Di Lipatan ti Dios “ti Ayat nga Impakitayo iti Naganna”
“SAAN a nakillo ti Dios, tapno lipatenna ti aramidyo, ken ti ayat nga impakitayo iti naganna, gapu iti panangtulongyo kadagiti sasanto kadagiti pakasapsapulanda, ken iti panangtultulongyo pay ita kadakuada.” (Hebreo 6:10) Pudno dagitoy a sasao ni apostol Pablo kadagiti Saksi ni Jehova idiay Makindaya nga Europa. Iti simamatalek a panagserbida gapu iti nagan ti Dios, nagbannog ken nagan-anusda iti adu a dekada iti sidong dagiti panangipawil nga impatungpal dagiti gobierno a kontrolado ti dati nga Union Soviet. Silalagip ni Jehova kadagiti naimbag nga aramidda ket imburayna kadakuada dagiti bendision ti Pagarian. Kas pangarigan, kitaentayo ti napalabas a report ti tawen serbisio manipud iti tallo laeng kadagidiay a disso.
Dagiti Teritoria ti Dati nga Union Soviet
Ireport dagiti teritoria ti dati nga Union Soviet a bayat ti 1992 tawen serbisio, ngimmato ti bilang dagiti agibumbunannag ti Pagarian iti 35 porsiento—manipud 49,171 agingga iti 66,211! Ngem saan la nga agingga dita, yantangay nakaak-aktibo dagitoy nga agibumbunannag, kas makita iti yaadu dagiti naipaima a literatura ti Biblia, agraman dagiti magasin. Inusarda met a naimbag dagiti broshur ken bokleta, a nakaipaimada iti 1,654,559. Nasurok a mamitlo nga ad-adu ngem ti bilang idi napan a tawen nga 477,235! Aniat’ imbunga dagitoy a naipaima a pagbasaan? Nagdoble ti bilang dagiti panagadal ti Biblia iti pagtaengan. Adda 38,484 a panagadal ti Biblia ti maikonkondukta ita.
Immadu met dagiti nakiraman iti serbisio kas auxiliary payunir iti 94 porsiento. Nalawag a nakatulong daytoy iti naisangsangayan a bilang dagiti kabbaro a nabautisaran nga adalan a 26,986, no idilig iti bilang idi napan a tawen a 6,570, nakaskasdaaw a 311-porsiento nga irarang-ay!
Kasano a naallukoy iti naimbag a damag dagiti dadduma a kabbaro a nabautisaran? No dadduma gapu iti nauneg a pannakaseknan ti Saksi a mangidadaulo iti panagadal. Isalaysay ti maysa a mangidaulo a manangaywan a taga Moldova:
“Sinarungkaranmi ken baket ti maysa a babai a nangipakita ti interes iti kinapudno ti Biblia. Nairugi ti maysa a panagadal ti Biblia kenkuana. Nupay kasta, awan pulos interes ni lakayna. Maysa nga aldaw idi mapanmi sarungkaran tapno ituloy ti panagadal, nakalamlam-ek ti panniempona ken nayelo. Awan makitami a tao kadagiti lansangan, ngem nakadanonkami iti balayna iti oras a nagtulaganmi. Kinunana ken lakayna: ‘Makitam no kasano ti pannakaseknanda kadata? Nasapada uray no nakalamlam-ek.’ Daytoy ti namagpanunot ken lakayna. Binaliwanna ti panunotna ken nakipagadal metten, ket bautisadoda itan ken baketna kas Saksi.”
No dadduma ti kinadayaw dagiti Saksi ti mangguyugoy ti interes iti naimbag a damag. Kastoy ti kapadasan ti maysa a panglakayen, a maysa met a taga Moldova:
“Saan nga interesado kadagiti Saksi ni Jehova ti maysa a lalaki a nakasaok iti teritoria a pangaskasabaak. Kinunana nga isut’ miembro ti Eastern Orthodox Church, a kas iti amana ken apongna a lakay. Isu a dinawatna a pumanawakon. Nupay kasta, sakbay a pimmanawak, inikkannak iti gundaway a mangibaga iti panggep ti isasarungkarko. Dinakamatko ti Mateo 28:19, a kunana: ‘Inkayo ngarud ket pagbalinenyo nga ad-adalan dagiti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu.’ Kalpasanna intedko kenkuana ti adres ti lugar a paggigimonganmi saak nagpakada. Naklaatak ta maysa a lawas kalpasanna immay daytoy a lalaki iti gimongmi! Pinalpasna ti programa. Inlawlawagna a makalawas a nakonsiensia gapu iti di nainggayyeman a kababalin nga impakitana kaniak. Nairugi nga insigida ti panagadal ti Biblia, ket maysa itan a kabsattayo.”
