Itultuloyyo ti Agserbi Kas Payunir

AGARUP 4,500,000 a Saksi ni Jehova ti mangiwarwaragawag ti naimbag a damag iti intero a lubong. Nasurok nga 600,000 kadakuada ti payunir, wenno amin-tiempo a manangiwaragawag ti Pagarian. Karaman kadagidiay nakaad-adu a payunir dagiti agtutubo ken dagiti nataenganen nga agtawen iti nasurok a 90. Nagduduma ti kasasaadda iti biag.

Awan duadua a kayat amin dagitoy nga amin-tiempo a manangaskasaba ti agballigi iti ministerio a panagpayunir. Adu ti agtarigagay nga agtalinaed kas payunir iti unos ti panagbiagda. Saan a mabalinan dagiti dadduma dayta gapu iti nagduduma a rason. Nupay kasta, nakapagtultuloy dagiti sabsabali nga agserbi kas payunir iti laksid dagiti pinansial a pakarigatan, nakapuy a salun-at, pannakaupay, ken dadduma pay a parikut. Isu a kasano a masaranget dagiti amin-tiempo a manangaskasaba dagiti kasta a parikut ken makapagtultuloy nga agserbi kas payunir?

Panangpaadda Kadagiti Pinansial a Kasapulan

Kaaduanna, masapul nga adda sekular a trabaho dagiti payunir tapno adda gastosenda, kas ken apostol Pablo. (1 Tesalonica 2:9) Iti dandani amin a paset ti lubong, mapaspasaranda ti ingingina ti taraon, pagan-anay, balay, ken transportasion. Masansan a narigat ti makabiruk iti part-time a sekular a trabaho a kasapulanda. No makastrekda man iti kakasta a trabaho, bassit lat’ mateggedda, nga awan pay dagiti benepisio ti health insurance.

No ‘itultuloytayo a biruken nga umuna ti Pagarian ti Dios ken ti kinalintegna,’ makapagtalektayo nga ipaay ni Jehova dagiti material a kasapulantayo. Isu a no maipasangoda iti pinansial a pakarigatan, di rumbeng nga ‘agagawa [dagiti payunir] ti maipaay iti sumaganad nga aldaw.’ (Mateo 6:25-34) Bayat nga ikagumaanda a risuten ti kakasta a parikut, ti napigsa a pammati ken Jehova saluadanna ida manipud nalabes a panagdandanag.

No maipasango ti maysa a tao kadagiti pinansial a pakarigatan, mabalin a kasapulanna ti agsalimetmet. No agbadyet, mabalin a mapaaddana dagiti kasapulanna, nupay saanna a magun-od dagiti material a banag a tarigagayanna. Tapno saanda unay a magastuan, dagiti dadduma a payunir makidagusda kadagiti dadduma a Kristiano ket agtitinnulongda nga agbayad iti abang ti apartment. Iti panangtulong kadagiti annakda nga agpayunir, no dadduma mangipaay dagiti nagannak iti libre wenno nalakat’ abangna a pagdagusan. Dagiti dadduma ikkanda dagiti payunir iti kuarta a para iti taraon ken pagplete. Ngem saan a kayat dagiti payunir ti agbalin a dadagsen kadagiti sabsabali, ta addaanda iti Nainkasuratan a rebbengen a mangaywan iti bagbagida.​—2 Tesalonica 3:10-12.

Mabalin a saan unay a dakkel ti magastos iti transportasion no agtitinnulong dagiti payunir a mangsupusop iti gastos. No adda kotse ti dua a payunir, mabalinda ti mangasaba iti maymaysa a lugar, iti kasta saanen a kasapulan ti maysa pay a kotse ta di isu pay a paggastuan. Dagiti payunir nga awanan iti kotse mabalinda ti makiparis kadagidiay addaan ken tumulongda a mangsupusop iti gastos. Tapno saanda unay a magastuan, mabalin a magnada laengen no asideg ti teritoriada. Iti adu a pagilian, dagiti publiko a lugan ti pagluganan dagiti payunir tapno makasalimetmetda.

