Asino ti Anamongan ti Dios?

KAYATTAY amin a tarigagayandatayo dagiti kalangenlangentayo. No iti maysa a Kristiano nangnangruna a tarigagayanna ti anamong ti Dios. Maipapan ken Jehova a Dios, kinuna ti Salmo 84:11: “Parabur ken dayaw ti ipaayna. Ni Jehova mismo saanna nga ikedked ti naimbag kadagiti magna a sililinteg.” Iti pannakayanak ni Jesus, inkari ti naragsak a kanta dagiti nailangitan nga anghel ti “kappia ditoy daga kadagiti tattao nga anamonganna!”​—Lucas 2:14, Moffatt.

Ngem asino ti anamongan ti Dios? Agpada kadi dagiti pagrukodan ti Dios iti tao? Nalawag a saan, kas impakita ti napalabas nga artikulo. Kinaagpaysona, yantangay nabalakadan dagiti Kristiano nga “agbalin[da] a tumutulad iti Dios,” nasayaat a saludsoden ti tunggal maysa kadatayo, Anamongak kadi dagiti tattao nga anamongan ti Dios, wenno agannayasak a sumurot kadagiti nailubongan a pagrukodan iti panangmatmatko kadagiti tattao? (Efeso 5:1) Tapno magun-odan ti parabur ken anamong ni Jehova, rebbeng a matmatantayo dagiti bambanag sigun iti panangmatmatna.

Dagiti Nangatngato a Pagrukodan ti Dios

“Ti Dios saan a mangidumduma,” kinuna ni apostol Pedro, “no di ket iti uray ania a nasion ti tao nga agbuteng kenkuana ken agaramid iti kinalinteg makaay-ayo kenkuana.” Pinaneknekan met ni apostol Pablo a ti Dios “iti maymaysa a tao inaramidna a pagtaudan dagiti amin a nasion dagiti tao.” (Aramid 10:34, 35; 17:26) Gapuna, nainkalintegan laeng nga ibaga nga agpapada amin a tao iti imatang ti Dios aniaman dagiti pisikal a galadda. No kasta, saan a maiparbeng nga idumduma ti maysa a Kristiano ti maysa a tao gapu laeng iti ili a naggapuanna wenno kolor ti kudilna wenno rasa a nagtaudanna. Imbes ketdi, nasayaat a surotenna ti Ulidanna, ni Jesu-Kristo, a maipapan kenkuana, uray dagiti kabusor inaklonda nga awan indumdumana.​—Mateo 22:16.

No dadduma mausar ti balikas nga “skin-deep” a mangiladawan iti maysa a banag a narabaw wenno saan a napateg. Maikuna dayta iti kolor ti kudil; saan a napateg dayta. Saan nga iyanninaw ti kolor ti kudil ti maysa a tao ti kinataona wenno dagiti makin-uneg a galadna. No iti panangpili iti pakialamanuan, pakipanganan, wenno pakidakulapan, saan koma a ti kolor ti kudil ti kitaentayo. Laglagipenyo, ti balasang a nangparugso iti dadduma kadagiti kapintasan ken kalailuan a daniw a naputar kinunana maipapan iti bagina: “Pugotak ngem naimnasak, . . . kayumanggiak, agsipud ta ti init kinessetnak.” (Canta ni Salomon 1:5, 6) Saan a nainkalintegan a pangibatayan ti rasa wenno kolor iti panangipakita iti panagraem. Ti napatpateg ket no ti maysa agbuteng met laeng iti Dios ken agar-aramid iti kinalinteg.

Kasanot’ panangmatmat ti Dios iti panangikut iti material a kinabaknang? Kadagiti amin a tattao nga inay-ayat ken pakaay-ayuan ti Dios, ti kangrunaan isu ti Anakna, ni Jesu-Kristo. Kaskasdi, idi adda ditoy daga, ni Jesus “awanan iti pangisaadanna ti ulona.” (Mateo 8:20) Awan daga, balay, talon, kaykayo nga agbunga, wenno animalna. Ngem isut’ rinaem ni Jehova ket intan-okna iti saad a nangatngato ngem iti asinoman iti sapasap malaksid iti Dios mismo.​—Filipos 2:9.