Maysa pay a napateg a tampok ti tawen serbisio isu ti naparabur a panangipangag kadagiti kasapulan dagiti kakabsattayo iti dayta a disso. Bayat ti panawen ti lam-ek ti 1991/92, agarup 400 a tonelada ti taraon ken adu a lupot nga agpaay kadagiti lallaki, babbai, ken ubbing ti naipatulod kadagidiay agkasapulan. Kaaduan kadagitoy a probision ti naibunong iti amin a paset ti teritoria ti dati nga Union Soviet, agingga idiay Irkutsk idiay Siberia ken Khabarovsk, nga asideg iti Japan. Pudno a nakaskasdaaw a pakakitaan a di linipatan ni Jehova ti ayat nga impakita dagiti kakabsattayo iti naganna! Nagbanag met daytoy a pammaneknek ti nainkabsatan nga ayat a tinignay ti espiritu ni Jehova iti pannakaikaykaysada iti sangalubongan a pamiliada. Kas pangarigan, nagsurat ti maysa a kabsat a babai idiay Ukraine iti sanga nga opisina:
“Ti tulong nga intedyo kadakami sinagidna ti riknami. Uray la nakasangitkami ken nagyamankam ken Jehova a Dios ta dinakam linipatan. Pudno a narigat ti kasasaad ti biagmi ita, ngem gapu iti tulong a naggapu kadagiti kakabsat iti Lumaud, nakalung-awkami. Ita, gapu iti tulongyo, makaipaay ti pamiliami iti ad-adu a tiempo iti serbisio ni Jehova. No pagayatan ni Jehova, ag-auxiliary payunirkamto iti balasangko kadagiti bulbulan ti kalgaw.”
Mainayon pay, daytoy nga itutulong ket nakaipaay ti pammaneknek kadagiti saan a Saksi gapu ta makita dagiti agpalpaliiw nga ipakpakita dagiti Saksi ti ayat babaen dagiti aramidda. Insurat ti maysa a pamilia manipud iti sabali a kongregasion: “Nakaawatkami ti material a tulong a buklen ti taraon ken lupot. Nagadu! Ti tulong ken pammaregtayo sinursuruannakami a rumbeng met nga agaramidkami ti naimbag kadagiti sabsabali. Nadlaw dagiti di manamati, kasta met dagiti interesado a tattao ken dagiti pamiliada daytoy a panagtignay ti ayat; nangipaay dayta ti dakkel a pammaneknek maipapan iti pudno a panagkakabsat.”
Dagiti lima a kumbension distrito ken ti maysa nga internasional a kumbension a naangay itay napan a Hunio ken Hulio, nga addaan iti tema a “Dagiti Managawit iti Lawag,” ket maysa pay a pammaneknek ti panangbendision ni Jehova iti kinagaget dagiti Saksi ken iti ayat nga impakitada iti panangipakaammo ti naganna. Dagiti kumbension ket tinabunuan ti 91,673 a tattao, ken 8,562 ti nabautisaran. Idiay St. Petersburg ti kaaduan ti timmabuno, a nakaangayan ti internasional a kumbension, a sadiay 46,214—agraman dagiti delegado a naggapu iti agarup 30 a pagilian iti aglikmut ti lubong—ti naguummong idiay Kirov Stadium.
Idiay Siberia napan ti maysa a lalaki nga agarup 60 ti tawenna iti kumbension idiay Irkutsk tapno agpaliiw laeng. Kinunana: “Amin a timmabuno ket nakadaldalimanek ti panagkawkawesda, nakaisemda, ken naanusda iti maysa ken maysa. Kasla maysa a nagkaykaysa a pamilia dagitoy a tattao. Mariknam a mannakigayyemda saan laeng nga iti istadium no di pay ket iti amin a gundaway. Immawatak iti nagsayaat a literatura ti Biblia ket naammuak a nasaysayaat no ania a kita nga organisasion daytoy. Kayatko ti makiuman kadagiti Saksi ni Jehova ken makipagadal ti Biblia kadakuada.”
