Panangapresiar iti Napateg a Sagut ti Biag

BIAG​—anian a nagpateg a sanikua! Awan maaramidantayo no awan dayta. Iti kanito a mapukaw, di maisubli dayta ti aniaman a natauan a pamuspusan. No agpeggad ti biagtayo, ikagumaantay a salakniban dayta. Ay ket, dagiti dadduma dumawatda pay iti di gagangay a tulong no mariribukanda!

Maipalagip kadatayo ti salaysay ti Biblia maipapan iti maysa a barko a nasallama ti napigsa unay a bagio iti taaw. Idi ngangnganin marba ti barko, “dagiti marinero nagbutengda ket immawagda iti tulong, tunggal maysa iti diosna.” Idi agangay, immawagda amin iti pudno a Dios: “O Jehova, dawatenmi kenka, dikami koma mapukaw.” Kunaen pay ti salaysay ti Biblia: “Imbellengda iti taaw ti nailugan a karga iti barko, tapno mapalag-anan.”​—Jonas 1:4-6, 14; idiligyo ti Aramid 27:18, 19.

Dagidiay a marinero nakasaganada pay a mangisakripisio kadagiti kakailalaanda a material a sanikua tapno maispal ti biagda. Masuktantay dagiti material a sanikua​—ngem saan ti biag. Ken gapu ta natural laeng a kailalaantayo ti biagtayo, liklikantayo ti peggad. Taraonantayo, kawesantayo, ken sustentuentayo ti bagbagitayo. Agpaagastayo no agsakittayo.

Nupay kasta, saan laeng a ti panangsurot iti nainkasigudan a panangikaluya iti bagi ti kalikaguman ti Manangted ti biag kadatayo. Ngamin ti biag ket maysa a di magatadan a sagut, ken agtaud iti kapapatgan a Persona iti intero nga uniberso. Gapu iti napasnek a panangapresiar agpadpada iti Manangted ken iti sagut, saan kadi a rumbeng a tagipatgentayo ti biag? Ken saan kadi nga iraman dayta ti pannakaseknan iti biag dagiti sabsabali?

Ditay ngarud pakasdaawan a ti Linteg nga inted ni Jehova a Dios iti nasion ti Israel inramanna dagiti bilin a nairanta a mangsalaknib iti biag ken salun-at dagiti sabsabali. (Exodo 21:29; Deuteronomio 22:8) Maseknan met koma dagiti Kristiano ita iti pisikal a kinatalgedda. Kas pangarigan, no adda babassit nga ubbing iti pagtaenganyo, awanan annad kadi a panawanyo lattan dagiti banag a nalaka a magaw-at kas ti baloryo, tulaing, aspili, aripit ken dadduma pay, wenno natatadem a bambanag a makadangran iti ubing a mangay-ayam wenno makatilmon kadagita? Iduldulinyo kadi dagiti napeggad a kemikal ken agas iti lugar a di magaw-at dagiti ubbing? No adda naisuyat a danum iti suelo, punasenyo kadi a dagus dayta tapno maliklikan ti aksidente? Ipatarimaanyo kadi a dagus dagiti elektrikal nga alikamen nga adda deperensiana? Regular kadi a manmantenirenyo ti luganyo? Naannadkay kadi nga agmaneho? No pudno met laeng a tagipatgenyo ti biag, matignaykay la ketdi a mangsalimetmet kadagiti rasonable a panagannad kadagitoy ken iti umasping a bambanag.

Ngem makapaladingit ta dadduma tagibassitenda ti mismo a biagda. Kas pangarigan, asino aya ti di makaammo ita a ti panagsigarilio ket makadangran iti salun-at? Kaskasdi, riniwriw dagiti naigamer iti dayta a bisio, idinto ta madadael ti salun-atda tunggal mangsusopda iti makasabidong nga asuk. Dagiti dadduma abusuenda dagiti droga, dagiti dadduma alkohol, amin daytoy iti pakadangranda. Ti AIDS ket maysa a makapapatay a sakit nga awan pay natakkuatan nga agasna. Ngem adu koma ti nailisi iti daytoy a sakit no liniklikanda ti seksual nga imoralidad, dadduma a kita ti panangabuso iti droga, ken panangyalison iti dara. Anian a nakalkaldaang a kinaawan ti panangapresiar iti biag!​—Roma 1:26, 27; 2 Corinto 7:1.

Posible ti Panagbalbaliw!

