Apay a Nagan-anus Unay ti Dios?
KITAENYO ti nalpay a rupa ti maysa nga agbisbisin nga ubing. Kitaenyo ti nakakutkuttong a bagina ken ti bimsog a tianna. Panunotenyo ti maipapan iti napaay a panagkasapulanna ti taraon, ken paliiwenyo ti awan naggianna a mallukong nga aw-awitenna. Nalabit ni nanangna ti kumitkita buyogen dagiti naunegen a mata, ti rupana ti nakabutbuteng a ladawan ti kinaawan-namnama. Kalpasanna padasenyo a medmedan ti leddaangyo—wen, ken lapdanyo dagiti luayo.
Naulit-ulit daytoy a buya iti minilion a daras idiay 6 a milion a kilometro kuadrado iti pinarigat ti bisin a rehion a pagaammo kas ti Sahel. Daytat’ dumanon iti nasurok a 4,800 a kilometro iti ballasiw ti Africa abagatan ti Disierto ti Sahara, manipud Senegal iti Igid ti Baybay Atlantico agingga idiay Ethiopia iti Nalabaga a Baybay. Siempre, butbutngen met ti bisin dagiti umariwekwek kadagiti sabsabali a daga. Ipadamag ti World Health Organization nga agarup 1.1 ribo a milion a tattao iti intero a daga ket addaan nakaro a sakit wenno agkurkurang ti pannakataraonda.
Ti bisin ket, siempre, maysa laeng nga aspeto ti panagsagaba ti tao. Rugrugitan ti tao ti daga, ket amintayo ti apektado. Dagiti napolitikaan a sistema kanunonganda ti di kinahustisia ken pannakigubat a mangiyeg liday ken ipapatay kadagiti adu. Apay a palubosan ti Dios dagiti kakasta a bambanag? Isu kadit’ maseknan kadatayo?
Maseknan ti Dios!
Ti Namarsuatayo ket maseknan kadatayo. Adu dagiti pammaneknek iti daytoy ken iti kabaelanna a mamagaallot kadagiti bambanag para iti pagimbagantayo ken panagtutunos iti amin a pinarsuana. Kas pangarigan, kitaenyo ti naipakuyog a ladawan ti maysa nga uyokan a dumapdap-aw iti busel ti maysa a kayo nga agbunga. Ti uyokan agpannuray iti busel para iti nektar a kasapulanna iti pannakataraon. Otro, ti kayo ket agpannuray met iti polen nga iyeg ti uyokan manipud kakitkitana a kayo. Iti daytoy a pamay-an, mapolinisar ti busel tapno mapataud ti bunga. Saan nga amin a kayo nga agbunga ti mapolinisar iti kastoy a pamay-an, ngem sigurado a nangiyurnos ti Dios iti karkarna a panagbinnulig iti daytoy a kasasaad. Ket ti kinaimbagna agresulta iti bunga a mabalintayo a kanen buyogen ti ragsak ken gunggona.
Ti met laeng uyokan a mismo ket paset ti nasayaat-pannakaorganisarna a pangen ti nasurok a 30,000 nga uyokan. Dadduma bantayanda ti umokda, bayat a dagiti sabsabali dalusanda wenno palamiisanda dayta. Dagiti pay sabsabali agipempenda ti nektar ken polen, pakanenda dagiti larva, wenno agsapulda kadagiti baro a gubuayan ti nektar. Inyurnos a mismo ti Dios a kasta dagiti bambanag tapno magunggonaantayo no dagita nga uyokan agpataudda iti nasam-it ken makapnek a diro a makaliwliwa iti panagramantayo.
Ti milagro iti panagbinnulig dagiti uyokan ken mulmula ken kadagiti tumatayab a mismo ket maysa laeng kadagiti adu a pammaneknek a ti Namarsua ket naan-anay a kabaelanna ti mamagbibinnulig kadagiti nabiag iti maysa ken maysa. Iti dayta, “ti Dios ket Dios, saan a ti riri, no di ket iti talna.” (1 Corinto 14:33) Apay, ngarud, nga impalubosna nga agbiag ti sangatauan iti kasta a panagsisimparat, buyogen ti ibungana a leddaang kadagiti adu? No maseknan ti Dios kadatayo, apay a nagur-uray pay laeng iti nakabaybayag unay tapno aturenna daytoy a kasasaad? Ngarud, apay a nagan-anus unay ti Dios?
Ti Sao ti Dios, ti Biblia, sungbatanna dagiti kakasta a saludsod. Daytoy a karkarna a libro kunaenna kadatayo a nagan-anus ti Dios gapu iti naimbag a rason. Ania dayta a rason? Ket kasano pay kabayag ti panagan-anus ti Dios?
[Picture Credit Line iti panid 3]
Ladawan iti parupa: Frilet/Sipa