Panangtulong Kadagidiay Saan Pay a Nakasagana a Mangadal iti Libro nga Isursuro ti Biblia
1. Apay nga adda dagiti agkedked a mangadal iti libro nga Isursuro ti Biblia iti damo?
1 Tapno matignay ti maysa nga agdayaw ken ni Jehova, masapul a maammuanna ti isursuro ti Biblia. Nupay kasta, ti dadduma a tattao ket saan a Kristiano ti relihionda ken saanda a mamati iti Biblia kas Sao ti Dios. Adda met dagiti saan a mamati iti Dios ken saan a mangraraem iti Biblia. No adda dagiti agkedked a mangadal iti libro nga Isursuro ti Biblia iti damo, ania dagiti alikamen a mabalintayo nga usaren? Dagiti sumaganad a singasing ket naibatay kadagiti komento dagiti agibumbunannag iti agarup 20 a pagilian.
2. No ibaga ti bumalay a saan a mamati iti Dios, ania ti rumbeng nga ammuentayo, ken apay?
2 Dagidiay Saan a Mamati iti Dios: No ibaga ti bumalay a saan a mamati iti Dios, nasayaat nga ammuentayo no apay. Gapu kadi ta mamati iti ebolusion? Napukaw kadi ti pammatina iti Dios gapu iti kinaawan hustisia iti lubong wenno iti panaginsisingpet ti relihion? Naggapu kadi iti pagilian a saan a mangitantandudo iti panamati iti Dios? Mabalin a saanna met nga ilibak nga adda Dios, ngem saanna a marikna a napateg ti panamati Kenkuana. Natakuatan ti adu nga agibumbunannag a makatulong ti panangisaludsod iti, “Dati kadin a kasta ti panangmatmatyo?” tapno yebkas ti bumalay ti kapanunotanna. Dumngegkayo ken bay-anyo nga agsao. No matarusantayo no apay a saan a mamati iti Dios ti maysa a tao, maammuantayo no kasanotayo a sumungbat ken no ania a publikasion ti itukontayo.—Prov. 18:13.
3. Kasanotayo a maipakita a raraementayo ti bumalay ken dagiti patpatienna?
3 No sumungbattayo, agannadtayo di la ket ta ipapan ti bumalay a konkontraentayo ti panangmatmatna. Kastoy ti singasing manipud iti Estados Unidos: “Nakapatpateg a raementayo ti wayawaya dagiti tattao a mangikeddeng no ania ti patienda. Imbes nga ipapilittayo dagiti patpatientayo, nasaysayaat no mangibangontayo kadagiti saludsod a mamagpanunot ken mangtignay kadagiti tattao a mangamiris kadagiti patpatienda no umiso wenno saan.” Kalpasan a mayebkas ti bumalay ti kapanunotanna, ti maysa nga agdaldaliasat a manangaywan masansan nga irugina ti sungbatna babaen ti panangisaludsodna, “Iti panagkunayo, posible met ngata daytoy?”
4. Kasanotayo a matulongan dagiti Buddhist?
4 Kaaduan a Buddhist ket awan ammoda maipapan iti Dios. Magustuan ti dadduma nga agibumbunannag iti Britain nga usaren ti broshur a Lasting Peace and Happiness—How to Find Them no kasabaanda dagiti kasta a tattao. Kalpasan a mapagsaritaanda ti panglukat a sasaona, ilawlawagda ti benneg nga “Is There Really a Most High Creator?” sa ti benneg nga “A Guidebook for the Blessing of All Mankind.” Kalpasanna, mabalindanton nga iruangan ti libro nga Isursuro ti Biblia sa ibagada iti bumalay, “Uray no saanka a mamati iti Dios, makagunggona ti panangadal iti Biblia ta naglaon daytoy iti adu a praktikal a giya.” Kinuna ti maysa a regular pioneer iti Estados Unidos nga agserserbi iti Chinese a kongregasion: “Kaay-ayo ti adu a tattao iti teritoriami ti agbasa. Masansan a nabasadan ti intero a publikasion sakbay pay a makasublikami. Ngem mabalin a saanda a maawatan no ania ti panagadal iti Biblia isu a magusgustuak nga itukon ti broshur a Naimbag a Damag iti damo a pannakisaritak gapu ta naglaka dayta a pangirugi iti saritaan.” Kinuna ti manangaywan iti sirkito nga agserserbi iti sirkito a Chinese ti pagsasaona iti Estados Unidos a posible nga usaren ti libro nga Isursuro ti Biblia iti damo a pannakisarita. Ngem mabalin a nasaysayaat nga irugi ti panagadal iti kapitulo 2, a mangilawlawag ti maipapan iti Biblia, imbes a ti kapitulo 1, a mangilawlawag ti maipapan iti Dios.
