Naisalakan, Saan Laeng a Babaen Kadagiti Aramid, No Di ket Babaen ti Di Kaikarian a Kinamanangngaasi
“Naisalakankayo babaen ti pammati . . . Saan a maigapu iti ar-aramid, tapno awan ti tao a maaddaan iti pangibatayan iti panagpasindayag.”—EFESO 2:8, 9.
1. Kasano a naiduma dagiti Kristiano kadagiti kaaduan a tattao no maipapan kadagiti personal a nagapuanan, ken apay?
KASTA unay ti panangipannakkel dagiti tattao ita kadagiti personal a nagapuananda, ken masansan a napartakda a mangipasindayag kadagita. Saan a kasta dagiti Kristiano. Saanda nga ipasindayag dagiti bukodda a nagapuanan, uray dagiti nagapuananda mainaig iti pudno a panagdayaw. Nupay pagrag-oanda ti nagapuanan dagiti adipen ni Jehova kas maysa a grupo, dida pagpangas dagiti naitulongda kas indibidual. Bigbigenda nga iti panagserbi ken ni Jehova, napatpateg ti umiso a motibo ngem kadagiti personal a nagapuanan. Magun-od ti maysa a tao ti sagut a biag nga agnanayon, saan a maigapu iti personal a nagapuananna, no di ket babaen ti pammati ken babaen ti di kaikarian a kinamanangngaasi ti Dios.—Lucas 17:10; Juan 3:16.
2, 3. Ania ti impasindayag ni Pablo, ken apay?
2 Pagaammo unay ni apostol Pablo dayta a kinapudno. Kalpasan a namitlo nga inkararagna a mabang-aran manipud iti maysa a “siit iti lasag,” kinuna kenkuana ni Jehova: “Umdasen kenka ti di kaikarian a kinamanangngaasik; ta ti pannakabalinko maan-anay iti pagkapuyan.” Sipapakumbaba nga inakseptar ni Pablo ti pangngeddeng ni Jehova, ket kinunana: “Siraragsak unay, ngarud, nga agpasindayagakto pay ketdi no maipapan kadagiti pagkapuyak, tapno ti pannakabalin ti Kristo agtalinaed koma kaniak kas iti maysa a tolda.” Rumbeng a tuladentayo ti kasta a kinapakumbaba ni Pablo.—2 Corinto 12:7-9.
3 Nupay nagsayaat dagiti Nakristianuan a nagapuanan ni Pablo, binigbigna a saan a maigapu dagita iti aniaman a partikular a sagudayna. Sieemma a kinunana: “Kaniak, a maysa a tao a nanumnumo ngem ti kanunumuan iti amin a sasanto, naited daytoy di kaikarian a kinamanangngaasi, tapno ideklarak kadagiti nasion ti naimbag a damag maipapan kadagiti di matukod a kinabaknang ti Kristo.” (Efeso 3:8) Ipakita dagita a sasao ni Pablo nga isu ket saan a napasindayag wenno natangsit. “Ti Dios busorenna dagiti natangsit, ngem mangted iti di kaikarian a kinamanangngaasi kadagiti napakumbaba.” (Santiago 4:6; 1 Pedro 5:5) Tultuladentay kadi ti ulidan ni Pablo, a sipapakumbaba nga ibilangtayo ti bagitayo a nababbaba ngem kadagiti kakabsattayo?
“Ibilangyo a ti Dadduma Nangatngatoda”
4. Apay a no dadduma, narigat nga ibilang a nangatngato dagiti sabsabali ngem kadatayo?
4 Binalakadan ni apostol Pablo dagiti Kristiano: “Awan ti aniaman nga aramidenyo gapu iti rinnupir wenno gapu iti panangipasindayaw iti bagi, no di ket buyogen ti kinapakumbaba iti isip nga ibilangyo a ti dadduma nangatngatoda ngem dakayo.” (Filipos 2:3) Maysa a karit dayta, nangnangruna no adda akemtayo. Nalabit a marigatantayo nga agpakumbaba gapu ta uray kaskasano, adda impluensia kadatayo ti mannakisalisal a kababalin a nasaknap ita iti lubong. Posible nga idi ubbingtayo, naisuro kadatayo ti makisalisal, kadagiti man kakabsattayo wenno kadagiti kaklasetayo. Nalabit a masansan a maidagadag kadatayo nga ikagumaantay ti agbalin a kalaingan nga atleta iti eskuelaan wenno kasisiriban nga estudiante. Siempre, makomendaran no ipaaytayo ti amin a kabaelantayo iti aniaman nga umiso nga aktibidad. Nupay kasta, aramiden dayta dagiti Kristiano, saan a tapno magun-odda ti di maiparbeng a dayaw para iti bagida, no di ket tapno naan-anay a magunggonaanda iti dayta nga aktibidad ken nalabit tapno magunggonaan met dagiti dadduma. Ngem napeggad no kanayon a tarigagayantayo a datayo ti mapadayawan kas numero uno. Kasano a kasta?
