Report Dagiti Manangiwaragawag ti Pagarian

Binaliwanda ti Kabibiagda

AWAN duadua a nakitayo idan a makisasao kadagiti dadduma kadagiti lansangan, sumarsarungkar kadagiti balbalay, ken tumabtabuno kadagiti Nakristianuan a panaggigimong kadagiti Kingdom Hall-da. Ti tuktukoyenmi isu dagiti nanakman-panaglanglangada nga agtutubo a Saksi ni Jehova. Mabalin nga ipagarupyo a nagbalinda a Saksi agsipud ta sinursuruan ida dagiti dadakkelda nga agbalin a kasta, ket pudno dayta iti adu kadakuada. Iti sabali a bangir, dadduma kadagitoy nga agtutubo ti addaan nagpaiduma unay a nalikudan ket ti dati a kabibiagda naigiddiat unayen iti agdama. Kinapudnona, dagidiay naipakita iti sumaganad a panid nakitimtimpuyogda idi kadagiti bunggoy dagiti kriminal ken manangabuso iti droga. Aniat’ nangbaliw a naan-anay iti kabibiagda? Intay pasiaren ti maysa nga ili idiay Norway ket am-ammuentayo ti dadduma kadagiti agtutubo a nangaramid iti kasta a panagbalbaliw.

Ti Pundasion iti Panagbalbaliw

Agtawen ni Annette iti 19 idi adda dua a Saksi a simmarungkar idiay balayda. “Masansan a binilindak a diak pulos makisarita kadagiti Saksi ni Jehova, ngem kayatko ti agusisa ket pinastrekko ida,” malagipna. Agus-usar iti droga ni Annette nanipud idi agtawen iti 11 ken nakiramraman kadagiti panagbirkug ken panagtakaw iti kotse.

Naallukoy iti naimbag a damag ti Pagarian. Ti inanama iti panagungar ti kangrunaan a nangparegta kenkuana agsipud ta pimmusay ni nanangna idi agtawen iti lima. Isu nga inawatna ti libre a panagadal ti Biblia ket inrugina ti nakigimong idiay Kingdom Hall. Inranudna iti nobiona ken kadagiti dadduma ti maad-adalna. Ti reaksionda? Dida kayat ti makipaset iti pudno a panagdayaw ket binabalawda ni Annette a masabsabidongan kano ti panunotna. Nupay kasta, dadduma kadagidiay napalalo idi ti panangbusorda ti nagadal met laeng iti Biblia idi agangay.

Alaentayo nga ehemplo ni Espen, maysa a baro nga agtawen iti 20. Nangngegna ti naimbag a damag ti Pagarian manipud iti nobio ni Annette ket dagdagus a kinayatna ti agadal ti Biblia. Nupay kasta, ur-urayenna ti uppat a bulan a pannakaibaludna, gapu ta nairaman iti panagipuslit iti droga ken, kas ken Annette, iti sumagmamano a panagbirkug. Naigamer met iti tabako, marijuana, ken dadduma pay a droga. Ita, ania koma ngay ti mangtignay iti maysa a tao a nairaman kadagita a bambanag nga agadal iti Biblia? Naamiris ni Espen ti kinakawaw ken kaawan panggep ti biagna. Kunana: “Naallukoyak iti karkari ti Biblia maipapan iti masanguanan nga isu ti nangted kaniak iti panggep iti biag. Isu nga inrugik ti nagadal tapno maammuak no imbagada met laeng kaniak ti pudno.”

Kayat ti Dadduma Pay ti Agadal ti Biblia

Agarup iti daytoy a tiempo, nangngeg ti maysa nga agtutubo a kameng ti isu met la a bunggoy ti naimbag a damag, ket inrugina met ti nagadal ken nakigimong. Kalpasanna, nairugi ti panagadal iti sabali pay a kadua dagitoy nga agtutubo, ket inrugina met ti nakigimong. Iti saan a nabayag, nakipagadal met iti Biblia ti maysa pay nga agtutubo a kadua dagiti gagayyemna ket rimmang-ay iti naespirituan. Kalpasanna maysa manen nga agtutubo a kabunggoyda ti nasdaaw iti dakkel a namalbaliwan dagiti gagayyemna, ket iti saan a nabayag, nakipagadal met iti Biblia.

Inrugi met ni Gilbert, maysa nga agtutubo a kumakanta a kameng ti isu met la a bunggoy, ti nagadal iti Biblia. Pareho a natay dagiti dadakkelna iti kanser, isu a naliwliwa iti inanama iti panagungar a masarakan iti Biblia. (Juan 5:28, 29) Agus-usar met iti marijuana ken nalulok ti kabibiagna, ken arapaapna ti agbalin a rock star. Nupay kasta, iti panaglabas ti panawen, nasayaat ti irarang-ayna iti naespirituan ket di nagbayag inkeddengna ti agbalin a Saksi ni Jehova. Kamaudiananna, inrugi met ti adien a lalaki ni Espen ti nangusig iti Biblia ken nakitimpuyog kadagiti Saksi.

Ti Kinapudno ti Biblia Baliwanna ti Kabibiag

Dakkel ti namalbaliwan dagitoy nga agtutubo a dati a naburara ti panagkawkawesda, sugabba dagiti buokda, ken nairaman kadagiti droga, panagtakaw, ken dadduma pay a krimen. Maysa a nagsayaat nga agibumbunannag ti Pagarian ni Annette ket nagserbi a kas payunir iti agarup makatawen. Nag-auxiliary payunir da Espen ken Gilbert ken ministerial nga ad-adipenda itan. Parehoda a nakaasawa iti uneg ti kongregasion Kristiano. Uppat pay kadagiti sigud a kabunggoyda ti naregta met a manangiwaragawag ti Pagarian!

Komusta met ngay ti uppat a bulan a sentensia ni Espen? Gapu kadagiti panagbalbaliw nga inaramidna iti biagna, nasukatan ti sentensiana iti 80 nga oras a panagtrabaho iti komunidad. Iti pammalubos ti polisia ken dagiti dadduma, binusbosna dagitoy nga oras iti lokal a Kingdom Hall dagiti Saksi ni Jehova. Naragsakan unay ti polisia iti daytoy nga urnos.

Wen, adu a dadduma pay nga agtutubo iti intero a lubong ti sigud a kriminal. Ngem inikkan ida ti kinapudno ti Sao ti Dios kadagiti sungbat kadagiti napateg a saludsod ken natalged a namnama iti masanguanan. Gapuna, saandan a kriminal wenno agus-usar iti droga, ket nanakmanen ti panagkawkawesda. Gapu ta binaliwandan ti kabibiagda, kasda la itan kadagiti tattao a nadakamat iti ngato​—agtutubo a nanakman ti panaglanglangada, ken aktibo a Saksi ni Jehova. Kayatda nga ipakaammo kadagiti dadduma dagiti manayon a solusion kadagiti parikut a sangsanguen ti nakaad-adu nga agtutubo ita.​—Kitaenyo ti 1 Corinto 6:9-11.

[Ladawan iti panid 8]

Da Espen, Annette, ken Gilbert