5. Apay a kasapulantayo ti anus?
5 Saan a kaskarina a patanoren ti panamati iti Dios, isu a kasapulan ti anus. Mabalin a saantayo a matignay ti bumalay a mamati nga adda Namarsua kadagiti damo a pannakisaritatayo. Ngem nalabit mabigbignanto a posible nga adda Namarsua, wenno maawatannanto no apay nga adda dagiti mamati iti Dios.
6. Apay nga adda dagiti saan nga interesado iti Biblia?
6 Dagidiay Saan nga Interesado Wenno Saan a Mamati iti Biblia: Nupay kasta, ti maysa a tao a mabalin a mamati nga adda Dios ket saan nga interesado iti isursuro ti Biblia gapu ta dina patien a dayta ket Sao ti Dios. Nalabit, agnanaed iti saan a Kristiano a pagilian ken ibilangna ti Biblia kas libro ti Kakristianuan. Wenno mabalin nga agnanaed iti Kristiano a pagilian ngem saan a relihioso dagiti tattao isu a saan a mamati a makatulong kenkuana ti Biblia. Kasanotayo a matulongan dagiti kasta a tattao nga aginteres iti Biblia ket inton agangay, kayatnan ti agadal babaen ti libro nga Isursuro ti Biblia?
7. Ania ti nasayaat a pamay-an a masansan a mangtukay iti interes dagiti tattao iti Biblia?
7 Insurat ti sanga nga opisina iti Greece: “Ti kasayaatan a panangtulongtayo kadagiti saan nga interesado iti Biblia ket ti panangukag iti Biblia ken panangibasa iti linaonna. Napaliiw ti adu nga agibumbunannag a nabilbileg ti impluensia ti mensahe ti Biblia iti puso ti maysa a tao ngem iti aniaman a mabalinda nga ibaga. (Heb. 4:12) Adu ti naginteres a mangadal iti Biblia idi nabasada ti nagan ti Dios iti Biblia.” Insurat ti sanga nga opisina iti India: “Ti kinapudno maipapan iti biag ken ipapatay ti paginteresan ti adu a Hindu ken ti kari ti Biblia maipapan iti lubong nga awanton ti panangidumduma maibatay iti kasasaad iti biag.” No dagiti problema a pakaseknan dagiti tattao ti pakisaritaan dagiti agibumbunannag, masansan nga agballigida a mangipakita no ania ti kuna ti Biblia nga aramidento ti Pagarian ti Dios a mangilinteg kadagiti bambanag.
8. Ania ti mabalintayo nga ibaga kadagiti negatibo ti panangmatmatna iti Biblia gapu iti pannursuro ti Kakristianuan?
8 No negatibo ti panangmatmat ti maysa a tao iti Biblia gapu iti pannursuro ti Kakristianuan, ilawlawagyo kenkuana a saan nga umiso ti isursuro ti Kakristianuan maipapan iti Biblia ken kadagiti pannursurona. Insurat ti sanga nga opisina iti India: “No dadduma, masapul nga ipaawattayo kadagiti tattao a dagiti relihion ti Kakristianuan ket saan nga isuda ti nakaitalkan ti Biblia.” Kinunada a masansan a magustuan dagiti Hindu ti seksion 4 ti broshur nga Ania ti Panggep ti Biag? Kasanoyo a Masarakan Dayta?, a mangilawlawag no kasano nga inkagumaan dagiti relihion a tiritiren ken dadaelen ti Sao ti Dios. Kastoy ti ibagbaga ti maysa a payunir iti Brazil kadagiti tattao: “Apay a dimo ammuen ti ad-adu pay maipapan iti linaon ti Biblia? Adu ti mangar-aramid iti dayta buyogen ti silulukat a panunot, a saan a nasken a sumrekda iti aniaman a relihion. Mabalin a masdaawkanto iti maammuam.”
9. Apay a saantayo a sumuko no adda dagiti saan nga interesado iti isursuro ti Biblia iti damo?
9 Kitkitaen ni Jehova ti puso ti tunggal tao. (1 Sam. 16:7; Prov. 21:2) Iturongna iti pudno a panagdaydayaw dagidiay nalinteg ti panagpuspusona. (Juan 6:44) Adu kadagiti kasta a tattao ti saan pay a pulos a nasursuruan maipapan iti Dios wenno bassit laeng ti ammoda maipapan iti Biblia. Ti ministeriotayo ipaayanna ida iti gundaway a ‘maisalakan ken dumteng iti umiso a pannakaammo iti kinapudno.’ (1 Tim. 2:4) Gapuna, saankayo a sumuko no adda dagiti saan nga interesado iti isursuro ti Biblia iti damo! Usarenyo ti maysa kadagiti alikamen a magun-odan iti lengguaheyo a mangtukay iti interes dagiti tattao. Inton agangay, mabalin a maiturongyonton ti panagadal iti libro nga Ania a Talaga ti Isursuro ti Biblia?
