Apresiarenyo Kadi ti Naindagaan nga Organisasion ni Jehova?

KUMITAKAYO Iti nasayaat pannakapisina, naranga a diamante, ket ania ti makitayo? Maysa a gameng a pudno a nakaim-imnas. Ita utobenyo dayta a diamante iti mikroskopio, ket ania ti makitayo? Nalabit adda dagiti kutdis, bir-i, dagiti nailaok, wenno sabsabali pay a mapilaw.

Dadaelenyo kadi wenno tagibassitenyo ti diamante gapu laeng iti langana idiay mikroskopio? Siempre saan! Umadayo kay la bassit manipud mikroskopio, ket maapresiaryo pay laeng ti imnas ken naidaddaduma a rimat a mamagbalin iti dayta a mangartap kadagiti sabsabali pay a napateg a bato.

Kas iti diamante, ti naindagaan nga organisasion ni Jehova ket naidumduma met kadagiti adu a pamay-an. Awan sabali nga organisasion ditoy daga ti mangtagtagiragsak ti nasinged a pannakirelasion iti Namarsua. Iti maysa a surat kadagiti umuna-siglo a napulotan a Kristiano, a nangtagipateg iti nailangitan a namnama, nagibatayan ni apostol Pedro daytoy a naisangsangayan a pannakirelasion. Kunana: “Dakayo ti ‘napili a kaputotan, naarian a kinapadi, nasantuan a nasion, ili a kukua ti Dios.’” (1 Pedro 2:9) Ita maysa a dakkel a bunggoy dagiti “sabsabali a karnero,” nga addaan namnama iti biag nga agnanayon ditoy daga, ti nakitiponen kadagiti natda ti dayta “nasantuan a nasion” iti panagdayaw iti Dios. (Juan 10:16) Agkadua dagitoy a dua a grupo a mangbukel ti maysa nga organisasion a naisangsangayan kas ti maysa a naimnas ken naidaddaduma a bato a diamante.

Liklikan ti Panangmatmat kadagiti Sabsabali Buyogen ti Nauyaw a Mata

Ngem rebbeng a bigbigentayo a daytoy a sangalubongan nga organisasion ket buklen dagiti imperpekto a tattao. Gapuna, aniat’ mapasamak no matmatantayo dayta iti piguratibo a mikroskopio? Wen, makasaraktayo kadagiti managbasol a pagannayasan ken pakapilawan ti personalidad kadagiti indibidual a paset dayta.​—Roma 3:23.

Inaklon ni apostol Pablo nga adda kakasta a pakapilawanna. Kunana: “No tarigagayak nga aramiden ti naimbag, ti dakes sumango kaniak.” (Roma 7:21) Tunggal Kristiano mapasaranna ti kasta a panagsimparat. Amin ket makaaramid kadagiti biddut. Kasta met, inton kua adu ti agsagaba gapu kadagiti biddut ti sabali a tao. Rebbeng kadi a maupaytayo wenno maikkatan namnama no rumuaren dagiti pakapilawan ken kinaimperpekto dagiti pada a Kristiano? Rebbeng kadi a kissayan dayta ti panangapresiartayo iti organisasion ni Jehova? Siempre saan! Imbes ketdi, rebbeng nga umadayotayo iti mikroskipio, no iyar-arig, ket isardengtayo ti panangmarangmang kadagiti kinaimperpekto dagiti indibidual.

Ilista dagiti Kasuratan dagiti adu a kababalin a mangilasin kadagidiay a pagan-andaran ti nasantuan nga espiritu. Dadduma kadakuada ket “ayat, rag-o, talna, mabayag a panagitured, kinaanus, kinalaing, pammati, kinaemma, panagteppel.” (Galacia 5:22, 23) Maisupadi, dagiti relihiuso, napolitikaan, ken organisasion ti negosio daytoy a lubong masansan nga iparangda ti ibagbaga ti Biblia nga ar-aramid ti lasag: “guranggura, ringringgor, im-imun, panagpungpungtot, panagsususik, panagsisina, panangilkillo ti pammati, ap-apal, panagbarbartek, panagragragsak nga aglablabes, ken bambanag nga umas-asping kadagitoy.” (Galacia 5:20, 21) Ngarud, kas rumimrimat a diamante kadagiti gagangay a batbato, naidumduma ti ili ni Jehova iti tengnga ti narugit iti naespirituan a lubong.​—Mateo 5:14-16.

“Maibagay a Nakikaykaysa iti Isu met Laeng a Panunot”

Maysa a naisangsangayan a tampok ti diamante isut’ nagdedekket, nairut panagkakamangna nga atomiko a sangalna. Umasping unay, iparparangarang ti naindagaan nga organisasion ni Jehova ti di maartapan a panagmaymaysa iti doktrina ken panagkakabsat. Dagidiay a paset dayta nga organisasion iyaplikarda ti balakad a masarakan iti Biblia idiay 1 Corinto 1:10, nga agkunkuna: “Dawatek ngarud kadakayo, kakabsat, gapu iti nagan ni Apotayo a Jesu-Kristo a sawenyo amin koma ti maymaysa a banag, ket awan koma dagiti panaglalasin kadakayo, no di ket naan-anay koma ti panagtitimpuyogyo iti maymaysa a panunot ken maymaysa a panagrikna.”