Dagidiay mangapresiar iti Naindaklan a Namarsua[da], ni Jehova, adda nabileg a rasonda a matmatan ti biag a napateg. Ti biag isut’ sagrado a sagutna. Situtulokda ngarud a mangaramid iti aniaman a kasapulan a panagbalbaliw tapno matmatanda dayta kas sagut ti Dios. Usigenyo ti kapadasan ni Kwaku, maysa a maestro idiay Ghana. Maysa a napeklan nga alkoholiko, sinaysayangna ti biagna.

Malagip ni Kwaku: “Pinadasko a piliten ni baketko a raemennak, a masansan a nakaigapuan ti nakaro a panagsubang ken panagapami, aglalo no nabartekak. Gapu iti pannakaigamerko iti alkohol, masansan a maibusanak iti kuarta, ken kanayon a mabaybay-ak ti pinansial a kasapulan ti pamiliak. Kaluksaw unay ngarud ni baketko daytoy. No maibusanak iti kuarta (ket kanayon a napasamak daytoy), ipamuspusak ti pannakataginayon ti bisiok. Naminsan inusarko payen para iti bagik dagiti kuarta a nakolektak kadagiti estudiantek a pagparehistroda koma iti eksamenda. Napanak nakiin-inninum ket ingatgatangak pay ti arak dagiti kain-inninumko. Di nagbayag dimteng ti aldaw nga apitek ti supapak dagiti inar-aramidko. No saan a gapu iti naintiempuan nga ibaballaet ti prinsipal ti eskuelaan, napukawko koman ti trabahok.

“Nakaal-alas ti panagbiagko. Nalaus ti bainko, ngem idi agangay naikkatko dayta. Pinampanunotko ti agbekkel ta mariknak nga awanen mamaay ti biagko. Kaskasdi, diak maisardeng ti kinamammartekko. Ngem iti maysa nga aldaw a naipasungalngalak iti gulo ken binagsoldak iti maysa a pagiinuman, naamirisko a ti panagayatko iti alkohol mabalin nga isunto pay ketdi ti pakatayak.

“Idi a tiempo, regular a sumarungkar dagiti Saksi ni Jehova iti pagtaenganmi, a padpadasenda nga alaen ti interesmi iti Biblia. Kanayon a liklikanmi ida ken baket gapu ta impagarupmi a makadisturboda. Ngem iti maysa a gundaway, inkeddengko ti umimdeng kadakuada gaput’ asi. Ti panagadal iti Biblia di nagbayag linuktanna dagiti matak iti nakaskasdaaw a namnama ti panagbiag nga agnanayon iti baro a sistema ti Dios. Idi ad-adda nga inadalko ti Biblia iti tulong dagiti Saksi ni Jehova, immuneg ti panangapresiarko ken Jehova kas Manangted-Biagtayo ken iti sagutna a biag, ken ad-adda a naawisak iti kinapraktikal ti pammagbaga ti Biblia. Daytoy ti nangparegta pay kaniak a mangdalus iti biagko. Saan a nalaka daytoy, ngamin nasken a kanayon a sarangtek ti arak agraman dagiti dati a kakaduak. Nakita ni Jehova, ti Manangdengngeg iti kararag, ti determinasion ti pusok ket dinengngegnak.a

“Ti asawak, nupay saan a maysa kadagiti Saksi ni Jehova, ket raraemennak itan ken ti relihionko gapu iti dakkel a panagbalbaliw a makitana iti biagko ken iti relasionmi. Din kasapulan nga anawaendakami dagiti kaarrubami ta saankamin nga agap-apa. Tagipatgek ti talna ti panunot a tagtagiragsakek itan. Pudno la unay, ti panangapresiar ken Jehova a Dios kas ti Manangted-Biagtayo, panangbigbig iti panangmatmatna iti kinapateg ti biag, ken panagtulnog kadagiti pannursurona no kasano ti agbiag isut’ kakaisuna a makagunggona a wagas ti panagbiag.”

Ti Tukon ti Dios a Biag nga Agnanayon

Rinibo, kas ken Kwaku, ti natulonganen dagiti Saksi ni Jehova a “mangikawes iti baro a personalidad a naparsua a maitunos iti pagayatan ti Dios iti pudno a kinalinteg ken kinasungdo.” (Efeso 4:24) Apresiarenda saan laeng a ti agdama a biagda no di ket uray ti namnama ti biag nga agnanayon iti naindagaan a paraiso. Ikari ti Biblia nga iti Paraiso nga aramiden ti Dios, awanton ti agnaed iti daga ti makapasar manen iti di agsarday a saem ti bisin, ta “ni Jehova dagiti buybuyot agaramidto kadagiti amin nga inilin-ili . . . iti maysa a rambak dagiti nalukmeg a banag.”​—Isaias 25:6.

