Aramidenda ti Kabaelanda

Nupay dida kabaelan a subadan ni Jehova gapu kadagiti amin a gunggona nga ipaayna kadakuada, adut’ mangaramid iti kabaelanda tapno suportaranda ti sangalubongan a panangasaba a trabaho dagiti Saksina. (Mateo 24:14; idiligyo ti Marcos 14:3-9.) Makapainteres iti daytoy a banag daytoy a surat manipud pamilia idiay Minnesota E.U.A.:

“Patgenmi a Kakabsat,

“Ipatulodmi ti donasion iti gatad ti $​—.Kiddawenmi a mausar koma daytoy para iti gastos ti sangalubongan a trabaho wenno maaramat iti Kingdom Hall Building Fund, wenno iti uray aniaman a pakasapulan ti organisasion. . . .

“Agtalekkami a daytoy a kuarta ket mausar maitunos iti pagayatan [ni Jehova]. Kayatmi nga alaen daytoy a gundaway tapno itukonmi ti pammaregtami nga itultuloyyo ti naimbag a trabaho, ken kangrunaanna pagyamanan iti videotape ti sangalubongan a panagandar ti [Watch Tower] Society. Daytoy a tape ti nangipakaammo kadakami iti kinadakkel ti trabaho, ket impabigbigna kadakami a kasapulan dagiti boluntario a donasiontayo. Nabiit pay, impabus-oymi iti kongregasion, iti sirkito, ken ti distrito ti panangipatulod kadagiti donasion kadakayo, ngem ita agyamankami ken Jehova gaput’ panagbalinna a naanus kadakami iti kinaliwaymi ken ti siaayat a panangipakitana kadakami ti kasapulan a personal nga itutulongmi iti pannakasuportar daytoy a mangispal-biag a trabaho, mainayon kadagiti sabsabali pay a porma ti donasion. Napagnunumuanmi a mangipatulod, kas maysa a pamilia, ti di kumurang ngem $​—iti binulan . . . a direkta dita Nueva York.

“Maminsan pay, pagyamanan iti nasayaat a serbisioyo kadakami ken iti impakitayo a kinamatalek ken Jehova.”