5. No saan a maiwaksi, ania ti ibunga ti mannakisalisal a kababalin?
5 No saan a maiwaksi, ti mannakisalisal wenno napasindayaw a kababalin pagbalinenna a di managraem ken napalangguad ti maysa a tao. Nalabit nga agbalin a naapal kadagiti paglaingan ken pribilehio ti dadduma. Kuna ti Proverbio 28:22: “Ti tao nga addaan naapal a mata duroganna ti bagina a sumurot iti napapateg a bambanag, ngem saanna nga ammo a dumtengto kenkuana ti mismo a panagkasapulan.” Mabalin pay ketdi a sidudursok a gay-atenna dagiti pribilehio a dina pakaikarian. Tapno maikalinteganna ti tignayna, nalabit a rugianna ti agtanabutob ken mangkritikar kadagiti dadduma—dagiti pagannayasan a rumbeng a liklikan dagiti Kristiano. (Santiago 3:14-16) Uray an-annuenna, agpegpeggad a mapatanorna ti kababalin a panangipangpangruna iti bukod a bagi.
6. Ania ti impakdaar ti Biblia maibusor iti mannakisalisal a kababalin?
6 Gapuna, idagadag ti Biblia kadagiti Kristiano: “Ditay koma agbalin a manangipasindayaw iti bagi, a mangsulsulbog iti panagsisinnalisal, nga agiinnapal iti maysa ken maysa.” (Galacia 5:26) Dinakamat ni apostol Juan ti maysa a Kristiano a nalawag a natnag iti daytoy a kita ti kababalin. “Adda insuratko iti kongregasion,” kuna ni Juan, “ngem ni Diotrefes, a kayatna nga ikutan ti umuna a saad iti tengngada, saanna a siraraem nga awaten ti aniaman manipud kadakami. Dayta ti makagapu a, no umayak, lagipekto dagiti aramidna nga itultuloyna nga aramiden, nga agsalsalawasaw maipapan kadakami babaen iti dakes a sasao.” Anian a nakalkaldaang a kasasaad a pakatnagan ti maysa a Kristiano!—3 Juan 9, 10.
7. Ania ti kayat a liklikan ti maysa a Kristiano no maipapan iti agdama a nasaknap a mannakisalisal a kababalin iti panggedan?
7 Siempre, saan a realistiko a panunoten a naan-anay a maliklikan ti Kristiano ti amin a kita ti kompetision. Kas pagarigan, mabalin a kalikaguman ti trabahona nga isu ket makikompetensia kadagiti dadduma nga indibidual wenno iti dadduma a negosio a mangituktukon iti umasping a produkto wenno serbisio nga ituktukonna. Ngem uray kadagita a kasasaad, kayat ti maysa a Kristiano nga aramiden ti trabaho wenno negosiona buyogen ti respeto, ayat, ken konsiderasion. Liklikanna ti ilegal wenno di nakristianuan nga aramid tapno saan koma nga agdinamag kas maysa a mannakikompetensia, awan ikabkabilanganna a tao. Para kenkuana, saan a ti panagbalin a numero uno ti kapatgan iti biag—aniaman ti kalatna. No napateg ti kasta a kababalin kadagiti sekular a kalat, anian a napatpateg dayta no mainaig iti panagdayaw!
“Saan nga iti Panangipadis iti Sabali a Tao”
8, 9. (a) Apay nga awan ti rason nga agsisinnalisal dagiti Kristiano a panglakayen? (b) Apay nga agaplikar kadagiti amin nga adipen ti Dios ti 1 Pedro 4:10?
