Report Dagiti Manangiwaragawag ti Pagarian
Ti Kinamapagtalkan Itan-okna ti Ministeriotayo
TI KINAMAPAGTALKAN ket makalikaguman kadagiti Kristiano. Nagsurat ni apostol Pablo idiay Hebreo 13:18: “Mapnekkami unay nga adda nasayaat a konsiensiami, a tarigagayanmi ti agbiag a sitatakneng kadagiti isuamin a banag.” Ti kinamapagtalkantayo ‘arkosanna ti sursuro ti Dios a Manangisalakan kadatayo, iti isuamin a banag.’ (Tito 2:10) Mangted nabileg a pammaneknek ti kinamapagtalkan, kasta met ti panangikaskasaba ti Pagarian, dagiti dua a Kristiano idiay pagarian ti Tonga iti Makin-abagatan a Pacifico. Isalaysay ti sanga nga opisina ti Watch Tower Society idiay Makinlaud a Samoa:
“Adu a tawen nga inkaskasaba ti agassawa a Saksi ti Pagarian ti Dios kadagiti tattao iti uppat a purok idiay puroda ngem awan nabatad a nagbanaganna. Idi nagsakit ni lakayna, masapul nga asikasuen ti babai ti plantasionda ken agpisi ken agbilag ti kopra, ti kakaisuna a pagsapulanda. Idi dimteng ti tiempo a kitaen dagiti aggatang ti kopra, adda nailaok a sangasako a kukua ti sabali kadagiti lima a sakona. Sinugsogan dagiti pumurok nga ilemmengna ti sobra a sangasako ken ibilangna dayta kas bendision a naggapu iti Dios. Nupay kasta, nagkitakit ti kabsat, ket nupay innem a sako ti binayadanda, ti laeng bayad a maiparbeng kenkuana ti inawatna. Nadlaw ti kinamapagtalkanna.
“Iti saan a mabayag, idi napan ni lakayna iti sabali a puro, nagpagatang ti akinkukua ti tiendaan iti sumagmamano a bambanag para kenkuana. Inggatangan ti Saksi ket insublina ti supli iti lalaki. Nasdaaw ti lalaki. Kinunana a damo unay dayta nga adda nangisubli ti supli kenkuana. Kanayon ngamin a saanen nga isubli pay dagiti dadduma ti supli no kasta nga agpagatang kadakuada. Iti sabali a gundaway, idi adda masapul ti Saksi iti tiendaan daytoy a lalaki, inted ti lalaki ti tulbek ti tiendaan, nga imbilinna nga alaenna ti aniaman a masapulna ket ibatina ti bayad iti tiendaan. Sinaludsodan dagiti dadduma nga adda sadiay ti akinkukua ti tiendaan no apay nga itedna ti tulbek iti Saksi idinto a saan kadakuada. Inlawlawag ti akinkukua a ti Saksi laeng ti mapagtalkanna iti purokda.
“Nagdinamag kadagiti pumurok ti nasayaat a kondukta dagitoy nga agassawa. Nalatak dagiti Saksi gapu iti kinamapagtalkanda, ti neutral a takderda iti politika, ken ti panangpampaneknekda maipapan ti Pagarian ti Dios, a mangipakpakita ti naggiddiatan dagiti pammati dagiti pumurok ken dagiti sursuro iti Biblia. Itatta no rumsua dagiti saludsod maipapan iti Biblia, masansan nga asitgan dagiti tao dagiti Saksi maipaay kadagiti sungbat. Uray la a bumangon ni lakayna iti rabii, sa mapan iti ummong dagiti pumurok, ket sungbatanna dagiti saludsod a bumangon iti tema ti Biblia. No kasta a makipamunpon iti purok, masansan a dawatenda kenkuana nga ipakitana no aniat’ ibagbaga ti Biblia maipapan iti ipapatay, ket akseptarenda dagiti komentona.”
Isu a ti kinamapagtalkan dagitoy nga agassawa a Saksi ken ti panangikaskasabada ti Pagarian ket mangipapaay iti nasayaat a pammaneknek iti daytoy napintas a puro iti Makin-abagatan a Pacifico. Inanamaenda nga agadal ti Biblia dagiti sabsabali pay ken dumasigda iti kinapudno. No aramidenda daytoy, sigurado a bendisionan ida ni Jehova a Dios.—Juan 8:32.