Report Dagiti Manangiwaragawag Ti Pagarian
Panangpennek Kadagiti Mabisinan iti Naespirituan—Idiay Eskuelaan
“NARAGSAK dagiti sipapanunot iti naespirituan a kasapulanda,” kinuna ni Jesus iti Sermonna iti Bantay. (Mateo 5:3) Adu nga ages-eskuela ti mawaw iti pannakaammo maipapan iti Dios ken kadagiti nakaskasdaaw a panggepna. Kayatda a masungbatan dagiti saludsod maipapan iti biag ken kayatda a maammuan no kasano ti rumbeng a panagbiagda tapno magun-odan ti pabor ti Dios ken agbalin a naragsak. Napaneknekan daytoy iti maysa nga eskuelaan idiay British Virgin Islands. Kastoy ti insalaysay ti maysa kadagiti Saksi ni Jehova sadiay:
◻ “Timmabunoak iti miting dagiti mannursuro ken nagannak iti lokal nga eskuelaan, ket napagsasaritaanda ti maipapan iti droga, panaginum, panag-date, panagbuya iti TV, grado, ken dadduma pay a banag, isu nga intugotko ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo ken impakitak iti prinsipalda. Kalpasan a sinukimatna ti libro, kinunana a dayta ti kasapulanda ken dinamagna no mabalin nga ibunongan dagiti 120 nga estudiante iti dayta nga eskuelaan. Pinagsasaritaan dagiti panglakayen iti kongregasion dayta a banag ket nagnunumuanda nga idonar dagiti libro iti eskuelaan. Idi imbagami daytoy, kiniddaw dagiti mannursuro nga ipakitami dagiti libro kadagiti estudiante. Dua a Saksi ti napan, ket napno ti kuarto iti estudiante nga agur-uray kadakuada. Nagsao dagiti kakabsat a lallaki iti kaguduat’ oras, ken imbasada dagiti kapadasan manipud kadagiti magasin ti Watch Tower Society a mangipakpakita no kasano a nakatulong daytoy a libro kadagiti agtutubo ken natataengan. Kalpasanna inwarasda dagiti libro kadagiti magagaran nga estudiante.”
Makaparagsak a maammuan nga us-usaren ti eskuelaan dayta a libro kas paset ti leksion iti maikapat ken maikalima a tawen iti elementaria. Talaga a sungbatanna dagiti saludsod dagitoy nga estudiante maipapan iti biag ken iti masanguanan.
Panangpennek Kadagiti Mabisinan iti Naespirituan—Idiay Papua New Guinea
Ti sumaganad a kapadasan ket naggapu iti agdaldaliasat a manangaywan. Inyilustrarna no kasanot’ kabisin iti naespirituan dagiti tattao iti dayta a pagilian ken no kasanot’ kaepektibo dagiti naibasar-Biblia a publikasiontayo iti panangpennek ti bisinda.
◻ “Idi saanko a nasarungkaran ti ili ti Kamberatoro,” kinuna ti manangaywan, “binusbosko ti tiempok a nakipagtrabaho iti bassit a kongregasion iti Vanimo. Adu ti interesado sadiay. Adu a taga Bewani ti nangala iti literatura. Maysa a lalaki ti nangawis kaniak a mapan ken sumarungkar iti daytoy nga ili, ken impaayannak iti pagdagusan. Pagaammon dagiti tao ti literaturatayo. Tunggal mapankami iti ili ti Vanimo, maibus amin a literatura uray no tallo a karton ti libro ti awitmi. Ti Librok Dagiti Estoria ti Biblia ket naibilang a kas kapateg ti balitok. Birbiruken dagiti tao dayta. Nagdaras a naipaima dagiti libro nga intugotko. Idi impakitami kadagiti tattao dagiti literaturatayo, kuna dagiti dadduma: ‘Ayanna ti amarilio a libro?’ Nagpedido iti innem ti maysa a lalaki. Intedna kaniak ti nagan ken ti direksionna sana imbaga nga ipabrodkaskonto dayta iti radio no addan. Nagudong ngarud tapno alaenna.” Innayon pay ti agdaldaliasat a manangaywan: “Idiay Vanimo, adu ti nangala iti libro a Ti Panangbiruk ti Sangatauan iti Dios ken Dagiti Saludsod nga Iyimtuod ti Agtutubo—Dagiti Sungbat nga Epektibo.”
Inyilustrar daytoy no kasanot’ kabisin dagiti nasingpet panagpuspusona a tattao iti naespirituan a taraon a masarakan iti Biblia ken kadagiti publikasion nga ipapaay ni Jehova babaen ti “matalek ken naannad nga adipen.” (Mateo 24:45-47) Anian a ragsak dagiti Saksi ni Jehova a tumulong kadagitoy a tattao a mabisin iti kinapudno!
[Ladawan iti panid 19]
Panangasaba idiay Papua New Guinea