Iti dayta met la a kumbension idiay Irkutsk, a sadiay 5,051 ti timmabuno, kinuna ti maysa nga interesado a babai a taga Yakut Republic, Siberia: “Makasangitak a mangmatmatmat kadagiti tattao gaput’ ragsak. Agyamanak unay ken Jehova ta tinulongannak a nakaam-ammo kadagitoy a tattao. Ditoy kumbension, immawatak iti literatura, ket kayatko nga isarita dayta kadagiti dadduma. Tarigagayak unay ti agbalin a managdaydayaw ni Jehova.”
Kastoy ti kinuna ti direktor ti Central Stadium idiay Alma Ata, Kazakhstan, a sadiay 6,605 ti timmabuno iti kumbension: “Dayawek ti kababalinyo. Kumbinsidoak itan nga aminyo, ubbing ken natataengan, ket nadayaw a tattao. Diak maibaga a mamatiak iti Dios, ngem mamatiak kadagiti sagrado a bambanag nga iyanninaw ti panagkakabsatyo, iti kababalinyo kadagiti naespirituan ken material nga ipatpateg.”
Kinuna ti maysa a polis iti kumbension idiay Alma Ata: “Naminduan a nakalangenkayo iti kumbension. Makaay-ayo unay ti makipagtrabaho kadagiti Saksi ni Jehova.”
Romania
Saan met a linipatan ni Jehova ti ayat nga impakita dagiti kakabsat idiay Romania iti naganna. Makaparagsak dagiti pasamak para kadagiti Saksi iti napalabas a tawen serbisio. Umuna, naipasdek manen ti sanga nga opisina idiay Bucharest. Pinaritan ngamin ti gobierno ti Romania ti trabaho idi 1949. Addaan ti opisina iti agarup 20 a kakabsat a lallaki ken babbai nga agtartrabaho kadagiti baro a pasilidad. Adda 24,752 nga agibumbunannag ti serserbian ti sanga nga opisina—baro a kangatuan a bilang a mangirepresentar iti 21-porsiento nga irarang-ay no idilig iti promedio idi napan a tawen.
Kalpasan ti adu a tawen a panangasaba a sililimed, mairuruamen dagiti agibumbunannag iti trabaho a panangasaba kadagiti ruruangan. Ipakita ti maysa a kapadasan manipud Mureş County no kasano a gunggundawayan dagiti Saksi ti mangasaba kadagiti sabsabali, uray no agbibiaheda. Insurat ti sanga nga opisina:
“Inkeddeng ti maysa nga agibumbunannag ti mangasaba kadagiti kukuarto ti tren. Nasayaat ti reaksion dagiti tao, ngem iti maudi a kuarto, adda rimsua a parikut. Awan kadagiti biahero ti immawat kadagiti magasintayo. Idi agangay, narurod ti maysa a lalaki, ket timmakder sana imbugkaw: ‘Madamdama ipalladawko amin a magasinmo dita tawa! Apay aya a riribukennakami unay babaen ta relihionmo?’ Siaalumamay nga insungbat ti agibumbunannag nga uray no ipalladawna dagiti magasintayo, adda latta magunggonaan iti tignayna—dagidiay mangpidut kadagiti magasin. Nasdaaw iti kasta unay ti lalaki iti kinaalumamay ti agibumbunannag ta innalana dagiti magasin ket inrugina nga inwaras dagitoy kadagiti dadduma a biahero iti kuarto. Makapasiddaaw ta nangalada amin iti magasin. Idi naiwarasna aminen, awanen ti kopia ti lalaki. Isu a dinamag ti agibumbunannag: ‘Sir, kayatyo met kadi ti maaddaan iti kopia?’ Idi kuan inagaw ti lalaki ti magasin ti maysa a biahero nga addaan dua a kopia sana kinuna: ‘Adda kopiakon!’”