8 Ti kababalin a rumbeng a salimetmetan dagiti Kristiano mainaig iti panagdayawda ket naibalabala kadagitoy a naipaltiing a sasao: “Paneknekan koma ti tunggal maysa no ania ti bukodna nga aramid, ket kalpasanna maaddaanto iti pakaigapuan ti panagrag-o maipapan iti bagina met laeng, ket saan nga iti panangipadis iti sabali a tao.” (Galacia 6:4) Sangsangkatunos nga agtrabaho dagiti panglakayen iti kongregasion kas maysa a bagi, nga ammoda a saanda a makisalsalisal iti maysa ken maysa. Pagrag-oanda ti maitulong ti tunggal maysa agpaay iti pagimbagan ti isuamin iti kongregasion. Iwaksida ngarud ti aniaman a mamagsisina a sinnalisal ket ipasdekda ti nasayaat nga ulidan ti panagkaykaysa agpaay iti intero a kongregasion.
9 Gapu iti edad, kapadasan, wenno kadawyan a saguday, dadduma a panglakayen ti mabalin a mas episiente ngem kadagiti dadduma, wenno mabalin a nasagudayanda iti naun-uneg a pannakaawat. Kas resultana, nagduduma ti annongen dagiti panglakayen iti organisasion ni Jehova. Imbes nga agkikinnompara, silalagipda ketdi iti balakad a: “Kas mairukod iti sagut nga inawat ti tunggal maysa, usarenyo dayta iti panagserbi iti maysa ken maysa kas nasasayaat a mayordomo ti di kaikarian a kinamanangngaasi ti Dios a nayebkas iti nadumaduma a pamay-an.” (1 Pedro 4:10) Kinapudnona, agaplikar daytoy a teksto kadagiti amin nga adipen ni Jehova, yantangay amin ket naparaburan iti sagut nga umiso a pannakaammo ken iti pribilehio a makiraman iti Nakristianuan a ministerio.
10. Iti ania laeng a pamay-an a maay-ayo ni Jehova iti sagrado a panagserbitayo?
10 Makaay-ayo ken ni Jehova ti sagrado a panagserbitayo no maigapu dayta iti ayat ken debosion, saan a tapno itan-ok ti bagitayo kadagiti sabsabali. Napateg ngarud a natimbeng ti panangmatmattayo kadagiti aktibidadtayo a mangitandudo iti pudno a panagdayaw. Nupay awan ti asinoman a siuumiso a makatingiting kadagiti motibo ti maysa a tao, ni Jehova ‘matingitingna dagiti puso.’ (Proverbio 24:12; 1 Samuel 16:7) Gapuna, nasayaat no regular nga imtuodentayo iti bagitayo, ‘Ania ti motibok iti panangaramidko kadagiti bambanag mainaig iti pammati?’—Salmo 24:3, 4; Mateo 5:8.
Umiso a Panangmatmat iti Trabahotayo
11. Ania a salsaludsod mainaig iti aktibidadtayo iti ministerio ti nainrasonan nga usigentayo?
11 Yantangay nakapatpateg ti motibo tapno magun-odtayo ti anamong ni Jehova, agingga ngarud iti ania nga ikagumaantayo nga iparangarang dagiti aramid ti pammatitayo? No la ket ta umiso ti motibo ti pannakipasettayo iti ministerio, napateg pay kadi nga irekordtayo no ania wenno kasano kaadu ti nagapuanantayo? Nainrasonan dagitoy a saludsod yantangay ditay kayat nga ipangpangruna ti numero ngem kadagiti aramid ti pammatitayo wenno ditay kayat a ti pananggun-od iti nangato a report ti agbalin a kangrunaan a pakaseknan ti Nakristianuan nga aktibidadtayo.
12, 13. (a) Ania ti sumagmamano a rason no apay nga irekordtayo dagiti nagapuanantayo iti tay-ak ti ministerio? (b) Apay a makaparagsak kadatayo ti panangrepaso iti pakadagupan a report ti trabahotayo a panangasaba?
