Report Dagiti Manangiwaragawag ti Pagarian

Dagiti Saksi ni Jehova Mangasabada iti Impormal Buyogen Dagiti Naimbag a Resulta

ADU a tao ti immuna a naiyam-ammo kadakuada ti kinapudno ti Biblia idi a maysa kadagiti Saksi ni Jehova ti nangasaba kadakuada iti impormal. Iti daytoy sursuroten dagiti Saksi ti ulidan ni Jesu-Kristo, a nangasaba nga impormal iti maysa a Samaritana idiay bubon a sumakduanna iti danum. (Juan, kapitulo 4) Idiay Makindaya nga Africa, maysa a Saksi ni Jehova ti nangasaba iti impormal iti maysa a madre a Katoliko. Isalaysay ti sanga nga opisina ti Watch Tower Society no ania ti nagbanaganna:

◻ Maysa nga agsapa iti dalanna a mapan idiay ili, nasabat ti Saksi ti maysa a madre a Katoliko. Innala ti kabsat a babai ti gundaway tapno saludsodanna ti madre: “Sadino ti papanam iti daytoy nga oras ti aldaw?” Ti sungbat ket: “Mapanak agkararag iti Diosko.” Kalpasanna sinaludsodanna ti madre: “Ammom kadi ti nagan ti Diosmo?” “Saan kadi a ti naganna ket Dios?” insungbat ti madre. Intukon ti Saksi ti ipapanna idiay pagtaengan ti madre iti dayta a malem tapno pagsaritaanda maipapan ti nagan ti Dios. Kalpasan panagsaritada napan ti madre idiay simbaan ket sinaludsodanna ti maysa kadagiti padi no ammona no ania ti kaipapanan ti “Jehova.” Ti sungbat ket, “Isu dayta ti nagan ti Dios.” Naklaat unay ti madre iti pannakangngegna nga ammo daytoy ti padi ngem daytat’ pulos a dina insuro kenkuana.

Sinarungkaran ti Saksi daydiay a babai iti siam a nagsasaruno nga aldaw ket insurona kenkuana ti kinapudno maipapan ti Trinidad, ti kararua, umap-apuy nga impierno, ken ti namnama para kadagiti natay. Ti babai naawatanna amin ket kalpasanna kiniddawna iti Saksi nga isut’ ikkanna iti pawayway tapno maisilnagna amin dagitoy a baro a pannursuro. Kalpasan dua a lawas isut’ nakiuman manen iti Saksi ket kiniddawna a maaddaan ad-adu pay a pannakisarita. Iti daytoy a kanito inkeddengen ti madre a pumanaw iti simbaan ket dinadaelnan dagiti ik-ikutanna a ladawan, rosario, ken krus. Pinadas ti padi nga allukoyen nga agsubli, ngem isut’ determinado a mangsurot iti kinapudno. Idi agangay isut’ nabautisaran ket nagserbi kas maysa a regular nga auxiliary payunir iti adu a bulan iti laksid ti nakapuy a salun-atna ken kinabaketnan.

Yantangay nalawa ti pagtaenganna, intukonna iti kongregasion ti pannakausar dayta kas Kingdom Hall. Sinukatan dagiti kakabsat ti daan nga atepna, inikkatda dagiti makin-uneg a didingna, ket inaramidda ti nalawa a paset ti patakder a maysa a makaawis a paggigimongan. Daytoy a dati a madre a Katoliko agtataeng iti maysa a silid iti likudan ti hall. Isut’ naragsak unay iti pannakaipaayna iti daytoy a tulong para iti panagdayaw ken Jehova.

◻ Sabali pay a kapadasan a mangipakpakita iti kinanainsiriban ti impormal a panangasaba aggapu manipud Kampala, Uganda. Iti ipapanna iti maysa nga opisina ti gobierno, nakisarita ti maysa a misionero a Saksi kadagidiay nakalugananna iti elevator. Maysa a lalaki, ni Mr. L​—​—​—​—, inyebkasna ti tarigagayna a mangawat iti intukonna a literatura ngem dina magun-odan dayta iti dayta a kanito. Gapuna nga intedna iti misionero ti naganna ken ti direksion ti opisinana. Kalpasanna napan sadiay ti misionero ket sinapulna sadiay ni Mr. L​—​—​—​—. Isut’ inawaganda ngem iti pannakakellaat ti misionero, sabali met a lalaki ti nagparang. Dua gayam a lallaki nga agpada ti naganda ti agtartrabaho iti dayta nga opisina. Maysa nga ababa a panangsaksi ti naipaay iti maikadua a Mr. L​—​—​—​—, ket isut’ nangipakita iti karkarna nga interes. Nupay ti immuna a Mr. L​—​—​—​—, napukawna ti interesna, nairugi ti panagadal ti Biblia iti maikadua a Mr. L​—​—​—​—. Isut’ maysa itan a nabautisaran a Saksi, ket ni baketna ken ti anakna a lalaki ti rumangrang-ay agturong iti panagpabautisar.

Ni Jesu-Kristo isu ti Naimbag a Pastor ket ammona dagiti mara-karnero a nalinteg tarigagay dagiti pusoda. Dagitoy a kapadasan iyilustrarna nga ipatpaturongna dagiti pasurotna kadagidiay. Ti impormal a panangasaba mabalin a nabunga!​—Juan 10:14.