PRESNO

Ti nagan ti maysa a kayo (Heb., tidh·harʹ) a mamindua nga agparang iti Hebreo a Kasuratan, iti Isaias 41:19 ken 60:13. Iti umuna a teksto nairaman dayta iti kaykayo a kas iti parwa ken sipres, a rumangpaya iti desierto a tanap iti sidong dagiti naipadto a pimmaraiso a kasasaad, ket iti naud-udi a teksto nairaman dayta iti isu met laeng a kaykayo kas paset ti “dayag ti Libano.” Ti pakabigbigan daytoy a kayo ket panangipapan, ngem adda sumagmamano a pammaneknek nga umanamong iti kayo a presno.​—Kitaenyo ti Theologische Literaturzeitung, Leipzig, 1926, p. 216.

Dua a kita ti presno, Fraxinus ornus ken Fraxinus oxycarpa, ti masarakan iti igid dagiti karayan ken waig iti bambantay ti Libano ken iti makinngato nga ungto ti Palestina, nupay iti pakabuklan saan nga iti intero a Palestina. Maikari daytoy a kayo kas paset ti “dayag ti Libano,” ta nagdakkel dayta a kayo a tumayag agingga iti 15 m (50 pie) a kangato. Addaan iti nakusnaw a berde a bulbulong ken maris-dapo a babassit a sanga. Nupay naikameng kas mula iti isu met laeng a pamilia kas iti olibo, ti presno naiduma iti olibo ta regregenna dagiti bulongna kada otonio.