Iti adu a pagilian gargarien no dadduma ti trabaho a panangasaba dagiti Saksi ni Jehova ti ibubusor dagiti klero ti Kakristianuan. Idiay Romania, masansan a makapungtot dagiti padi ti Orthodox Church kadagiti Saksi. Ngem di malapdan daytoy ti panangbendision ni Jehova kadagiti tattaona gapu iti ayat nga impakitada iti naganna. Insurat ti maysa a manangaywan ti sirkito:
“Kaduami ti lokal a kongregasion a nangasaba kadagiti away. Adda sangagasut a kakabsat. Nangarkilakami iti bus a naglugananmi a napan kadagiti away agingga iti maysa a bassit nga ili a 50 kilometro ti kaadayona. Adut’ inawismi a dumngeg iti palawag publiko a maangay iti Cultural Home. Idi mangrugin ti gimong, apag-isu met a dimteng ti padi ti Orthodox tapno riribukenna ti gimongmi. Pinadas dagiti opisial ti polisia nga atipaen ti padi. Ngem saan a nagtanang ti padi. Napasardengna ti gimong idi binuongna ti sarming ti kangrunaan a ruangan a pagserkan. Nupay kasta, adu kadagiti lokal nga agnaed ti di pulos immayon iti kababalin ti padi. Naipaay ti naan-anay a pammaneknek kadagiti amin a timmabuno, ket adu a literatura ti naiwaras.”
Daksanggasat, mammano ti Saksi kadagiti dadduma a paset ti pagilian. Iti damo nga idadap-aw ti maysa a regular payunir iti ili ti Olt, adda laeng siam a kakabsat iti intero nga ili ken nalawa a teritoria a pangasabaan ti nasangpetanna. Kalpasan ti maysa a tawen ngimmato ti bilang dagiti Saksi iti 27, a lima kadagitoy ti na-reactivate nga agibumbunannag. Idiay siudad ti Corabia ti nagdagusan ti payunir; awan pulos Saksi sadiay. Kalpasan laeng ti 45 nga aldaw a kaadda dagiti Saksi sadiay, nagprotesta ti lokal a padi iti radio ti Craiova maibusor iti trabahoda. Kinunana a “rinautda” ti siudad ti Corabia babaen kadagiti sursuroda, nga uy-uyotanda dagiti tao a mangbaliw iti relihionda. Nagtultuloy ti panangatakarna, nga addaan panggep a mangpasardeng iti trabaho ken mangdadael iti reputasion dagiti Saksi iti dayta a disso. Nagngudo dayta idi adda dagiti lokal a kakabsat idiay Bucharest para iti distrito a kumbension. Siinget nga inyanunsio ti padi ti Orthodox iti Corabia kalpasan ti panangmisana: “Masapul a mangangaytayo ti demostrasion iti lansangan tapno maguyugoy dagiti polis a mangiwayat kadagiti addang maibusor kadagiti Saksi, a nangraut iti intero a disso babaen kadagiti publikasionda ken nangsabidong kadagiti tattao.” Ngem iti mismo a rabii sakbay a maangay koma dagiti gimong, adda karkarna a napasamak. Maysa a bunggoy dagiti managperdi ti nangdadael iti katedral ken iti City Cultural Home. Gapuna, saan a pulos a naangay ti demostrasion!
Dagiti Teritoria Ti Dati a Yugoslavia
Ti 1992 tawen serbisio ti nagbalin a narigat unay a tawen kadagiti kakabsat idiay Yugoslavia. Nupay kasta, makaparagsak latta dagiti kapadasanda. Pagyamanan ta di linipatan ni Jehova ti trabahoda ken ti ayat nga impakitada iti naganna.
Umuna a nangrugi ti gubat idiay Slovenia, kalpasanna idiay Croatia, ken kamaudiananna idiay Bosnia ken Herzegovina. Iti maysa laeng a tawen, iti maymaysa a republika, pinagreggetan dagiti lima a baro nga Estado nga ipasdek dagiti bukodda a pagbeddengan, linteg, ken kuarta. Ginasut a Saksi ti napilitan a nangpanaw kadagiti pagtaenganda ken nagkamang kadagiti kakabsatda iti dadduma a lugar. Kas kadagiti dadduma a pagilian idiay Makindaya nga Europa, natudingan dagiti emergency committee iti daddadakkel a siudad, a mangaywan kadagiti pagdagusan, taraon, ken kawes dagiti agkasapulan a kakabsattayo. Bayat ti tawen serbisio, agarup 55 a tonelada ti taraon ti naibunong kadagiti kakabsat kadagiti kongregasion nga adda kadagiti nariribuk a lugar. Adu a surat ti panangapresiar ti naawat.