Karaman kadagidiay nakasaranget kadagiti pinansial a parikut ken nakapagtalinaed iti amin-tiempo a serbisio da Newton Cantwell ken ti asawana. Inlakoda ti talonda ket rinugianda ti nagpayunir a kaduada ti innem kadagiti pito nga annakda idi 1932, kabayatan ti Great Depression. “Iti saan a nabayag naibusen ti amin a naglakuanmi iti talonmi​—kangrunaanna, pinagbaybayadmi iti doktor,” insurat ni Kabsat Cantwell. “Malagipmi nga idi immarkam iti sumaruno a teritoriami, ti nabati a kuartami ket umanay la a pagpaunami iti abang iti dua a lawas, ket lima a doliar laeng ti natda. Nupay kasta, ammomi a saannakam a baybay-an ni Jehova no la ket ta sipipinget nga agserbikami. . . . Nasursuromi ti agsalimetmet iti nagduduma a wagas. Iti yaakarmi iti baro a teritoria, makisaritaak no kua kadagiti sumagmamano nga akinkukua iti paggasolinaan ken ilawlawagko nga adda tallo a kotse nga us-usarenmi iti inaldaw iti Nakristianuan a trabahomi. Isu a masansan nga ikkandakami iti diskuento no aggasolinakami. Di nagbayag nasursuro dagiti annakmi a lallaki a tarimaanen dagiti kotsemi, iti kasta saanen a masapul a patarimaanmi pay iti sabali ta di isu pay a paggastuan.” Gapuna, napagballigian ti pamilia Cantwell dagiti pinansial a karit ket nakapagtalinaedda iti amin-tiempo a serbisio. Payunir pay laeng ni Kabsat Cantwell idi pimmusay iti edad a 103.

Pananggun-od iti Part-time a Trabaho

Adu a payunir ti mangsupsuportar iti bagida iti pinansial babaen ti part-time a pagsapulan. Tapno masuportaranna ti bagina iti ministeriona idiay Corinto, nakipagtrabaho ni Pablo kada Aquila ken Priscila a kapammatianna iti panagaramid iti tolda. (Aramid 18:1-11) Itatta, masansan a maragsakan dagiti naespirituan a kakabsat a mangipaay iti part-time a pagsapulan kadagiti payunir. Magun-odan dagiti dadduma a payunir ti kasta a trabaho babaen dagiti employment agency a mangipapaay kadagiti temporario a trabaho. Nasken ti panagtalek iti Dios, kasta met ti napasnek a panangikararag iti panangiwanwanna iti panangaramid kadagiti pangngeddeng a mainaig iti panggedan.​—Proverbio 15:29.

“Idi naaddaanak iti pigsa ti pakinakem gapu iti panagkarkaragko,” kinuna ti maysa a payunir, “inlawlawagko iti superbisorko a ti ministerial a trabahok ket maysa a serioso a personal a rebbengen ket diak mabalin nga awaten ti amin-tiempo a saad. Iti sumuno a Mierkoles, dinamagda no kayatko ti agtrabaho iti part-time. Siraragsak nga immannugotak.” Dikay laglag-anen ti bileg ti kararag, ket pasarunuanyo ti kararagyo iti aramid.

Mabalin a nasayaat no ibaga dagiti payunir kadagiti mainanama nga among a ti panggepda nga agsapul iti part-time a trabaho isu ti panangsuportar iti bagbagida iti ministerio. Mabalinda a dakamaten dagiti aldaw a nawayada ken no mano nga oras ti mabalinda a busbosen iti trabaho. Nabalinan ti dua nga agkabsat a babbai a pagbingayan ti amin-tiempo a trabaho iti maysa a kompania a mangipapaay iti legal a balakad, a nangipalubos kadakuada nga agtrabaho iti dua ket kagudua nga aldaw iti uneg ti makalawas. Daytoy ti nangsuportar kadakuada iti panagpayunirda agingga idi naawisda nga umatender iti Watchtower Bible School of Gilead ken natudinganda nga agserbi kas misionera.

