Trabaho ti Lalaki
“¡Ropa, zapato, casa, y comida!” Dagitoy a sasao ket manipud iti maysa a daan a kanta a Kastila a mangibimbinsabinsa kadagiti uppat a kangrunaan a bambanag a manamnama nga ipaay ti maysa a lalaki para iti pamiliana: dagiti kawes, sapatos, pagtaengan, ken taraon. Ken kaaduan a responsable a lallaki ti napnuan dayawda nga ibaklay dayta nga awit.
Nupay kasta, no maysaka a lalaki a de pamilia, maseknanka kadi kadagiti napatpateg a naespirituan a pakasapulan ti pamiliam? Wenno sika, kas kadagiti adu a lallaki, panunotem a ti panangtaming kadagiti narelihiusuan a bambanag iti pagtaengan ket saan a trabaho ti lalaki? Kadagiti dadduma a kultura saan a manamnama a mangipaay dagiti lallaki ti tiempo tapno isuroda dagiti annakda maipapan iti Dios ken ti Biblia.
Ti Sao ti Dios ipabaklayna kangrunaanna iti lalaki iti pagtaengan ti responsabilidad ti panangiyukuok iti pamiliana ti ayat maipaay iti Dios ken nauneg a panangapresiar kadagiti nadiosan a pagalagadanna. Kas pangarigan, idiay Efeso 6:4, dagiti kasuratan gutugotenda dagiti Kristiano a lallaki a kastoy: “Dakayo, nga amma, dikay ruroden dagiti annakyo, ngem padakkelenyo ida iti pannursuro ken panangiturong-panunot ni Jehova.”
Dadduma, nupay pagaammoda dagitoy a sasao, ti mabalin dida naan-anay a maapresiar a ti kasuratan ket espisipiko a naiturong iti ama, ti lalaki idiay pagtaengan. Kas pangarigan, dagiti Espan̄ol- ken Portugues-pagsasaona a tattao ti mabalin a panunotenda a dagiti sasao ti Efeso 6:4 ket naiturong nga agpadpada iti ama ken iti ina. Kadagitoy a pagsasao ti sao para iti “amma” ken ti sao para iti “nagannak” ket agpada. Nupay kasta, idiay bersikulo 1 ti Efeso kapitulo 6, nagibasar ni apostol Pablo agpadpada iti ama ken iti ina babaen ti panangusar iti Griego a sao a go·neuʹsin, manipud iti go·neusʹ, a kayatna a sawen “maysa a nagannak.” Ngem idiay bersikulo 4, ti Griego a sao a nausar ket pa·teʹres, a kayatna a sawen “amma.” Wen, idiay Efeso 6:4, inturong a direkta ni Pablo dagiti saona iti lalaki iti pamilia.
Siempre, no awan ti lalaki a mangidaulo iti pamilia, no kasta ti babai ti mangala iti daytoy a responsabilidad. Iti tulong ni Jehova adu nga inna ti sibaballigi a nangpadakkel kadagiti annakda iti pannursuro ken panangiturong-panunot ni Jehova. Nupay kasta, no adda ti Kristiano a lalaki, rebbeng nga isut’ mangidaulo. No liwayanna daytoy a responsabilidad, ad-adda a narigat para iti intero a pamilia ti mangtaginayon ti nasayaat a programa ti naespirituan a panagtaraon. Ket dayta a lalaki ti agsungsungbat ken Jehova gapu iti kinaliwayna.
Dagiti rikrikna ti Dios iti daytoy a banag ket nalawag kadagiti Nainkasuratan a kualipikasion a naituyang kadagiti manangaywan ken ministerial nga adipen iti Kristiano a kongregasion. Pagminaren ti Biblia a ti maysa a napili iti kasta nga akem rebbeng a “maysa a naimbag a manangidaulo iti balayna, nga iturayanna dagiti annakna iti amin a kinatakneng; (no ti maysa a lalaki dina ammo ti mangurnos iti mismo a balayna, kasanonto ti panangaywanna iti kongregasion ti Dios?).”—1 Timoteo 3:4, 5, 12; Tito 1:6.
Ti lalaki a de pamilia masapul a madadaan a mangisakripisio kadagiti ragragsak ken personal a pagnam-ayan para iti naespirituan a paglaingan dagiti annakna. No dadduma mabalin a kissayanna pay ti tiempo a maipaay kadagiti sabsabali a trabaho tapno maaddaan iti umdas a panawen a busbusenna a kadua dagiti annakna iti regular a pamay-an. (Deuteronomio 6:6, 7) Nupay kasta, dina ipasa kadagiti sabsabali daytoy nga inted-Dios nga annongen. Ti ayat ken interesna kadagiti annakna ti lab-awanna pay ti basta panangited laeng kadagiti kawes, sapatos, pagtaengan, ken taraon.
Pudno a maysa a karit ti panangpadakkel kadagiti annak “iti pannursuro ken panangiturong-panunot ni Jehova.” Dayta ti makagapu no apay a ti kangrunaan ket ti responsabilidad nga adda iti lalaki. No akmen a naimbag ti Kristiano nga ama ti trabahona, no kasta mamatmatanna dagiti annakna a kas bendision manipud ken Jehova. Madanggayanna ti salmista iti panagkuna a: “Kas kadagiti pana iti ima ti nabileg a lalaki, kasta dagiti annak ti agkabanuag. Naragsak ti tao a ti tagubanna napno kadakuada.”—Salmo 127:4, 5.