[Kahon iti panid 4]
Padasenyo daytoy no saan nga interesado ti bumalay iti Biblia:
• Ilawlawagyo ti kapitulo 17 ken 18 ti libro a Life—How Did It Get Here? By Evolution or by Creation?
• Para kadagiti Hindu, usarenyo ti broshur a Why Should We Worship God in Love and Truth?
• Para kadagiti Judio, usarenyo ti broshur a Will There Ever Be a World Without War?, panid 3-11.
• Ilawlawagyo ti pagsayaatan dagiti sumaganad a prinsipio iti Biblia. Dagitoy dagiti publikasion a mabalinyo nga usaren a mangipakita iti praktikal a pateg ti Biblia:
Ti serye iti Agriingkayo! a “Tulong Para iti Pamilia”
Ti video a The Bible—Its Power in Your Life
Dagiti broshur a Naimbag a Damag Manipud iti Dios, leksion 9 ken 11; Libro Para iti Amin a Tao, panid 22-26; ken Makapnek a Biag—No Kasano a Masagrap, seksion 2
Para kadagiti Buddhist, usarenyo ti broshur a The Pathway to Peace and Happiness, panid 3-7.
Para kadagiti Muslim, usarenyo ti broshur a Real Faith—Your Key to a Happy Life, seksion 3.
No saan a kayat dagiti tattao iti teritoriayo ti Biblia, mabalin a nasaysayaat no sayonto la dakamaten a naadaw iti Biblia ti nainsiriban a mensahe nga iranranudyo kalpasan ti sumagmamano nga isasarungkar.
• Ilawlawagyo no kasano a natungpal dagiti padto iti Biblia. Dagitoy ti publikasion a mabalinyo nga usaren:
Ti video a The Bible—Accurate History, Reliable Prophecy
Ti broshur a Libro Para iti Amin a Tao, panid 27-29
• Usarenyo ti libro nga Isursuro ti Biblia apaman nga isaludsod ti bumalay no ania ti isursuro ti Biblia maipapan iti nagduduma a topiko.
[Kahon iti panid 5]
No kuna ti bumalay: “Diak mamati iti Dios,” mabalinyo a kunaen:
• “Mabalin kadi nga ilawlawagko iti apagbiit no apay a mamatiak nga adda Namarsua?” Kalpasanna iranudyo dagiti punto manipud iti libro a Pannakirinnason, panid 313-315, wenno ibagayo nga agsublikayto tapno ikkanyo iti publikasion a nagustuanyo a binasa.
• “Ngem no kas pagarigan ta adda Dios, ania a klase a Dios ti kayatmo?” Kaaduan a bumalay ti mangibaga a kayatda ti Dios a naayat, napnuan hustisia, manangngaasi, ken saan a mangidumduma. Usarenyo ti Biblia a mangipakita a ti Dios ket addaan kadagiti kasta a kualidad. (Mabalin a posible pay ketdi nga usaren ti kapitulo 1 ti libro nga Isursuro ti Biblia, mangrugi iti parapo 6.)
No kuna ti bumalay: “Diak mamati iti Biblia,” mabalinyo a kunaen:
• “Adu ti mangibagbaga iti kasta. Adda dagiti agkunkuna a ti Biblia ket saan a maitunos iti siensia wenno saan a praktikal dagiti pagalagadan ti Biblia. Napadasanyo kadin a binasa ti Biblia? [Palubosanyo a sumungbat. Ipakitayo ti introduksion iti panid 3 ti broshur a Libro Para iti Amin a Tao sa itukonyo ti broshur.] Adu ti saan a mamati iti Biblia gapu ta saan nga umiso ti isursuro ti relihion maipapan iti Biblia. Inton sumaruno, kayatko nga ilawlawag kadakayo ti maysa a pagarigan iti panid 4 ken 5.”
• “Adu ti mangibagbaga iti kasta. Mabalin kadi nga ipakitak kadakayo ti maysa a banag a magustuak unay maipapan iti Biblia? [Basaenyo ti Job 26:7 wenno Isaias 40:22, a mangipakita nga umiso ti Biblia no maipapan iti siensia.] Naglaon met ti Biblia kadagiti nainsiriban a balakad a makatulong kadagiti pamilia. Inton sumaruno, ipakitakto kadakayo ti maysa a pagarigan.”
• “Pagyamanan iti panangibagayo iti dayta. No kas pagarigan ta adda libro nga insurat ti Dios para iti sangatauan, ania ngata ti linaonna?” Kalpasanna, ipakitayo kenkuana ti maysa a teksto iti Biblia a maitunos iti sungbatna.