Report Dagiti Manangiwaragawag ti Pagarian
“Tunggal Kasuratan a Binasana Sinagidna ti Pusok”
“TI SAO ti Dios nabiag ken napigsa,” kinuna ni apostol Pablo. (Hebreo 4:12) Napaneknekan daytoy a pudno iti biag ti maysa a babai manipud Vietnam a napadakkel kas Budista. Daytoy ti pakasaritaanna.
“Dagiti dadakkelko, nga adda pay laeng idiay Vietnam, ket Budista ti pakaawaganda, gapuna napadakkelak kas Budista agingga ti panagasawak iti edad a 22. Ti pamilia ti asawak pinadpadasdak a piliten nga agpabautisar iti Iglesia Katolika. Kinunada a ti natay a katugangak a babai napawilan a mapan langit agsipud ta maysaak a Budista! Idi damdamo nagkedkedak a mangaramid a kasta, ngem idi agangay nagpabautisarak tapno maay-ayok ida. Nupay kasta, iti kaunggan ti pusok, mariknak ti kinaawan kaipapananna agsipud ta kagurak ti panaginsisingpet iti Iglesia Katolika. Awan nakaidumaanna iti relihion a Budista. Agpadpadada a naigamer iti gubat ken politika, ket dagitoy a relihion imparegtada ti panagdayaw kadagiti inapo.
“No nagtalinaedak idiay Vietnam, nagbassitan komat’ gundawayko a makaadal iti kinapudno. Dimmakkelak iti tiempo a nagsaknap ti napolitikaan a pannakariribuk iti intero nga Akin-abagatan a Vietnam, ken nagnaedak iti maysa nga ili a nakaad-adayo manipud Saigon. Gapuna maysa a bendision a nakalibasak nga agturong idiay Australia.
“Maysaak kadagiti nagasgasat a tattao ti barangay. Agraman ti dua-bulan-tawenna a maladagak iti takkiagko, nagtartarayak iti kasipngetan tapno mailemmengak ti polisia ken makasakay iti bassit a barangay a pagkalap. Kalpasan pito nga aldaw iti baybay, dimtengkami idiay Malaysia, a sadiay naggiankami iti sumagmamano a bulan iti maysa a refugee camp sakbay iyuumay idiay Australia.
“Kalpasan ti dua ket kagudua a tawen idiay Australia, nasarakandak dagiti Saksi ni Jehova iti binalay-balay a ministerioda. Iti umuna nga iyaawag, inawatko ti regular a panangyadal ti Biblia agsipud ta nakitak daytoy a maysa a nasayaat a gundaway tapno masursurok ti Ingles. Ngem ti kababalin ti Saksi a nakasarak kaniak ken ti kinapudno nga insurona pinagsiddaawnak ti kasta unay. Tunggal kasuratan a binasana sinagidna ti pusok, ket awan makitak a panaginsisingpet iti organisasion ni Jehova. Kalpasan panangad-adal ti Biblia iti maysa ket kagudua a tawen, indedikarkon ti biagko ken Jehova ket nabautisaranak.
“Maikunak a ti kinapudno binalbaliwanna ti intero a panangmatmatko iti biag. Ti asawak ket di manamati, ngem tinulongan ken tinaginayonnak ni Jehova, agraman ti bassit a pamiliak. Isut’ Naindaklan nga Instruktorko ket insuronak nga agbalin a nasaysayaat nga asawa ken ina. Itultuloyko ti agyaman ken Jehova a nangtulong kaniak a rummuar manipud naespirituan a kinasipnget nga agturong iti lawag ti kinapudno ti Biblia.”
Pudno unay, ti napaltiingan a Sao ti Dios ket napigsa nga agpaay iti kinaimbag iti daytoy a kaso. Ti panangadal ti Biblia ken panangyaplikar ti nasursuro mangted kaipapanan ken panggep iti biag ket mangiturong iti agnanayon a biag iti baro a lubong ti Dios. Kas impaltiing ti Dios ken Moises a mangikuna, “ta saan a barengbareng kadakayo, gapu ta isu ti pakabiaganyo.”—Deuteronomio 32:47.