Iti agdama, ti biag, nupay maysa a nakaskasdaaw a sagut, ket temporario laeng. Matay ti tunggal maysa, ket anian a nakakaskas-ang ti ipapatay! Talaga a makapaladingit unay nga imatangan ti ipapanaw ti ingungotenyo nga agturong iti tanem. Ngem iti sidong ti Pagarian ti Dios, nga iturayan ni Kristo, matungpalto ti kari ni Jehova: “Awanton ni patay, ket awanto metten ti sasaibbek wenno sangsangit wenno rigrigat. Ta dagidi immuna a bambanag napalabasdan.”​—Apocalipsis 21:4.

Iti dayta a tiempo pumautto ti sagut ti biag iti nakaskasdaaw a pamay-an. Dagiti nakalasat iti maudi a rigat iti daytoy a daga maaddaandantot’ gundaway a sumrek iti kinaan-anay ti biag. Ket kalpasanna, babaen ti panagungar, panangisubli iti biag, isublinto ni Jehova a Dios daytoy di magatadan a sagut uray kadagidiay matmaturog ken patay. (Juan 5:24, 28, 29) Kaipapanan daytoy ti isusubli dagiti ingungoten a minatay ken dagiti managbuteng-Dios a lallaki idi ugma!

Narigat kadi a patien dagitoy? Saan, ta “awan ti sao nga agtaud iti Dios a di adda pannakabalinna.”​—Lucas 1:37; idiligyo ti Job 42:2.

Mainayon pay, nangipaay a mismo ni Jehova a Dios iti sangatauan iti pammatalged a mapasamakto amin daytoy. Kasano? Babaen panangisakripisiona iti kapapatgan iti pusona, ti dungdungnguenna nga Anakna, ni Jesu-Kristo, tapno subbotennatayo manipud basol ken ipapatay. Ipanamnama kadatayo ti Roma 8:32: “Daydi [ni Jehova a Dios] saan a nangipaidam iti Anakna met laeng no di ket inyawatna gapu kadatayo amin, dina aya iparaburto kadatayo dagiti amin a banag a mairaman kenkuana?” Kunaen ti Biblia kadatayo nga iramanto daytoy ti panangdalus iti sangatauan iti moral a kinarugit ken panangikkat iti amin a kita ti panangirurumen, krimen, ken kinaranggas. (Isaias 11:9) Dinton mamatmatan ti biag kas nalaka.

Uray itatta, iti sidong dagiti imperpekto a kasasaad, makaparagsak ti biag. Asino ti di maay-ayo iti makaawis nga ayamuom ti taraon, ti pul-oy iti nabara nga aldaw, ti buya ti narimbaw a bantay, ti nangayed nga ilelennek ti init, ti natalinaay nga ayus ti waig, ti makakayaw a sabsabong a nagdudumat’ marisna, ti uni ti nasam-it a sam-iweng, wenno ti uni dagiti tumatayab? Agsarimadengkayo biit. Panunotenyo, ania ngatat’ kasasaad iti panangtagiragsak kadagita a bambanag iti agnanayon?

Nainsiriban aya ngarud nga iwaksi ti nagpateg a pribilehio ti panagbiag nga agnanayon gapu iti apagbiit laeng a ragsak nga itukon ti minamaag, napalamlam a panagbiag? (Idiligyo ti Hebreo 11:25.) Nainsiriban a gutugotennatayo ti Biblia ‘nga agbiagtayo, saanen a maipaay kadagiti derrep dagiti tao, no di ket maipaay iti pagayatan ti Dios.’ (1 Pedro 4:2) Naimpusuan a paregtaendakayo, wen, gutugotendakayo, nga aramidenyo dayta babaen ti panangadal iti Sao ti Dios, ti Biblia, ken panangalagad kadagiti masursuroyo. (Juan 13:17) Iti kasta maaddaankayto iti nasayaat a relasion ken Jehova, ti Dios nga aglaplapusanan iti kinaimbag ken kinamanangaasi, a makabael a manggunggona kadakayo iti biag nga awan inggana!

[Footnote]

[Ladawan iti panid 5]

Ti kadi wagas ti panagbiagyo iyanninawnat’ panangapresiar iti biag?

[Ladawan iti panid 7]

Ti baro a lubong ti Dios palubosannatayto a mangtagiragsak kadagiti pakaragsakan ti biag iti agnanayon!