Napagballigian metten dagiti Saksi ni Jehova ti panangidumduma ti rasa ken panangitangsit iti pagilian. Iti kaadda kadakuada “ti sirib manipud ngato,” dida ‘mangidumduma.’ (Santiago 3:17) Ipadayagtayo ni Jehova iti naaramidanna iti daytoy a banag iti maysa nga organisasion a buklen dagiti imperpekto a tattao.

Maisupadi, ti magasin a The Christian Century, iti panagsaona maipapan ti tawen a 1990, inlanadna a “ti lubong kasla ad-adda pay itan a nabingaybingay babaen kadagiti relihiuso a partido ken babaen kadagiti rikrikna a maipaay iti tribo wenno nasion a naisinggalut kadagiti relihiuso a pammati. Manipud India agingga iti Europa ken manipud Makintengnga a Daya agingga iti Pacifico, nakilaoken ti relihion kadagiti kinasungdo iti tribo ken nasnasion​—masansan buyogen dagiti resultana a napolitikaan-nagtaudanna a kinaranggas.” Nalawag, dagidiay nga agtarigagay nga agserbi iti Dios dumasigda laeng iti maymaysa nga organisasion a mangtagtagiragsak ti espiritu ken pammendision ni Jehova.

‘Inaramidko ti Mugingmo a Kas Diamante’

Ti diamante isut’ katatangkenan pay laeng a bato nga ammo ti tao. Tukoyen ti Biblia ti panagusar kadagiti diamante iti panangkur-it wenno panangkitikit kadagiti natangken a material. (Jeremias 17:1) Siputanyo, met, dagiti sao ni Jehova ken Ezequiel: “Adtoy! Pinatangkenko ti rupam a kas katangken dagiti rupada ken ti mugingmo kas katangken dagiti mugingda. Inaramidko ti mugingmo a kas diamante, natangtangken ngem bato a pagpingkian.” (Ezequiel 3:8, 9) Inikkan ni Jehova ni Ezequiel ti kas katangken diamante a determinasion a namagbalin kenkuana nga agipadto iti nasulpeng nga ili.​—Ezequiel 2:6.

Umasping ita, inikkan ni Jehova ti ilina iti kas diamante a kinatangken iti sango ti dakkel nga ibubusor. Inibturan dagiti Saksi ni Jehova dagiti panangiparit ti linteg, panagderraaw, panangsapsaplit, pannakakabkabil, di nainkalintegan a pannakaibalud, pannakatutuok, uray pay dagiti pannakapapatay. Ngem, impakitada a di maisin ti pammatida.

“Agrag-onto dagiti Adipenko”

Impadles ti Biblia ti maysa a panawen inton dagiti tattao maaddaanda ti “porma ti nadiosan a debosion” ngem “libakenda ti pannakabalinna.” (2 Timoteo 3:1, 5) Inreport ti maysa a pagiwarnakan a “dagiti Protestante, Romano Katoliko ken Judio maseknanda iti panagpababa ti bilang” kadagiti simbaan ken sinagogada. Dagiti Saksi ni Jehova, iti kasumbabangirna, ket napasnekda nga estudiante ti Biblia. Kadagiti umad-adu a bilang, ub-ubbing ken lallakay, lallaki ken babbai, aminda ket tumabuno kadagiti sumagmamano a linawas a gimong. Maysa a surat iti pagiwarnakan inlanadna ti maipapan kadakuada a “ti relihionda isu ti kasusudian a banag nga adda kadakuada, ket ti pakaseknanda laeng isu ti mangiranud iti dayta kadagiti sabsabali.”

Ti kasta a kababalin pagbalinenna a naidumduma ti organisasion ni Jehova kas maysa a nasudi a diamante. Ket ti dayaw mapan iti Daydiay mangpappapigsa ken mangidaldalan kadagiti imperpekto nga indibidual babaen ti nasantuan nga espirituna.

Impadto ni propeta Isaias: “Kastoy ti kuna ni Soberano nga Apo Jehova: ‘Adtoy! Dagiti adipenko mangandanto . . . Adtoy! Dagiti adipenko uminumdanto . . . Adtoy! Dagiti adipenko agrag-odanto . . . Adtoy! Dagiti adipenko agkantadanto a gapu ti rag-o ti puso.”​—Isaias 65:13, 14.

Ita makitatayo ti kaitungpalan daytoy a padto. Maseknan ti Dios iti ilina iti naidaddaduma a pamay-an! Ngarud, no makilangenkay kadakuada, dikay palubosan ti aniaman a negatibo a panunot a mangikkat iti rag-oyo. Kitaenyo ti sibubukel a buya ket laglagipenyo: Awan sabali nga organisasion ditoy daga ti mangtagtagiragsak ti naisangsangayan a panangtaripato ken pannalaknib ti Dios. Dikay pulos isardeng a tagipatgen ti pribilehioyo a panagbalin a paset dayta.