Makapapatay ti Panangitantan!
NAGTATARAY dagiti tallo a pamilia, pito a nataengan, ken innem nga ubbing tapno ispalenda ti biagda. Nagpupuniponda a nagkamang iti maysa a balay, a mangnamnama a malasatanda ti nakabutbuteng a panagtinnag dagiti bato. Ngem kabayatan a nagulimek ti garadugod dagiti agtinnag a bato, simmangbay ti sabali a pagamkan—maysa a nangisit nga ulep ti makapatunglab a dapo. Itan awanen ti maaramidan no di agtaray.
Iti sango ket maysa a lalaki, nalabit maysa nga adipen nga agtartaray a nakabaklay ti sangasako a makan ken dadduma pay a bambanag. Sinurot dagiti dua nga ubbing a lallaki, ti maysa ket agarup uppat ti tawenna, ti sabali lima, nga agkibkibin nga agtartaray. Simmurot dagiti dadduma—kasta unay ti butengda, marigrigatanda, agkaraitibkolda, kakaasida a mangsapsapul ti pagkamangan. Pinadasda ti aganges, ngem imbes nga angin, agneb a dapo ti nalang-abda. Maysa maysa a natumba dagiti 13 ken awan gawayda a napaidda, sa kamaudiananna nagaburanda iti dapo. Nagtalinaed koma a nagaburan dagiti nakapimpiman a rurogda no di nakali dagiti arkeologo ag-2,000 a tawen kalpasanna ken natakuatan ti nakaladladingit a napagtengda iti naudi a kanitoda.
Dagitoy 13 a biktima ket sumagmamano laeng kadagiti 16,000 a napattapatta a nagaburan iti daan a siudad ti Pompeii, Italia, idi Agosto 24, 79 K.P. Adu ti nakalasat iti immuna a panagbettak ti Bulkan Vesuvius babaen ti panangpanawda iti siudad. Ngem dagidiay nangitantan—a kaaduannat’ nabaknang a tattao a dida kayat a panawan ti balay ken sanikuada—nagaburanda kadagiti bato ken dapo nga 6 a metro.
Ti napasamak idiay Pompeii agarup 2,000 a tawenen ti napalabas mabalin a maysa a pasamak iti historia idi ugma. Ngem iti adu a pamay-an pumada iti situasion a sangsanguen ti sangatauan itatta. Maysa a sangalubongan a pagilasinan nga ad-adda a nakadadanag ngem ti garadugod ti Bulkan Vesuvius, ti mangipakpakdaar nga asidegen ti pannakadadael daytoy agdama nga urnos ti lubong. Tapno makalasat, masapul nga agtignaytayo a dagus. Makapapatay ti panangitantan. No ania dayta a pagilasinan ken no kasanotay nga agtignay a nainsiriban isut’ tema ti sumaganad nga artikulotayo.
[Picture Credit Line iti panid 2]
Cover photo by National Park Service
[Picture Credit Line iti panid 3]
Soprintendenza Archeologica di Pompei