Mabalin a masarakan ti nagduduma a kita ti trabaho nga anamongan ti Kasuratan babaen ti pannakisarita kadagiti kapammatian ken kadagiti sabsabali wenno babaen ti panangkonsulta kadagiti advertisement iti periodiko. Makatulong ti kinapakumbaba, ta no napakumbaba dagiti payunir saanda a napili unay iti kita ti trabaho nga aramidenda. (Idiligyo ti Santiago 4:10.) Tapno maituloyda ti agpayunir mabalin a kasapulanda ti sekular a trabaho nga ibilang dagiti dadduma a nanumo wenno nababa. No awatenda ti kasta a trabaho nupay sabali ti tarigagayanda, mabalin a makabirukdanto iti sabali a pagsapulan inton agangay.

Nakapuy a Salun-at ken Pannakaupay

Dagiti dadduma masapul nga isardengda ti agpayunir gapu kadagiti nakaro a parikut iti salun-at. Nupay kasta, no saan a nadarasudos dagiti payunir iti daytoy a banag, mabalin a maagasanto met laeng ti sakitda wenno sumayaat ti salun-atda a mangipalubos kadakuada a mangitultuloy iti kinapayunirda. Adu latta ti makapagpayunir iti laksid dagiti parikutda iti salun-at agsipud ta agpaagasda, sursurotenda a naimbag ti naibalakad a dieta para kadakuada, ken addaanda iti umdas nga inana ken arsisio. Napaliiw ti maysa nga agdaldaliasat a manangaywan ti maysa a kabsat a babai a payunir nga agsagsagaba iti kasta unay iti arthritis ta masapul nga adda mangsaranay kenkuana a magna iti panangasaba iti binalaybalay. (Aramid 20:20) Kaskasdi, 33 a panagadal ti Biblia iti pagtaengan ti idadauloda ken lakayna ket 83 a tattao ti natulongandan nga immawat iti kinapudno ti Dios. Idi agangay simmayaat ti salun-atna, ket immatender iti Pioneer Service School 11 a tawen kalpasanna.

Dagiti dadduma mabalin nga isardengda ti agpayunir gapu ta maupayda. (Proverbio 24:10) Kinuna ti maysa a payunir iti maysa nga agdaldaliasat a manangaywan: “Isardengkon ti agpayunir. . . . Adu ti bayadak.” Kasapulanna ti anteohos nga aggatad iti 20 a doliar. “Sumardengka kadi nga agpayunir gapu ta kasapulam ti anteohos nga agpateg iti 20 a doliar?” sinaludsod ti manangaywan. Naisingasing nga agtrabaho ti payunir iti lokal a plantasion ti kape iti maysa nga aldaw, mangtegged iti 20 a doliar, gumatang iti anteohos, ket ituloyna ti agpayunir. Bayat ti panagsaritada, naammuan a maup-upay gayam gapu ta dakkel ti magasgastosna iti panangpatarimaan iti kotsena. Naisingasing a tapno saan unay a magastuan, saan unay nga umad-adayo no kasta nga usarenna ti kotsena. Naibalakad met kenkuana a taginayonenna ti espiritualidadna. Inyaplikar ti payunir ti balakad ket innem a bulan kalpasanna, naawis nga umatender iti Eskuelaan ti Gilead. Kalpasan ti panagturposna, naibaon iti sabali a pagilian ket simamatalek a nagserbi sadiay iti adu a tawen agingga iti ipapatayna. Wen, masansan a dakkel a bendision ti ibungana no saantay a paupay no di ket laglagipentayo nga adda kadatayo ni Jehova.

