Report Dagiti Manangiwaragawag ti Pagarian
‘Naragsak Dagiti Mabisin iti Naespirituan’
KUNA ni Jesus: “Nagasat dagiti sipapanunot kadagiti naespirituan a kasapulanda.” (Mateo 5:3) Dagiti kakasta sapulenda ti makaited-biag nga impormasion manipud Sao ti Dios, ti Biblia, ket ti panangipapusoda iti daytoy a pannakaammo ti mangiturong kadakuada iti biag nga agnanayon.—Mateo 4:4; Juan 17:3.
◻ Maysa a mabisin iti naespirituan a tao idiay maysa a daga ti Africa ti nagna iti uppat nga oras iti lam-ek ken kasipngetan tapno makagun-od ti kopia iti Ti Librok Dagiti Estoria ti Biblia. Apaman a nadanonna ti lugar a pangaskasabaan dagiti Saksi ni Jehova, isut’ nabainan unay idi naammuanna a naipaiman amin a libro. Isut’ nagtalinaed iti purok iti tallo nga aldaw agingga a magun-odan ti kanayonan nga abasto dagiti libro, ket kamaudiananna naragsakan a nangikut iti daytoy nagsayaat a naespirituan nga impormasion.
Bayat ti bulan a panagtalinaedda iti daytoy a naiputputong a lugar, nakaiwaras dagiti Saksi iti 55 a libro, 365 a broshur, ken 145 a magasin, ken nakagun-odda iti 5 a suskripsion. Nangriknada unay idi, bayat a pumanawdan, agpada nga impukkaw kadakuada dagiti nataengan ken ubbing iti Kpelle a pagsasao: “Kumuyog koma ni Jehova kadakayo!” Maar-aramid dagiti panagregget tapno masublian dagitoy.
Sabali pay a tao iti isu met laeng a pagilian ti mabisin met iti naespirituan. Daytoy a babai ket isu ti tesorera iti relihionna ken isut’ maysa nga opisial ti paglinglingayan iti pagilianna. Idi isut’ sinarungkaran dagiti Saksi, sisasangit a binigbigna a dakkel ti nagkurangan ti relihion kadagiti kalikagum ti Biblia iti Kinakristiano. Impakita kenkuana dagiti Saksi manipud mismo a Bibliana no kasano a mailasin ti pudno a relihion. Kalpasanna tinabunnuanna dagiti dua a gimong idiay Kingdom Hall ket kalpasanna inyebkasna: “Ti nakitak ken nangngegko pudno nga inallukoynak a daytoy ti kinapudno.” Isut’ nasdaaw kadagiti gimong ken ti kababalin dagidiay timmabuno. Nakitana a dagiti imbaga kenkuana dagiti Saksi a simmarungkar kenkuana ket saan a banag a parparboda laeng no di ket daytat’ agpayso. Nanipud idin isut’ nangalan kadagiti addang tapno waswasennan ti pannakainaigna iti relihionna, ket nagresulta daytoy iti maysa a naimbag a pammaneknek idiay komunidad.
◻ Maysa nga agtutubo a katesista a taga Melanesia idiay New Caledonia ti mabisin iti naespirituan. Isut’ nakasarak iti maysa a kopia ti libro a Ti Kinapudno a Mangiturong iti Biag nga Awan Inggana iti lamisaan idiay balay ni nanangna, ket binasana ti kapitulo 2 ken 3. Dagiti teksto ti Biblia idiay Exodo 20:4, 5 ken Juan 4:23, 24 a nausig idiay ti nangsagid iti pusona. Maitunos iti ibagbaga dagitoy a kasuratan, inimtuodna ti padida no apay a ti Iglesia Katolika palpalugodanna ti panagusar kadagiti ladawan iti panagdayaw. Liniklikan ti padi ti saludsod. Napan ti lalaki kadagiti sabsabali pay a “Kristiano” a relihion, ngem dida naipaayan kadagiti makapnek a sungbat iti salsaludsodna. Kamaudiananna inkeddengna a tabunuan ti gimong dagiti Saksi ni Jehova kaduana ni nanangna, isu a nangiparangarangen iti interesna iti kinapudno. Ti ayat a naimatanganna kadagiti Saksi ken dagiti naibatay-Biblia a pannursuroda ti namagsiddaaw unay kenkuana.
Agpapan pay adayo a nagbabaetan, isut’ kankanayon a makikalugan tapno tumabuno kadagiti gimong, sipapartak a nangala iti takderna iti kinapudno, ken isut’ nabautisaran. Maysa itan a ministerial nga adipen. Ni nanangna ken dua kadagiti kakabsatna iti lasag ti nagbalinda met a Saksi ni Jehova. Ti agtutubo a lalaki nangasaba iti mismo a tribona ket nakairugi iti adu a panagadal ti Biblia. Adu itan ti tumabtabuno kadagiti gimong iti daytoy a lugar—gapu amin daytoy ta nakita ti agtutubo a lalaki iti lamisaan ti maysa a libro a mangilawlawag ti Biblia, inadalna dayta, ken impapusona ti naadalna.
Ni Jehova ket addaan naindaklan a programa ti naespirituan a panagpakan a madama ita a maar-aramid, ket umariwekwek dagiti magunggonaan iti dayta. Mayanatup ti panangipadto ni Isaias maipapan iti dayta idi kunana: “Adtoy! Dagiti adipenko mangandanto, ngem dakayo [dagiti kameng ti ulbod a relihion] mabisinankayto.” (Isaias 65:13) Naragsaktayo no magunggonaantayo manipud probision ni Jehova maipaay iti panangpennekna ti naespirituan a bisintayo.