Ti Baro a Broshur a Maipaima!
1. Ania ti itukontayo inton Nobiembre, ken ania ti panggep daytoy a publikasion?
1 Iti “Agtultuloykayo nga Agbantay!” a Kombension Distrito idi 2009, nairuar ti baro a broshur a napauluan, Ti Biblia—Ania ti Mensahena? Iti damo a gundaway, dagiti kongregasion iti intero a lubong itukondanto daytoy a broshur inton Nobiembre. Kasano a magunggonaan dagiti tattao iti teritoriatayo iti daytoy a broshur? Ti kaaduan a tattao, nangnangruna dagidiay saan a Kristiano, ket bassit laeng ti ammoda maipapan iti Biblia. Gapuna, nailawlawag iti panid 3 a nairanta daytoy a broshur a mangipakaammo iti “kangrunaan a linaon ti Biblia.”
2. Ania ti mabalin nga ibagatayo no ipaimatayo ti broshur?
2 No Kasano nga Itukon: Mabalintayo nga ibaga: “Kayatmi a maammuan no ania ti makunayo iti daytoy. [Basaen ti 2 Timoteo 3:16.] Adun dagiti nakasaritami nga umanamong iti daytoy ken adda met dagidiay nagkuna a ti Biblia ket maysa laeng a nagsayaat a libro. Dakayo ngay, ania ti makunayo? [Palubosanyo a sumungbat.] Aniaman ti narelihiosuan a patpatientayo, adda dagiti nasayaat a panggapuantayo a mangsukimat a mismo iti Biblia. [Basaenyo ti panglukat a parapo iti ngato ti panid 3.] Bayat a basaenyo ti makapainteres a sumario ti Biblia a naisalaysay iti daytoy a broshur, addanto makitayo a banag a makapagagar: Ti Biblia ket maymaysa ti tema ken mensahena.”
3. Ania ti sabali pay a mabalintayo nga ibaga, nangruna no mangasabatayo iti teritoria nga adu ti tattao a saan a Kristiano?
3 Kastoy ti sabali pay a pamay-an, nangruna no mangasabatayo iti lugar nga adu ti tattao a saan a Kristiano: “Kayatmi a maammuan no ania ti makunayo iti nadakamat iti daytoy a Kasuratan (wenno iti daytoy nasantuan a libro). [Basaen ti Salmo 37:11.] Iti panagkunayo, anianto ngata ti itsura ti daga no matungpal daytoy a padto? [Palubosanyo a sumungbat.] Maysa daytoy kadagiti namnama ken liwliwa a masagrap dagiti tattao no adalenda ti Biblia aniaman ti kultura ken pammatida.” Basaenyo ti parapo iti ngato ti panid 3 sa itukonyo ti broshur.
4. Kasanotayo a mausar ti broshur iti panangirugi iti panangyadal iti Biblia?
4 Mangirugi iti Panangyadal iti Biblia: Inton sumarungkartayo, mabalintayo nga ipalagip iti bumalay ti napagsaritaantayo iti napalabas sa adalentayo ti maysa wenno dua a parapo iti topiko a napagsaritaantayo, nga usarentayo dagiti saludsod iti ngudo ti napilitayo a seksion. Wenno no kayattayo nga iruangan a dagus ti libro nga Isursuro ti Biblia, mabalintayo nga ibasa kenkuana ti makinlikud nga akkub ti broshur, itedtayo ti libro, sa isaludsodtayo no ania kadagiti paulo ti kapitulo ti paginteresanna. Kalpasanna, adalentayo ti maysa wenno dua a parapo iti dayta a kapitulo. Sapay koma ta naan-anay a makiramantayo amin iti panangitukon iti daytoy a broshur inton Nobiembre!