12 Imutektekanyo no ania ti kuna ti libro nga Organisado a Mangaramid iti Pagayatan ni Jehova: “Maseknan dagiti immuna a pasurot ni Jesu-Kristo iti panagrang-ay ti trabaho a panangasaba. (Marcos 6:30) Ti libro ti Biblia nga Aramid ibagana kadatayo nga agarup 120 a tattao ti adda idi naiparukpok ti nasantuan nga espiritu kadagiti adalan idi Pentecostes. Di nagbayag, ti bilang dagiti adalan ket nagbalin a 3,000 sa kalpasanna 5,000. . . . (Aramid 1:15; 2:5-11, 41, 47; 4:4; 6:7) Sigurado a naparegta iti kasta unay dagiti adalan gapu kadagitoy a damag maipapan iti panagrang-ay!” Dayta met laeng ti rason no apay a dagiti Saksi ni Jehova ita ikagumaanda ti mangsalimetmet kadagiti umiso a rekord ti nagapuananda iti sangalubongan kas kaitungpalan ti sasao ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:14) Silalawag nga ipakita dagita a report no ania ti pudno a magapgapuanan iti sangalubongan. Ipakitada no ania a paset ti trabaho ti agkasapulan iti tulong ken no ania a literatura ken kasano kaadu a literatura ti kasapulan tapno mayadelantar ti trabaho a panangasaba.
13 Gapuna, ti panangireport kadagiti gapuanantayo iti panangasaba ket tumulong tapno agbalin a mas epektibo ti panangikasabatayo iti naimbag a damag ti Pagarian. Maysa pay, saan kadi a makapabileg kadatayo no maammuantayo ti magapgapuanan dagiti kakabsattayo kadagiti sabali a pagilian? Dagiti damag ti panagrang-ay ken ekspansion iti sangalubongan lapunosennatayo iti rag-o, tignayennatayo a mangaramid iti ad-adu pay, ken ipasiguradona kadatayo ti bendision ni Jehova. Ken anian a makaay-ayo a maammuan a nairaman ti personal a report-tayo iti sangalubongan a report! Bassit laeng ti nagapuanantayo kas indibidual no idilig iti dagup ti nagapuanan iti sangalubongan, ngem ipateg latta dayta ni Jehova. (Marcos 12:42, 43) Laglagipem, saan a makompleto ti sangalubongan a report no awan ti reportmo.
14. Malaksid iti panangasaba ken panangisuro, ania ti karaman iti panagdayawtayo ken ni Jehova?
14 Siempre, iti report ti tunggal Saksi, saan nga agparang ti adu pay a maar-aramidanna bayat nga itungtungpalna ti annongenna kas dedikado nga adipen ni Jehova. Kas pagarigan, saan a nairaman iti reportna ti regular a personal a panagadalna iti Biblia, itatabuno ken pannakipasetna kadagiti Nakristianuan a gimong, dagiti annongenna iti kongregasion, panangtulongna kadagiti kapammatian no kiddawen ti kasasaad, pinansial a tulongna iti sangalubongan a trabaho mainaig iti Pagarian, ken dadduma pay. Gapuna, nupay makatulong ti report mainaig iti magapgapuanantayo iti tay-ak tapno makapagtalinaedtayo a naregta iti panangasaba ken maliklikantayo ti agpamayan, nasken nga umiso ti panangmatmattayo iti dayta. Rumbeng a ditay panunoten a maikaritayo iti biag nga agnanayon gapu ta nasayaat ti report a nagapuanantayo iti tay-ak.
“Naregta iti Nasayaat nga Ar-aramid”
15. Nupay saantayo a maisalakan no babaen laeng kadagiti aramid, apay a napateg dagita?
15 Nupay saantayo a maisalakan no babaen laeng kadagiti aramid, nalawag a napateg dagita. Dayta ti makagapu no apay a naawagan dagiti Kristiano kas “maysa nga ili a naisangsangayan a kukuana, naregta iti nasayaat nga ar-aramid” ken no apay a maiparparegta kadakuada nga ‘agpipinnanunotda koma iti maysa ken maysa tapno mangparegta iti ayat ken nasayaat nga ar-aramid.’ (Tito 2:14; Hebreo 10:24) Kas panangipaganetget, kuna ti sabali pay a mannurat iti Biblia a ni Santiago: “No kasano a ti bagi nga awanan espiritu ket natay, kasta met a ti pammati nga awanan ar-aramid natay.”—Santiago 2:26.