Insalaysay dagiti kakabsat idiay Dubrovnik ti panagyamanda iti inawatda a tulong. Bayat nga iyaw-awid ti maysa a kabsat a babai ti nabungon a taraonna, dinamag ti maysa a kaarrubana no gimmatanganna kadagiti itlog. Kinuna kenkuana ti kabsat nga impatulod ida dagiti naespirituan a kakabsatna manipud iti sabali a lugar. Nasdaaw ti kaarrubana. Iti maysa pay a pasamak, immawag ti maysa a di-ammo a lalaki a taga Slovenia iti maysa a panglakayen ket kinunana: “Nadamagko a mangibumbunong dagiti Saksi ni Jehova iti taraon nga inawatda manipud kadagiti kakabsatda iti umiso a pamay-an. Nangipatulodakon iti sumagmamano a bungon kadagiti tattao; nupay kasta, saanda a pulos a nakagteng kadagiti nairanta a pakaipananda. Mabalin kadi nga ipatulodko laengen kadakayo dagiti tulong, ken dakayo laengen ti mangibunong?” Kasta met a nagsayaat ti panangipadamag dagiti diario ken radio iti trabahotayo a panangtulong.
Siaammo ti maysa a kabsat a nabautisaran iti internasional a kumbension idiay Zagreb idi 1991 kadagiti kumarkaro a pakarigatan ket ginatangna ti maysa a tiendaan ti taraon. Impanna ti taraon iti balayna nga asideg iti paggugubatan. Bayat a limmanlan ti ikikirang ti taraon, daytoy nga abasto ti nagbalin a pudno a bendision kadagiti kakabsat.
Mabalin ti gumun-od ti pammalubos para iti maysa a dakkel a trak a mangidanon kadagiti tulong a taraon kadagiti nalakub a kakabsat idiay Sarajevo. Maragsakankam a mangibaga a naballigi ti pannakaipatulod dagitoy.
Adu a biag dagiti sibilian ti inraman ti dangadang. Makapaladingit ta iti panagngudo ti tawen serbisio, innem kadagiti kakabsattayo a lallaki ken babbai ken dua nga interesado ti natay, ket dadduma ti nadangran.
Nupay kasta, ipakita dagiti adu a kapadasan a maysa a salaknib ti panagbalin a Saksi ni Jehova. Iti maysa a pasamak, agbibiahe dagiti kakabsat nga agturong iti kumbension distrito idiay Belgrade idi a ti bus ket pinasardeng dagiti soldado, a nangdamag no adda kadakuada ti kameng ti maysa a relihion. Awan ti insungbat dagiti kakabsat. Napilitanda a nangipakita kadagiti kard a pakabigbiganda, ket dadduma kadakuada ti addaan iti pakabigbigan a kamengda iti dayta a relihion. Inakusaran ida dagiti soldado iti panagulbod, ngem naitugot dagiti kakabsat ti pammaneknek iti panaglusulosda iti simbaan; kinunada a nupay no nakaiyanakanda dayta a relihion, Saksi ida itan ni Jehova, nga agbibiahe nga agturong iti pagkumbensionan. Gapu itoy, pinalubosan idan dagiti soldado.
Itultuloy dagiti payunir ti serbisioda a buyogen ti di agbaaw a kinaregta, ket pudno a daytoy ti mangpappapartak iti trabaho. Ti Pagwanawanan, iti makaay-ayo a de-kolor nga akkubna, ket maipatpatarusen a maigiddan kadagiti kangrunaan a pagsasao iti dayta a rehion. Regular a mangipapaay dayta kadagiti managayat iti kinapudno ken kinalinteg iti naespirituan a “pannakabagida a taraon iti umiso a tiempo.” (Lucas 12:42) Bayat ti 1992 tawen serbisio, 674 a kabbaro a kakabsat a lallaki ken babbai ti nabautisaran.
Pudno unay, di linipatan ti Dios ti trabaho dagiti kakabsat idiay Makindaya nga Europa ken ti ayat nga impakitada iti naganna. Mainayon pay, pagayatanna a suroten dagiti amin a managdaydayawna, sadino man ti pagnanaedanda, ti nasayaat a balakad a simmaruno nga impaay ni Pablo idiay Hebreo 6:11, a kunana: “Tarigagayanmi a tunggal maysa kadakayo ipakitana koma ti kasdi a regta a maipaay iti naan-anay nga inanama agingga iti panungpalan.”