Ipategyo ti Pribilehioyo

Nupay napadasan ni Pablo ti nakurkurangan ken nabisbisinan, imbilangna ti ministeriona a gameng. (2 Corinto 4:7; 6:3-6) Iti sango ti pakarigatan ken pannakaidadanes ita, adu kadagiti adipen ni Jehova idiay Africa, Asia, Makindaya nga Europa, ken iti dadduma pay a lugar ti nakapagtalinaed iti pribilehioda nga agserbi kas payunir. Gapuna, no dumteng dagiti pakasuotan, ikagumaanyo ti agtalinaed iti daytoy a naisangsangayan a serbisio, iti pakaidaydayawan ni Jehova.

Nabaelan ti kaaduan a payunir ti simrek iti amin-tiempo a trabaho a panangasaba agsipud ta pinagbalinda a simple ti panagbiagda. Kas ken Pablo, sinarangetda dagiti materialistiko a pakaallukoyan ken mapnekda no adda la ket ‘pagtaraon ken pagkawesda.’ Tapno makapagtultuloyda nga agserbi kas payunir, masapul a mapnekda kadagiti nasken a bambanag. (1 Timoteo 6:8) Rag-o ti ibunga ti panangipateg kadagiti pribilehiotayo nga inted ti Dios, nga ipangpangruna ida ngem kadagiti material a sanikua.

Tapno iyilustrar: Naaddaan ni Anton Koerber iti pribilehio a mangirepresentar iti intereses ti Pagarian kadagiti opisial ti gobierno idiay Washington, D.C. Nagserbi kas maysa a payunir iti sumagmamano a tiempo ket nagbalin a manangaywan ti sirkito idi 1950’s. Naminsan, isut’ tinukonan ti dadduma kadagiti dati a katrabahuanna iti negosio a mamagbalin kenkuana a milionario. Ngem masapul nga ipamaysana ti amin a panawenna iti negosio iti agarup makatawen. Kalpasan ti panangikararagna iti panangiwanwan ken iti kinasimbeng ti panunot, kinunana: “Diak mabalin nga ibbatan dagiti nakaay-ayat a pribilehiok iti panagserbi ken Jehova ditoy iti uray makatawen laeng, uray pay matagikuak amin a pirak ditoy lubong. Napatpateg kaniak ti panagserbi kadagiti kakabsatko ditoy Washington, ket ditoy ammok a bembendisionannak ni Jehova. Agpayso a posible nga agbalinak a milionario, ngem iti ngudo ti tawen ti kasta a kita ti panagbiag, anianto pay ti kasasaadko iti naespirituan, wenno iti pisikal pay ketdi?” Isu a pinagkedkedanna ti diaya. Ti panangipateg kadagiti pribilehio iti umasping a wagas tulonganna dagiti adu nga agtultuloy nga agserbi kas payunir.

Anian a naindaklan dagiti bendision a tagtagiragsaken dagiti payunir! Maysa a bendision ti panangisarsarita iti kinadayag ti kinaari ni Jehova iti adu nga oras. (Salmo 145:11-13) Gapu iti panangbusbosda iti adu a panawen iti ministerio, sagsagrapen dagiti payunir ti bendision iti panangipaay iti naespirituan a liwliwa kadagiti napanglaw ken mairurrurumen, masakit wenno naulila, ken kadagiti dadduma pay a marirriribukan iti kasta unay ken makasapul iti natalged a namnama. Gapuna, no palubosannatayo dagiti kasasaad a makipaset iti amin-tiempo a trabaho a panangasaba, awan duadua a tagiragsakentayo ti adu a bendision. “Ti bendision ni Jehova ti mangpabaknang.” (Proverbio 10:22) Ket babaen ti tulong ken pammendisionna, sirarag-o a maitultuloy dagiti adu a manangiwaragawag ti Pagarian ti agserbi kas payunir.