Talna ti Panunot iti Mannakisalisal a Kagimongan

“NO ASINOMAN ti agtarigagay nga umuna,” imbalakad ni Jesu-Kristo kadagiti apostolna, “isu masapul a maudi kadagiti isuamin ken agserbi kadagiti isuamin.” Nagririkiar dagiti apostol no siasino ti katan-okan kadakuada. Ammoda a kagura ni Jesus ti kasta a kababalin. Pulos a dina pinagsisinnalisal dagiti adalanna tapno rumang-ayda iti naespirituan.​—Marcos 9:33-37.

Sakbay nga immay ditoy daga, nakiraman ni Jesu-Kristo iti panangparsua iti immuna nga agassawa ket ammona no kasano ti pannakaaramidda. (Colosas 1:15, 16) Naparsua dagiti immuna a tao nga addaan kabaelan a rumang-ay nga awan dagiti nadawel a panagsisinnalisal. Saan a masapul nga agaapa dagiti tattao tapno masinunuo no siasino ti uloda, ket dida met masapul ti makisinnalisal kadagiti animal tapno agbiagda.​—Genesis 1:26; 2:20-24; 1 Corinto 11:3.

Ti Nagtaudan ti Espiritu ti Pannakisalisal

Kasano ngarud a ti nadawel nga espiritu ti pannakisalisal ket nagbalin a naturay a bileg iti kagimongan ti tao? Mangted ti pangripiripan ti immuna a kaso ti pammapatay iti pakasaritaan ti tao. Ti mannakisalisal nga espiritu ni Cain, ti inauna nga anak ti umuna nga agassawa, ti nangituggod iti panangpapatay. Pinatay ni Cain ni kabsatna nga Abel agsipud ta naay-ayo ti Dios iti daton ni Abel, ket saan a naay-ayo iti daton ni Cain. Ket kunaen ti Biblia a ni Cain “nagtaud iti daydiay nadangkes ket pinapatayna ni kabsatna.”​—1 Juan 3:12; Genesis 4:4-8.

Wen, ti nadangkes, ni Satanas a Diablo, ti nangirugi ken mangiparparegta iti mannakisalisal nga espiritu. Nupay maysa nga angheliko nga anak ti Dios nga addaan kadagiti natan-ok a pribilehio, kayatna ti ad-adu pay. (Idiligyo ti Ezequiel 28:14, 15.) Idi ginargarina ni Eva, impalgaknan ti tarigagayna. Kinunana a no mangan [ni Eva] iti maiparit a bunga, ‘agbalinto a kas iti Dios.’ (Genesis 3:4, 5) Kinapudnona, ni Satanas ti agtarigagay a makipada iti Dios, makisalisal ken Jehova. Ti riknana a mangartap iti Dios ti nangsulbog kenkuana nga umalsa.​—Santiago 1:14, 15.

Makaakar daytoy a kababalin. Gapu iti impluensia ni Satanas, napukaw daydi inted-Dios a talna iti kaunaan nga urnos ti pamilia. (Genesis 3:6, 16) Manipud iyaalsana a maibusor iti Dios, inturayan ni Satanas a Diablo ti sangatauan, a pinatanorna ti espiritu ti panagsasalisal, nga al-allilawenna dagiti lallaki ken babbai a mamati a ti panaglilinnaslasan ket isut’ tulbek iti balligi. Ngem, ilawlawag ti Biblia: “Ta no sadino ti yan ti imun ken rinnupir, adda sadiay ti riribuk ken amin a nakadakdakes a banag.” (Santiago 3:14-16) No kasta rinabsut ni Satanas ti ragsak ken kinatalna ti panunot ti tao.

