Ania ti Ibagayo iti Maysa a Budista?
1 Iti dadduma a pagilian, nasurok a kagudua kadagidiay agpapabautisar ket dati a Budista. Aniat’ mangal-allukoy kadagitoy a tattao iti kinapudno? Yantangay adu ti Insik ditoy Pilipinas a dimmakkel a Budista, kasanotay nga idatag ti naimbag a damag kadakuada?
2 Ipakita ti Napudno a Pannakaseknan: Adu a dati a Budista ti nagkuna a saan a ti nabagas nga argumento ti nakaallukoy kadakuada iti kinapudno. Imbes ketdi, natignayda gapu iti napudno a personal a pannakaseknan a naipakita kadakuada. Nasdaaw unay ti maysa nga Asiano a babai nga agnanaed idiay Estados Unidos gapu iti kinamannakigayyem ti sister a nangasaba kenkuana isu nga immanamong nga agadal. Saan unay a makapagsao iti Ingles, ngem naanus ti sister. No nabannog ti babai wenno dina kabaelan ti agadal, nainggayyeman laengen nga ibibisita ti aramiden ti sister sana iyurnos ti sumaganad a panagadal. Idi agangay, nagpabautisar ti babai, ti dua nga annakna a lallaki, ken ti baketen a nanangna. Nagawid iti pagilian a nakayanakanna ket adu a sabsabali pay ti natulonganna a mangadal iti kinapudno. Maysa kadagiti annakna ti agserserbi itan iti sanga nga opisina. Anian a bembendision ti imbunga ti panangyanninaw iti ‘kinamanangngaasi ken ayat ni Jehova iti tao’!—Tito 3:4.
3 Kapanunotan Dagiti Budista: Kaaduanna, saan a supiaten dagiti Budista ti sabsabali a kapanunotan, ngem dida mamati a nasken ti panangannurot iti espesipiko a doktrina. Gapuna, nagduduma ti patpatien ti tunggal maysa kadakuada. Ti gagangay a tema iti maysa a sanga ti pannursuro dagiti Budista, kunada a ti biag ket napno iti panagsagsagaba, ngem babaen ti pannakalawlawag, mapagpatingga ti maysa a tao ti agtultuloy a siklo ti maulit-ulit a pannakayanak kadagiti di makapnek a biag. Kunada a tapno mawayawayaan ti maysa a tao iti daytoy a siklo, masapul a ragpatenna ti Nirvana, ti kasasaad a di mailadawan gapu ta dayta ket saan a lugar wenno pasamak, ngem ketdi, maysa a kawaw a kasasaad a sadiay awanen ti ut-ot ken kinadakes. (Kitaenyo ti Ania ti Mapasamak Kadatayo No Mataytayo?, panid 9-10.) Aniat’ ibaga daytoy kadatayo? Nga awan nasayaat nga ibunga ti pannakidebate kadagiti tattao maipapan iti pilosopia dagiti Budista. Imbes ketdi, kasaritatayo ida maipapan kadagiti gagangay a parikut a pakaseknan ti isuamin.
4 Ipaganetget Dagiti Pareho a Paginteresantayo: Yantangay gagangay nga ibilbilang dagiti Budista a ti biag ditoy daga ket kaipapananna ti panagsagaba, minamaag kadakuada ti ideya a biag nga agnanayon ditoy daga. Nupay kasta, tarigagayantayo amin a masagraptay koma ti naragsak a biag ti pamilia, a makitatayo ti pannakaikkat ti panagsagaba, ken maammuantayo ti kaipapanan ti biag. Imutektekanyo no kasano nga itampok dagita a pareho a kasapulantayo.
5 Mabalinyo a padasen daytoy nga introduksion:
◼ “Agbibiagtayo ita iti lubong a pagsagsagabaan ti adu a tattao nga awan basbasolna. Aniat’ patienyo a kasapulan tapno agpatingga ti ut-ot ken panagrigat ti isuamin? [Palubosanyo a sumungbat.] Adda kari idi un-unana a makaliwliwa unay kaniak. [Basaenyo ti Apocalipsis 21:4.] Siempre, saan pay a dimteng dayta a tiempo, ngem inton dumteng dayta, kayattay a makita, di ngamin?” Kalpasanna mangitukon iti publikasion a mangilawlawag no kasanonto nga agpatingga ti panagsagsagaba.
6 Iti maysa a nataenganen, mabalinyo a kunaen:
◼ “Nalabit maseknankay met a kas kaniak iti agdama a panagsaknap dagiti naalas a kapanunotan ken ti epekto dagitoy kadagiti annaktayo. Apay a kasta la unayen ti panagraira ti imoralidad kadagiti agtutubo? [Palubosanyo a sumungbat.] Ammoyo kadi a naipadto daytoy iti maysa a libro a nangrugi ti pannakaisuratna mabayag pay sakbay ti pannakaipasdek dagiti relihion a Muslim, Kristiano, ken Hindu? [Basaenyo ti 2 Timoteo 3:1-3.] Kitaenyo ta agraira dagitoy a kasasaad iti laksid ti agtultuloy a panagad-adal. [Basaenyo ti bersikulo 7.] Tinulongannak daytoy a publikasion a mangtarus iti kinapudno a di pulos ammo ti kaaduan a tattao. Kayatyo kadi a basaen?” Mangitukon iti maitutop a libro wenno broshur.
7 Kaaduanna, raemen dagiti Budista ti Biblia a kas sagrado a kasuratan. Gapuna, direkta nga ibasayo dayta. (Heb. 4:12) No dina kayat ti impluensia ti kultura iti Lumaud, ibagayo kenkuana nga amin a nagsurat iti Biblia ket taga Asia.
8 Aniada a Publikasion ti Kaepektibuan? Malaksid pay kadagiti tract-tayo, a magun-odan iti Insik, adu ti agibumbunannag a nangusar a sibaballigi kadagitoy a literatura: dagiti libro a Ti Panangbiruk ti Sangatauan iti Dios, Ti Sekreto ti Kinaragsak iti Pamilia, ken Dagiti Saludsod nga Iyimtuod ti Agtutubo—Dagiti Sungbat nga Epektibo; dagiti broshur nga “Adtoy! Pagbalinek Dagiti Isuamin a Bambanag a Baro,” ken Ania ti Panggep ti Biag—Kasanoyo a Masarakan Dayta?; ken, no adda pay, ti Kingdom News No. 35 nga Addanto Ngata Tiempo nga Agiinnayat Amin a Tattao? Kaaduan a Budista a mangad-adal itan iti kinapudno ket adalenda nga umuna ti broshur a Kalikaguman sa kalpasanna ti libro a Pannakaammo.
9 Nupay naikuna a simmangpet idiay Atenas dagiti misionero a Budista agarup 400 a tawen sakbay a nangasaba ni Pablo sadiay, di masigurado no nakasarak ni Pablo iti tao a naimpluensiaan iti kapanunotan dagiti Budista. Nupay kasta, ammotayo no kasano ti panagrikna ni Pablo maipapan iti panangasaba kadagiti nagduduma a kita ti tattao. Pinagbalinna ti bagina “nga adipen ti isuamin” tapno ‘iti amin a pamay-an maisalakanna ti sumagmamano.’ (1 Cor. 9:19-23) Maaramidtay met ti kasta babaen ti panangipakita iti personal nga interes kadagiti tattao ken babaen ti panangipaganetget iti namnama a segseggaantayo a sangapada bayat a kasabaantay ti tunggal maysa a masarakantayo.