Malagipyo Pay Aya?

Siaannad kadin nga inutobyo dagiti kallabes a ruar Ti Pagwanawanan? No kasta, nalabit paginteresanyo a lagipen dagiti sumaganad:

◻ Kasano a ti rekord ti Biblia kadagiti pannakigubat ni Jehova mangted kadatayo ti panagtalek iti panangsango iti “dakkel a rigat”? (Mateo 24:21)

Gapu ta tengtenglenna dagiti bambanag, impakita ni Jehova a masiribanna dagiti kabusorna ken maimaniobrana dagiti kasasaad maipaay iti pannakaisalakan ti ilina.​—8/15, panid 27.

◻ Aniat’ rebbeng a situtulok nga aramiden dagiti nagannak tapno mataginayonda ti komunikasionda kadagiti annakda?

Masapul a mangbusbos dagiti nagannak iti tiempo a kaduada dagiti annakda. Kasta met, masapul a situtulokda a mangaramid kadagiti panagsakripisio maipaay kadagiti annakda para iti paglaingan ti mental, pisikal ken naespirituan nga idadakkelda.​—9/1, panid 22.

◻ Aniat’ adda a kaipapanan kadatayo ita ti panagbaliw ti langa ni Jesus? (Marcos 9:2-4)

Ti panagbaliw ti langana maibangonna ti pammatitayo iti naimpadtuan a sao ni Jehova ken pabilgenna ti pammatitayo ken Jesu-Kristo kas ti Anak ti Dios ken ti naikari a Mesias. Patibkerenna met ti pammatitayo iti panagungar ni Jesus iti naespirituan a biag ken parang-ayenna ti pammatitayo iti gobierno ti Dios.​—9/15, panid 23.

◻ Aniat’ kaipapanan ti “apagbiit” idiay Isaias 11:6?

Ti naannad a panangipaulog iti daytoy a bersikulo ipakitana a ti oso ken ti kordero saandanto a kankanayon nga agkuykuyog idiay baro a lubong. Nalabit a dagita nga animal addanto pay la dagiti masinunuo a taengda ket ngarud mapaglasindanto kas dagiti ‘napaamo nga animal ken dagiti narungsot nga animal’ kas idi idiay orihinal a Paraiso. (Genesis 1:24) Nupay kasta, agkakappianton dagiti animal, a makapaglalangendanto nga awanan peggad.​—9/15, panid 31.

◻ Ania ti tulbek iti pudno a Kinakristiano?

Ti ayat isu ti tulbek iti pudno a Kinakristiano. Ti pammati, ar-aramid, ken umiso a pannakitimpuyog ket nasken met, ngem no awan ti ayat saan a mailasin ti pategda. Pudno daytoy gapu ta ni Jehova isu ti katatan-okan a Dios ti ayat. (1 Corinto 13:1-3; 1 Juan 4:8)​—10/1, panid 20.

◻ Ti kadi ebkas a “panawen ti pannakaiyanak ken panawen ti ipapatay” idiay Eclesiastes 3:2 suportaranna ti kapanunotan nga inkeddengen ti Dios ti panawen ti ipapataytayo?

Saan. Isarsarita laeng ni Salomon ti agtultuloy a panagtayyek ti biag ken ipapatay a mangsapsaplit iti imperpekto a sangatauan. Ibaga ti Eclesiastes 7:17: “Dika agdangkok a napalalo, dika met agmaag. Apay a matayka koma iti sakbay ti tiempom?” Aniat’ mamaay daytoy a balakad no naikeddengen ti tiempo ti ipapatay ti maysa a tao?​—10/15, pinanid 5-6.

◻ Aniat’ sumuppiat iti panagbalin ni Pedro kas ti umuna nga obispo ti Roma?

Awan pammaneknek a binisita man la koma ni Pedro ti siudad ti Roma; ken saan man la a dinakamat ni Pedro ti bagina kas aniaman a natantan-ok ngem iti siasinoman kadagiti apostol ni Kristo. (2 Pedro 1:1)​—10/15, panid 8.

◻ Umiso kadi para kadagiti Kristiano ti agipatulod kadagiti sabong para iti pumpon?

No pagaammon a ti kustombre (wenno disenio, kas koma iti krus) ket agdama nga addaan relihiuso a kaipapananna iti lugar ti maysa a tao, daytat’ rebbeng a maliklikan. Gapuna a saan a mangipatulod dagiti Kristiano kadagiti sabong iti porma ti krus wenno usaren ida iti dadduma a pormal a pamay-an nga addaan nalawag a palso a relihiuso a kaipapanan. Nupay kasta, kadagitoy a panawen iti adu a dagdaga, nakasaksaknap ti panangipaay kadagiti sabong nga awanan relihiuso a nakainaiganna. Dadduma a Kristiano ti nangipatuloden kadagiti sabong tapno nayonanda ti liwliwa iti maysa a naladingit a pasken ken tapno ipakitada ti pannakipagrikna ken pannakaseknan.​—10/15, panid 31.

◻ Aniat’ pagminaren dagiti opisial a depinasion maipapan iti Trinidad?

Pagminarenda a ti doktrina ti Trinidad ket saan a maysa a simple nga idea. Imbes ketdi, daytat’ maysa a kumplikado a pempen dagiti kapanunotan a napagtitipon iti las-ud dagiti siglo ket nagsisinninggalutda. Adu nga eskolar, agraman dagiti Trinitariano, annugotenda a kinapudnona di laonen ti Biblia ti doktrina ti Trinidad.​—11/1, pinanid 21-22.

◻ Apay a ti 29 K.P. maysa a petsa a pangrugian ti panagkuenta iti historia ti Biblia?

Agsipud ta babaen panangitipon kadagiti umiso a Biblikal nga impormasion iti sekular a panangpetsa iti panagturay ni Tiberio, makuenta dagiti estudiante ti Biblia a ti ministerio ni Juan ket nangrugi idi primavera ti 29 K.P. ket innem a bulan kalpasanna, idi otonio ti 29 K.P., ni Juan binautisaranna ni Jesus.​—11/15, panid 31.

◻ Aniat’ kinaipapanan ti “panagdayaw” kadagiti Hebreo ti pagsasaona a tattao, ken kasano nga agaplikar daytoy kadagiti Saksi ni Jehova ita?

Ti katupag iti Hebreo ti sao a “panagdayaw” ket mabalin a maipatarus a “panagserbi.” Iti Hebreo a panangmatmat, no kasta, ti panagdayaw kinaipapananna ti panagserbi. Isu daytoy ti kaipapananna iti ili ni Jehova ita, gapuna a ti maysa a nakapatpateg a pakailasinan iti pudno a relihion ket ti nadiosan a serbisio a panangasaba.​—12/1, panid 19.