Balligi nga Awan Panagsasalisal

Maisupadi iti panangguyugoy ni Satanas, mangted ti Biblia kadagiti ulidan ti balligi nga awan panagsasalisal. Ti kangrunaan isut’ ulidan ni Jesu-Kristo. Nupay adda idi iti langa ti Dios, pulos a saanna a pinanunot ti pannakipadana iti Dios no di ket innalana ti langa ti maysa nga adipen ket immay ditoy daga. Mainayon iti dayta, impakumbabana ti bagina ket nagtulnog agingga iti ipapatay iti kayo a pagtutuokan. Daytoy natulnog a kababalin, nga awanan espiritu ti pannakisalisal, ti makagapu a nagun-odna ti anamong ti Dios. “Gapu itoy met laeng a rason isu intan-ok ti Dios iti nangatngato a saad ket siaasi nga inikkanna iti nagan a nangatngato ngem iti tunggal sabali pay a nagan.” (Filipos 2:5-9) Adda kadi pay dakdakkel a balligi a mabalin a magun-odan ti siasinoman a parsua? Pinaragsakna ni Amana iti wagas a di nabaelan ti sabali a parsua, ket inaramidna daytoy nga awan ti aniaman nga espiritu ti pannakiribal wenno pannakisalisal.​—Proverbio 27:11.

Ipakpakita met dagiti nagadu a matalek nga anghel idiay langit daytoy a kababalin. Nupay nagbalin ni Jesus, isu nga ulo dagiti anghel, a nababbaba ngem isuda idi immay ditoy daga, sitatallugodda a nagserbi kadagiti pakasapulanna. Nalawag a dida pinanggep a gundawayan daydi a kasasaad, a padpadasenda nga alaen ti posisionna a kas Arkanghel.​—Mateo 4:11; 1 Tesalonica 4:16; Hebreo 2:7.

Ad-adda pay a nalawag ti pananggurada iti mannakisalisal a kababalin no usigentayo ti wagas ti panagtignayda mainaig iti panggep ti Dios a mangitan-ok kadagiti sumagmamano nga imperpekto a tattao iti imortal nga espiritu a biag, nga iti dayta a kasasaad “ukomen[danto] dagiti anghel.” (1 Corinto 6:3) Addaan nawadwad a kapadasan dagiti anghel iti panagserbi ken Jehova ken nalalaingda nga amang nga agaramid iti naimbag ngem dagiti imperpekto a tattao. Kaskasdi, maragsakan dagiti anghel nga agserbi kadagiti napulotan ditoy daga, a pulos a dida agimon iti awatento dagitoy. (Hebreo 1:14) Ti nasayaat, di mannakisalisal a kababalinda, ti mangipalubos kadakuada nga agtultuloy nga agserbi iti sanguanan ti trono ni Soberano nga Apo Jehova.

Sa, panunotenyo met dagiti matalek nga adipen ti Dios idi ugma a mapagungarto ditoy daga. Ni Abraham ket naidumduma nga ulidan ti pammati ken naawagan ‘ti ama dagiti amin nga addaan iti pammati.’ (Roma 4:9, 11) Nangituyang ni Job iti nasayaat nga ulidan ti panagibtur. (Santiago 5:11) Ni Moises, “isu idi ti napakumbaba unay kadagiti isuamin a lallaki nga adda iti rabaw ti daga,” ti nangitunda iti nasion ti Israel iti wayawaya. (Numeros 12:3) Siasino kadagiti imperpekto a tattao ti nakaibati iti nasaysayaat nga ulidan ti pammati, panagibtur, ken kinaemma ngem dagitoy a lallaki? Nupay kasta, agur-urayda nga agtawid iti naindagaan a pagturayan ti Pagarian ti Dios. (Mateo 25:34; Hebreo 11:13-16) Isuda, kas ken Juan a Mammautisar, maisaaddanto iti babaen “ti maysa a nanumnumo iti pagarian ti langlangit.” (Mateo 11:11) Agreklamodanto kadi, nga isikkirda a ti pammati, panagibtur, wenno kinaemmada ket mapadaanna wenno artapanna iti dadduma a kasasaad ti kababalin dagidiay naipaayan ti biag idiay langit? Sigurado a saan! Nararagsakdanto a naindagaan nga iturayan ti Pagarian ti Dios.