16. Ania ti napatpateg pay ngem kadagiti aramid, ngem ania ti nasken a pagannadantayo?
16 Nupay mabalin a napateg dagiti nasayaat nga aramid, napatpateg pay dagiti motibo no apay nga ar-aramidentayo dagita. Nainsiriban ngarud no pasaray a sukimatentayo dagiti motibotayo. Gapu ta awan ti tao a makabael a mangammo nga eksakto no ania ti motibo ti dadduma, nasken nga agannadtayo di la ket ta ukomentayo dagiti sabsabali. “Siasinoka a mangukom iti adipen iti balay ti sabali?” ti saludsod kadatayo, a ti nalawag a sungbat ket: “Iti bukodna nga apo isu agtakder wenno maikulbo.” (Roma 14:4) Ni Jehova, ti Apo ti isuamin, ken ti dinutokanna nga Ukom, ni Kristo Jesus, ukomendatayo, saan laeng a maibatay kadagiti aramidtayo no di ket maibatay kadagiti motibo, gundaway, ayat, ken debosiontayo. Ni laeng Jehova ken ni Kristo Jesus ti siuumiso a makaibaga no natungpaltayo ti makalkalikaguman kadagiti Kristiano, kas kinuna ni apostol Pablo: “Aramidem ti amin a kabaelam a mangiparang iti bagim a naanamongan iti Dios, maysa a mangmangged nga awan ti aniaman nga ibainna, nga aramatem a siuumiso ti sao ti kinapudno.”—2 Timoteo 2:15; 2 Pedro 1:10; 3:14.
17. Nupay ikagkagumaantayo nga aramiden ti amin a kabaelantayo, apay a laglagipentayo koma ti Santiago 3:17?
17 Nainkalintegan ni Jehova no maipapan iti namnamaenna kadatayo. Sigun iti Santiago 3:17, ti maysa nga aspeto “ti sirib manipud ngato” ket “nainkalintegan.” Saan kadi a nainsiriban ken maysa a pudno a gapuanan no agbalintayo met a nainkalintegan a kas ken ni Jehova? Gapuna, nasken a ditay mangikeddeng kadagiti saan a rasonable ken narigat a maragpat a kalat maipaay iti bagitayo wenno kadagiti kakabsattayo.
18. Ania ti manamnamatayo no natimbeng ti panangmatmattayo kadagiti aramidtayo ken iti di kaikarian a kinamanangngaasi ni Jehova?
18 Agingga a natimbeng ti panangmatmattayo kadagiti aramid ti pammatitayo ken iti di kaikarian a kinamanangngaasi ni Jehova, mataginayontayo ti rag-o a pagilasinan kadagiti pudno nga adipen ni Jehova. (Isaias 65:13, 14) Matagiragsaktayo dagiti bendision nga iburburay ni Jehova iti ilina kas maysa a grupo, aniaman ti personal a nagapuanantayo. Bayat nga itultuloytayo ti ‘agkararag ken umararaw agraman panagyaman,’ ipakaasitayo iti Dios a tulongannatayo a mangaramid iti amin a kabaelantayo. Iti kasta, awan duadua a “ti talna ti Dios a mangringbaw iti isuamin a panunot saluadannanto dagiti puso[ta]yo ken dagiti pannakabalin ti isip[ta]yo babaen ken Kristo Jesus.” (Filipos 4:4-7) Wen, makaliwliwa ken makaparegta kadatayo ti pannakaammo a mabalintayo ti maisalakan, saan laeng a babaen kadagiti aramid, no di ket babaen ti di kaikarian a kinamanangngaasi ni Jehova!
Mailawlawagyo Kadi no Apay a Dagiti Kristiano
• liklikanda nga ipagpannakkel dagiti personal a nagapuananda?
• liklikanda ti mannakisalisal a kababalin?
• ireportda dagiti nagapuananda iti ministerio iti tay-ak?
• liklikanda nga ukomen dagiti padada a Kristiano?
[Ladawan iti panid 15]
“Umdasen kenka ti di kaikarian a kinamanangngaasik”
[Dagiti Ladawan iti panid 16, 17]
Pagrag-oan dagiti panglakayen ti maitulong ti tunggal maysa agpaay iti pagimbagan ti kongregasion
[Dagiti Ladawan iti panid 18, 19]
No awan ti reportmo, saan a kompleto ti pakadagupan a report