Report Dagiti Manangiwaragawag ti Pagarian
Pagsilsilnagenda ti Lawagda Idiay India
MAIKASKASABA ti naimbag a damag ti Pagarian idiay India babaen kadagiti 11,524 a nararagsak a Saksi. (Mateo 24:14) Dagiti 1,066 a nabautisaran bayat ti 1991 a tawen serbisio ket manangiwaragawagda ti Pagarian, a pagsilsilnagenda ti lawagda kadagiti sabsabali. Anian a ragsakda a nakakita iti 28,866 a timmabuno iti pannakarambak ti Panglaglagip iti ipapatay ni Kristo!
◻ Adu ti damo a nakaammo iti namnama ti Pagarian gapu iti impormal a panangsaksi. Kas pangarigan, nakisao ti maysa a Saksi maipapan iti Pagarian kadagiti katrabahuanna, a padana a karpintero. Nangipangag ti maysa a katrabahuan ket rinugianna a pagsilnagen ti lawagna iti pamiliana ken kadagiti gagayyemna. Siraragsak nga inranud met dagitoy daytoy nakaskasdaaw a mensahe ti Pagarian kadagiti sabsabali. Sigun kadagiti report, iti las-ud ti sumagmamano laeng a tawen, ‘nasurok a 30 a tao ti immawat iti kinapudno.’ Isut’ binendisionan ni Jehova ken dagiti baro a naespirituan a kakabsatna gaput’ panangisilnagda iti lawagda.
◻ Maysa nga agtutubo a kabsat a lalaki iti sabali a kongregasion ti nangisilnag iti lawagna babaen impormal a panangsaksi kadagiti kaeskuelana. Dadduma kadakuada ti interesado iti namnama ti Pagarian, ken masansan nga inlawlawagna ti Biblia kadakuada inggana iti labes ti ngalay ti rabii. Maysa kadakuada, maysa a Katoliko, ti nangala iti natibker a takder maipaay iti kinapudno agpapan panangballaag kenkuana ti padi kadagiti nakaro a pagbanagan no itultuloyna ti makitimpuyog kadagiti Saksi. Nupay kasta, kumbinsido ti estudiante a makaad-adal manipud kadagiti Saksi iti kinapudno ti Biblia, ket intultuloyna ti nanggun-od iti pannakaammo. Idi agangay isut’ nabautisaran ket agserserbi itan kas maysa a ministerial nga adipen iti kongregasion. Isut’ agrag-o iti namnama nga aggapu iti nakaskasdaaw a lawag ti kinapudno!—Roma 12:12.
◻ Ti sabali pay nga immimdeng iti daytoy agtutubo a saksi ket maysa a nalatak nga estudiante, maysa nga ateista, a nangrabrabak kadagidiay mamati iti Dios, ngem maysa nga aldaw isut’ nakiraman iti saritaan ket adut’ insalsaludsodna. Isut’ nagsiddaaw kadagiti nalawag a sungbat kadagiti saludsodna ket nakumbinsir a ti Biblia ket Saot’ Dios. Isut’ rimmang-ay iti pannakaammona iti Biblia ket kamaudiananna nagpabautisar. Isut’ binusor ti Hindu nga amana ket pinagtalawna iti pagtaenganna. Nupay kasta, ti natibker a takder daytoy nga agtutubo maipaay iti kinapudno ket nagunggonaan idi a ti dua kadagiti kakabsatna a lallaki ken dua a gagayyemna ket inawatda ti kinapudno ken nabautisaran. Maysa kadagiti kakabsatna a lallaki ti agserserbi itan iti sanga nga opisina idiay India.
◻ Maysa nga estudiante a manangorganisar ti nakiraman met kadagiti saritaan a kaduada ti agtutubo a Saksi. Isut’ maysa a napeklan a mannigarilio ken mammartek. Naminsan, kayatna a kabilen ti dua a kaeskuelana a nakasursuro iti kinapudno manipud iti Saksi. Gaput’ panangawatda iti kinapudno, nagkedkedda a makipaset iti protesta iti kolehio ken mangidonar iti dara bayat ti kampania a panangurnong iti dara nga indauluan ti estudiante a manangorganisar. Daytoy nga agtutubo a lalaki ket maysa itan a naragsak a manangawit-lawag a Saksi ni Jehova.
◻ No pagdadagupen, daydiay estudiante nga immuna a nangisilnag iti lawagna ket nagbalin nga instrumento iti panangtulong kadagiti 15 a kapatadana nga agturong iti dedikasion ken bautismo babaen impormal a panangsaksi kadakuada.
Makaparagsak a makita nga adu iti dayta nalawa a pagilian ti umaw-awat iti namnama iti baro a lubong ti Dios nga adda iti Biblia ken makitimtimpuyog iti sangalubongan a panagkakabsat nga ur-urnongen ni Jehova a Dios nga agbiag nga agnanayon iti sidong ti Pagarianna.