Uray ita, makaparagsak ta adda dagiti tattao nga awanan iti mannakisalisal a kababalin. Ni Yasuo, a nadakamat iti umuna nga artikulo, nairarem iti utang gapu ta nangnamnama iti balitok ket napukawna ti amin a sanikuana. Pinanawan dagiti makuna a “gagayyemna.” Gapu ta nangrugi a makipagadal iti Biblia ni baketna kadagiti Saksi ni Jehova, napan kadagiti gimongda kas panangipakitana iti panagbabawi gapu ta pinagsagabana ti pamiliana. Idi agangay, naikkatnan ti kinamannakisalisalna ket nagbalin a maysa kadagiti Saksi ni Jehova. Ita naragsaken iti tengnga dagiti Kristiano a gagayyem, a sitatallugod a tumulong kenkuana no tiempo ti rigat.

No Kasano a Pagtalinaeden ti Natalna a Panunot

Saan a kanayon a nalaka a pagtalinaeden ti natalna a panunot iti awan asina, mannakisalisal a kagimongan. Nasayaat no laglagipentayo a kondenaren ti Biblia dagiti “guranggura, ringgor, imun, dagiti irarasuk ti unget, dagiti rinnupir, pannakabingbingay, dagiti sekta, ap-apal” a kas ‘ar-aramid ti lasag’ a manglapped kadagiti tattao a mangtawid iti Pagarian ti Dios. Amin dagitoy nga ar-aramid ket kakuykuyog ti espiritu a mannakisalisal. Di pakasdaawan a pinabileg ni apostol Pablo dagiti taga-Galacia: “Ditay koma agbalin a manangipasindayaw iti bagi, a mangsulsulbog iti panagsasalisal ti maysa ken maysa, nga agiinnapal iti maysa ken maysa.”​—Galacia 5:19-21, 26.

Iti daytoy a konteksto, impakita ni Pablo iti suratna ti tulbek tapno maparmek ti managpasindayaw a pannakisalisal. Kinunana: “Ti bunga ti espiritu ket ayat, rag-o, talna, mabayag a panagitured, kinamanangaasi, kinaimbag, pammati, kinaalumamay, panagteppel. Awan ti linteg a maibusor kadagita a bambanag.” (Galacia 5:22, 23) Tulongannatayo dagiti bunga ti espiritu a mangpaksiat iti mannakisalisal a panunot kadagiti isiptayo. Panunotenyo, kas pangarigan, ti kualidad nga ayat. “Ti ayat saan a managimun,” ilawlawag ni Pablo. “Saan nga agpangas, saan nga agtangsit, saan a naalas ti panagtigtignayna, saanna a sapulen dagiti bukodna a pagimbagan, saan a magargari nga agpungtot.” (1 Corinto 13:4-7) No sukayentay ti ayat, maiwaksitayto ti imun, nga isu ti mangtigtignay a puersa iti espiritu ti pannakisalisal. Tulongannatay met dagiti dadduma pay a bunga ti espiritu a mangdalus iti puso ken panunottayo ti aniaman a natda nga espiritu ti pannakilinnaslasan. Kinapudnona, malapdan a sigud ti aniaman a rikna a makisalisal kadagiti dadduma tapno mangabak uray aniat’ mapaspasamak no adda panagteppel!​—Proverbio 17:27.

Nupay kasta, tapno mapatanortayo dagitoy a galad, masapul a palubosantayo ti espiritu ti Dios nga agtignay kadatayo. Maparayraytayo daytoy makapasalun-at a panagtignay ti nasantuan nga espiritu babaen ti di agressat a panagkarkararag ken panagdawdawat iti espiritu ti Dios a tumulong kadatayo. (Lucas 11:13) Kas sungbat iti kararagtayo, ania ti ited ti Dios kadatayo? Sumungbat ti Biblia: “Dikay maringgoran iti aniaman, no di ket iti amin a banag babaen ti kararag ken araraw agraman panagyaman maipakaammo koma dagiti dawdawatyo iti Dios; ket ti talna ti Dios a mangringbaw iti amin a panunot aywanannanto dagiti pusoyo ken dagiti pannakabalin ti isipyo babaen ken Kristo Jesus.”​—Filipos 4:6, 7.

