti bokleta ti simbaan. Nagtultuloy daytoy iti innem a bulan, agingga nga iti maysa nga aldaw isut’ naglibas manipud pagtaenganda tapno mapan idiay Kingdom Hall. Bayat ti miting nagparang ni amana idiay ruangan ket imbagana kadagiti kakabsat nga ibagada iti balasangna a pangpang-orennanto no makaawid idiay balayda. Ti panagregget dagiti kakabsat a makirinnason kenkuana ket barengbareng.
Iti sumaganad nga aldaw, naragsak ken nakaisem, napanna kinita dagiti kakabsat. Impakitana kadakuada dagiti adu a saplit iti bagina a binabaot ni amana. Ngem, apay nga isut’ naragsak? Kalpasan ti ipapanawna idiay Kingdom Hall, ti ama nagsaludsod kadagiti sumagmamano a tattao idiay ili, agraman ti mayor, maipapan kadagiti bentahe ken disbentahe ti panagbalin ti balasangna a maysa kadagiti Saksi ni Jehova. Kuna ti mayor a nasingpet a tattao dagiti Saksi, maikari a pagtalkan. Innayonna pay ti nalalaing a moralda ket nasayaat unay a maaddaan ti ubing kadagitoy a pagannurotan, a nangatngatoda unay ngem kadagiti kaaduan nga agtutubo.
Agpapan pay itoy, ti balasang nabaot latta. Ngem imbaga ti amana kenkuana nga isut’ babaotenna agsipud ta pimmanaw idiay balayda nga awan palubos. Ken kunana nga isunto manen ti baotenna no isardengna ti pannakipagad-adalna ti Biblia wenno itatabunona ti miting dagiti Saksi ni Jehova! Itan ti anak a balasang maysan a naregta nga agibumbunannag, ken dadduma iti pamiliana ti mangipakpakitan ti interes iti kinapudno.
Pudno unay, bendisionan ni Jehova dagiti agtutubo nga addaan napasnek a tarigagay nga agserbi kenkuana, kas ipakita daytoy a kapadasan.—Salmo 148:12, 13.