Maitayabkayto Aya Idiay Langit?
ADUT’ mamati nga inton matayda mapandanto idiay langit. Ngem patien dagiti dadduma a maitayabdanto idiay langit iti maaw-awagan a rapture. Padpadaananyo met aya dayta?
Ti rapture isu “ti kellaat a panagpukaw ti riniwriw a tattao ket awan a pulos ti makaammo iti napananda!” Kasta ti kinuna ti maysa nga ebanghelista a Protestante. Sigun iti Evangelical Dictionary of Theology, ti sao a “rapture” tuktukoyenna “ti pannakaikaykaysa ti iglesia ken Kristo iti maikadua a yaayna.”
Maladingitan dagiti dadduma a mangpanunot iti panangpanaw kadagiti gagayyem ken kameng ti pamiliada tapno sabtenda ni Jesu-Kristo. Kaskasdi, adut’ mamati a masapul a mapasamak ti rapture. Mapasamakto aya? No wen, kaano?
Nagduduma a Kapanunotan Maipapan iti Rapture
Ipakita ti Biblia a sakbay a mangrugi ti naikari a Sangaribo a Tawen a Panagturay ni Kristo, addanto panawen a maaw-awagan “dakkel a rigat.” Kinuna ni Jesus: “Ta addanto dakkel a rigat a nanipud idi punganay ti lubong agingga ita awan pay kasta a napasamak, ket awanto metten iti uray kaano.” (Mateo 24:21; Apocalipsis 20:6) Namnamaen dagiti dadduma a dumteng ti rapture sakbay ti dakkel a rigat. Sigun kadagiti dadduma, mapasamak dayta bayat ti dakkel a rigat. Adda met dagiti agkuna a dumtengto ti rapture kalpasan dayta awan kapadana a rigat.
Popular agingga idi karrugi ti maika-19 a siglo ti pammati a mapasamak ti rapture kalpasan ti dakkel a rigat, wenno posttribulation. Iti dayta a tiempo, adda timmaud idi a maysa a movimiento idiay Inglatera nga indauluan ti maysa a dati a panguluen ti Church of Ireland, ni John Nelson Darby. Isu ken dagiti kas kenkuana nga Anglicano ti naawagan kas Brethren. Manipud idiay Plymouth a nakaipasdekan ti iglesiana, dinaliasat ni Darby ti Switzerland ken dadduma pay a paset ti Europa a nangaskasaba. Inwaragawagna a nagkadua-paset ti panagsubli ni Kristo. Mangrugi iti nalimed a rapture, a bayat dayta maitayab dagiti “sasanto” sakbay ti pito a tawen a rigat a mangdadael iti daga. Kalpasanna agparang ni Kristo, a kaduana dagitoy a “sasanto,” ket agturayda a sangsangkamaysa ditoy daga iti sangaribo a tawen.
Impaganetget ni Darby ti panagbalin a naisina iti lubong, ket dagidiay namati kenkuana naawaganda kas Exclusive Brethren idi agangay. Impanguluan ni B. W. Newton ti sabali a grupo a mamati met iti rapture ngem saan kano a pretribulation (sakbay ti dakkel a rigat). Kinuna met ni Alexander Reese, maysa a posttribulationist, a “dagiti teoria ti Secret-Rapture rakrakenda ti namnama iti Yaay ni Kristo.”
Patien dagiti pretribulationist a daytoy a panagsupadi ti kapanunotan apektaranna “ti namnama[da] mainaig iti yaay ni Kristo.” Kapkapnekan dagiti dadduma ti “partial rapture theory,” a patienda a dagiti napudno unay ken Kristo maitayabdanto nga umuna ket iti saan a mabayag sumarunonto dagiti saan unay a napudno.
Adu a grupo dagiti ebanghelista ti mangiwarwaragawag iti umad-adanin a pannaka-rapture dagiti matalek a Kristiano. Nupay kasta, gapu iti nagduduma nga opinion, kunaen ti bokleta nga impablaak ti Elim Pentecostal Church ti Britania: “Nupay mamatikami kadagiti pasamak a nainaig iti panagsubli ni Apo Jesus . . . , mapalubosan ti maysa a mangipatarus iti padto sigun iti maawatanna. Adu dagiti saan a dogmatiko, a padpadaananda a siaanus dagiti pasamak a mangibuksil iti padto.”
Ti naipaltiing a Sao ti Dios, ti Biblia, ti pangrukodan iti kinapudno ti amin a sursuro. (2 Timoteo 1:13; 3:16, 17) Gapuna, aniat’ kunaenna maipapan iti rapture?