Inanamongan ti Dios ni Jesu-Kristo agsipud ta isut’ nabaknang saan a kadagiti material a sanikua no di ket kadagiti naimbag nga aramid. (Idiligyo ti 1 Timoteo 6:17, 18.) Binalakadanna dagiti pasurotna: “Isardengyo ti agurnong kadagiti gupgupit nga agpaay kadakayo ditoy daga, isu a ti sanga ken ti lati dadaelenda ida, ken isu a dagiti mannanakaw kalien ken takawenda. Ngem agurnongkayo kadagiti gupgupit sadi langit, isu a ti sanga ken ti lati dida dadaelen ken isu a dagiti mannanakaw dida kalien ken takawen.” (Mateo 6:19, 20) Gapuna, imbes a dagiti laeng nabaknang kadagiti sanikua daytoy a lubong ti raemenda, saan a mangidumduma dagiti Kristiano gapu iti nailubongan a sanikua. Sapulenda dagidiay nabaknang iti Dios, nabaknangda man wenno napanglaw iti material. Dikay pulos liplipatan a “pinili ti Dios dagiti napanglaw no maipapan itoy lubong, a maipaay iti kinabaknang iti pammati ken agtawid iti Pagarian.” (Santiago 2:5) No salimetmetanyo ti panangmatmat ti Dios, dikayto pulos matnag iti kadawyan nga aramid a panangidumduma kadagiti nabaknang iti material.

No maipapan iti edukasion, nalawag nga ipakita ti Biblia a paregtaennatayo ti Dios a gumun-od iti pannakaammo ken sirib ken ni Jesu-Kristo ti katan-okan pay laeng a mannursuro a nagbiag ditoy daga. (Proverbio 4:7; Mateo 7:29; Juan 7:46) Ngem saan a ti nailubongan a sirib wenno edukasion ti mangay-ayo iti Dios. Maisupadi ketdi, kunaen kadatayo ni Pablo a “saan nga adu a mamasirib iti linalasag ti naayaban, . . . no di ket pinili ti Dios dagiti bambanag a kinamaag ti lubong, tapno babainenna dagiti mamasirib.”​—1 Corinto 1:26, 27.

Anamongan ti Dios dagidiay edukado, saan a kadagiti nailubongan a sursuro kadagiti kolehio wenno unibersidad, no di ket iti “nadalus a pagsasao” ti kinapudno a masarakan iti Saona, ti Biblia. (Sofonias 3:9) Kinaagpaysona, isursuro ni Jehova mismo ti ilina ita babaen ti edukasional a programa nga agsaksaknap kadagiti adayo a suli ti daga. Kas impadto ni mammadto Isaias mangipangpangag dagiti tattao iti amin a nasion a kunkunada: “Sumang-attayo iti bantay ni Jehova, iti balay ti Dios ni Jacob; ket isuronatayonto kadagiti dalanna, ket magnatayonto kadagiti danana.” Gapuna, imbes nga idaydayawda ti sekular nga edukasion, sapulen dagiti Kristiano dagidiay a babaen dagiti sao ken aramidda paneknekanda a pudno a “tattaoda nga insuro ni Jehova.” Iti kasta, tagiragsakenda ti ‘dakkel a talna’ nga ited ti Dios.​—Isaias 2:3; 54:13.

Magun-odantayo ti Anamong ti Dios

Wen, naigiddiat unay manipud iti tao dagiti pagrukodan ti Dios iti panangraem kadagiti sabsabali. Nupay kasta, masapul a pagreggetantay a paiwanwan kadagiti dalanna no kayattayo nga anamongannatayo. Kaipapanan dayta a masapul a sursuruentayo a matmatan dagiti sabsabali sigun iti panangmatmat ti Dios a saan ket a babaen dagiti pagrukodan ti tao, a mabalin nga inimpluensiaan ti panagimbubukod ken panangidumduma. Kasanotay a maaramidan dayta?

Sukimaten ni Jehova ti puso ti maysa a tao ket anamonganna dagidiay mangipakita kadagiti galad a kas ti ayat, kinaimbag, kinamanangaasi, ken mabayag a panagitured. Kasta met koma ti aramidentayo. (1 Samuel 16:7; Galacia 5:22, 23) Rebbeng a ti personalidad ti maysa a tao ti kitaentayo, sigun iti matukodtayo kas tattao, a saan ket a ti kolor ti kudilna wenno rasa a naggapuanna. Imbes a sapulen dagidiay nabaknang kadagiti material a bambanag, nasayaat a laglagipentayo ti panangmatmat ti Dios kadagiti kinabaknang ket ikagumaantayo ti “agbalin a nabaknang kadagiti naimbag nga aramid, naparabur, ken madadaan a mangiranud.” (1 Timoteo 6:18) Tapno magun-odan ti anamong ti Dios, masapul nga itultuloytayo a biruken ti umiso a pannakaammo iti Dios ken iti Anakna, ni Jesu-Kristo, nga agbalin nga edukado iti nadalus a pagsasao ti kinapudno. (Juan 17:3, 17) Iti kasta, maibilangtayto met kadagidiay anamongan ti Dios.