Nagminar daytoy iti kasasaad dagiti apostol ni Jesus. Uray idi kalpasan nga inyussuat ni Jesus ti Pangrabii ti Apo iti maudi a rabii a pannakikaduana kadagiti apostolna, pinagsusupiatanda pay laeng no siasino kadakuada ti katan-okan. (Lucas 22:24-27) Pinadas ni Jesus a tulongan ida iti nadumaduma nga okasion a mangatur ti panagpampanunotda, ngem talaga a nairamut daytoy mannakisalisal a kababalin kadakuada. (Marcos 9:34-37; 10:35-45; Juan 13:12-17) Ngem, idi naawatdan ti nasantuan nga espiritu agarup 50 nga aldaw kalpasan daydi a panagsusupiatda, nagbalbaliw ti kababalinda. Saanda a nagririkiaran no siasino ti mangibagi kadakuada nga agsao iti sango ti nagagar a bunggoy a naummong iti dayta nga aldaw ti Pentecostes.​—Aramid 2:14-21.

Awan lugar ti aniaman a natauan a panangdominar iti kongregasion Kristiano. Idi masapul a risutenda ti parikut maipapan iti panagkugit, ni Santiago, a saan pay ketdi nga adalan idi natay ni Jesus, ti nangidaulo iti daydi napateg a taripnong. Awan ti pakakitaan a nagsusupiatanda no siasino ti mangidaulo iti dayta a taripnong ti bagi a manarawidwid iti kongregasion Kristiano. Anian a panagbalbaliw manipud iti daydi tiempo a dagiti apostol naimpluensiaanda iti espiritu ti pannakisalisal! Babaen ti tulong ti nasantuan nga espiritu, nalagipda ti sursuro ni Jesus ket naawatanda ti kaipapanan dagiti insurona.​—Juan 14:26.

Mabalin a pudno met dayta kadatayo. Babaen ti tulong ti nasantuan nga espiritu, mabalintayo a parmeken ti aniaman a rikna a makikompetensia kadagiti sabsabali tapno rumang-ay uray pagdaksan dagiti dadduma. Imbes ketdi, maaddaantayo iti natalna a panunot a mangringbaw iti amin a panunot. Ipanamnama ti Biblia kadatayo a ti gubuayan ti awan asina a panagsasalisal, ni Satanas a Diablo, maigarangugongton iti mabiit, a dinton mangdangran. (Apocalipsis 20:1-3) Awanton ti panagiinnartap dagiti agkakaarruba. Ti resultananto aya ket maysa a kagimongan nga awan panagrang-ayna? Pulos a saan! Maan-anayton dagiti tattao, saan a babaen ti panagiinnartapda, no di ket babaen ti pannakaipakat ti daton a subbot ni Jesus kadakuada.​—1 Juan 2:1, 2.

Ni Keinosuke, a nadakamat itay, a nakapadas idi iti ganas ti nailubongan a balligi babaen ti pannakailakona iti kaaduan pay laeng a kotse, kasta unay ti pannakapaksuyna iti mental ken pisikal, ngem kamaudiananna, nagikkat iti trabahona. Kunana: “Ita, napnon ti biagko iti pudno a ragsak.” Naawatanna no apay a ti biag ni Jesus ket pakakitaan iti pudno a balligi. Maragsakan itan iti aniaman a maaramidanna iti sangalubongan a kongregasion ti Dios. Iti kasta maisagsagana maipaay iti baro a lubong, a sadiay awanton ti kompetision. Mabalinyo met a masirmataan daytoy baro a lubong a sosiedad babaen ti isasarungkaryo iti maysa kadagiti Kingdom Hall iti lugaryo ken makilangen kadagiti Saksi ni Jehova.

[Ladawan iti panid 7]

Tagiragsakento ti natauan a kagimongan ti talna ken panagtitinnulong iti baro a lubong ti Dios