Dagiti Saksi ni Jehova iti Intero a Lubong ti Republika ti Filipinas

TI 7,083 a napaddukol a tropikal a puro a mangbukel iti Republika ti Filipinas buklendat’ akinngato a paset ti agarup nalapunos ti danum a kabambantayan.a Ket ti 62,000,000 nga umili ti Filipinas pagaayatda ti makisarita maipapan iti gistay aniaman a suheto. Daytoy mannakigayyem a kababalin nagresulta iti maysa a nadam-eg a daga para iti pannakaikaskasaba ti Pagarian.

Panangasaba Idiay Eskuelaan

Iti puro ti Masbate, nabalinan ti maysa nga agtutubo nga estudiante iti high school a kinasabaan ti maestrana ken dagiti kaklasena kabayatan ti true-false quiz. Ipadamagna:

“Dagiti sasao ket, ‘No ay-ayatennak ti Dios, saannak nga ikkan iti parikut wenno palubosan nga agsagaba.’ Idi sukimaten ti maestrak dagiti papelmi, nakitana a ti sungbat ti amin ket pudno malaksid kaniak. Pinalubosannak ti maestrak a mangilawlawag iti klase no apay nga ulbod ti sungbatko. Kinunak a saan a ti Dios ti mangipapaay kadatayo kadagiti parikut, nupay ipalpalubosna ti panagsagaba ken ipalubosna a masuboktayo. Iti panangusarko iti Bibliak, a kanayon nga itugtugotko idiay eskuelaan, inlawlawagko iti klase dagiti sasao idiay 1 Juan 4:8, ‘Ti Dios ket ayat.’ Kalpasan ti panangilawlawagko, nakumbinsir ti maestrak, pinampagna ti lamisaan, ket kinunana: ‘Husto ni Marilou.’ Siak laeng ti nakaala ti umiso a sungbat iti daytoy a saludsod ket siak ti kangatuan ti markana.”

Adda iti Isuamin a Disso ti Mensahe ti Pagarian

Bayat ti panangasaba iti binalaybalay iti sabali pay a paset ti Filipinas, naam-ammo ti maysa a regular payunir (amin-tiempo a manangiwaragawag ti naimbag a damag) ti maysa nga ina nga addaan tallo a babassit nga annak. Nangipakita ti babai iti nasged nga interes iti mensahe ti Pagarian, ket daytoy ti nangpalaka tapno marugian ti panangiyadal ti Biblia kenkuana. Nupay saan a maragsakan ti asawana iti pannakipagadalna iti Biblia, nangruna kadagiti Saksi ni Jehova, nagtultuloy ti panagadal.

Inyakar ti lalaki ti pamiliana iti sabali a siudad, nga impagarupna a saanen a maituloy ni baketna ti makilangen kadagiti Saksi. Nupay kasta, di nagbayag, nasarakanda daytoy a babai ket intultuloyda nga inyadalan ti Biblia. Siempre, nakaunget ni lakayna. Sipupungtot a napan iti trabahona, a sadiay inyebkasna ti riknana iti akinkua iti lugan a tartarimaanenna. Saan nga ammo ti lalaki a daytoy a kustomer ket maysa kadagiti Saksi ni Jehova.

Inlawlawag ti Saksi a makagunggona unay iti intero a pamilia no itultuloy ni baketna ti agadal iti Biblia. Maipakatna dagiti prinsipio ti Biblia iti uneg a mismo ti pagtaengan. Naisingasing met a magunggonaan ti asawa a lalaki no maaddaan iti pannakaammo maipapan iti Pagarian ti Dios.

Ania ti nagbanagan daytoy a panagsarita? Nawayan ti asawa ti lalaki nga agadal iti Biblia, ket inkeddeng ti lalaki nga agsublida a sangapamiliaan iti sigud a taengda. Sadiay a rimmang-ay ti babai iti naespirituan agingga a nagbalin a di bautisado nga agibumbunannag ti Pagarian. Immannugot met ni lakayna a makipagadal iti Biblia, ket rinugian ti sibubukel a pamilia ti tumabuno kadagiti Nakristianuan a panaggigimong.

[Footnote]

[Kahon iti panid 8]

TI KASASAAD TI PAGILIAN

1993 Tawen ti Serbisio

KANGATUAN A BILANG TI MANANGASKASABA: 116,576

RATIO: 1 a Saksi iti 549

TIMMABUNO ITI MEMORIAL: 357,388

PROMEDIO A BILANG DAGITI AGIBUMBUNANNAG A PAYUNIR: 22,705

PROMEDIO A BILANG TI PANAGADAL ITI BIBLIA: 94,370

BILANG TI NABAUTISARAN: 7,559

BILANG DAGITI KONGREGASION: 3,332

SANGA NGA OPISINA: MANILA

[Ladawan iti panid 9]

Ti panangasaba iti pagtagilakuan mangyeg kadagiti nasayaat a resulta

[Ladawan iti panid 9]

Sanga nga opisina ti Watchtower Society idiay Manila