Malagipyo Pay Aya?

Tinagiragsakyo aya a binasa dagiti nabiit pay a ruar Ti Pagwanawanan? No kasta, interesadokayo a manglagip kadagiti sumaganad:

▫ Apay a dagiti Israelita a managsimisim pinilida ti immian iti balay ni Rahab a balangkantis?

Salsalimetmetan dagiti Israelita a managsimisim ti Linteg ti Dios, isu a saanda nga immian iti balay ni Rahab maipaay kadagiti imoral a panggep. Nalabit a napanunotda a saanda unay a maatap iti siudad no addada iti balay ti maysa a balangkantis. Ti nakaisaadan ti balay iti bakud ti siudad ket makatulong met iti panaglibas. Ngem kangrunaan iti amin, inturong ida ni Jehova iti maysa a managbasol nga addaan puso a natignay kadagiti damag maipapan iti pannakilangen ti Dios kadagiti Israelita a nanggapuanna a nagbabawi ken nangbalbaliw iti panagbiagna.​—12/15, pinanid 24-5.

▫ Kasano nga apektaran ti pungtot ti salun-attayo?

Ipakita dagiti panagadal a ti panagpungtot mangpataud kadagiti hormone a pakaigapuan ti pannakaburibor. Ti masansan a panagpungtot mabalin a mangparnuay iti di panagbalanse dagiti makasalaknib ken makadangran a kita ti kolesterol, a mamagpeggad kadatayo iti sakit ti puso.​—12/15, panid 32.

▫ Ania dagiti singasing a makatulong kadatayo a mangparang-ay ti panangipaimatayo iti magasin a Pagwanawanan ken Agriingkayo!?

Agbalin a sipapanunot iti Pagwanawanan ken Agriingkayo!; pagtalinaeden a simple ti presentasion; agbalin a mannakibagay babaen ti panangisagana kadagiti sumagmamano nga ababa a presentasion; mangikeddeng iti personal a kalat.​—1/1, pinanid 24-5.

▫ Apay a ni Moises ket maysa a nasayaat a teokratiko nga ulidan a surotentayo?

Nagpaiwanwan ni Moises ken Jehova kadagiti bambanag. Isut’ awanan kadagiti personal nga ambision no di ket ti pannakaidayaw ni Jehova ti pakaseknanna. Isut’ addaan natibker a pammati, ken pulos a dina linipatan a ni Jehova ti napaypayso nga Agturay iti nasion ti Israel.​—1/15, panid 11.

▫ Ania dagiti sumagmamano a pamay-an a ti nadiosan a panangisuro ket agballigi?

Agballigi ti nadiosan a panangisuro babaen ti panangipaayna iti ili ni Jehova iti progresibo a pannakaawat iti kinapudno. Iyegna dagiti tattao iti naespirituan a lawag, ken ipakitana kadagiti naemma no kasanot’ panagdayaw iti Dios “iti espiritu ken kinapudno.” (Juan 4:24) Agballigi met ti nadiosan a panangisuro kadagiti pakasuotan ken ti dakes a lubong.​—2/1, pinanid 10-12.

▫ Ania ti tulbek iti naballigi a panangbalakad?

Ti tulbek isut’ panangraem iti sabali a tao ken ti kalinteganna a matrato iti nadayaw a pamay-an. Gapuna, ti maysa a Kristiano a mamalakad rumbeng a naasi ken natibker ngem rumbeng nga aruatanna iti dayaw ti tao a balbalakadanna.​—2/1, panid 28.

▫ Kasano nga inawat ti Iglesia Romana Katolika ti Pannakaipalangit ni Maria kas maysa a doktrina?

Kadagiti immuna a siglo kalpasan ti ipapatay ni Jesus, ti kapanunotan a Pannakaipalangit ni Maria ket awan a pulos iti panunot dagiti Kristiano. Nupay kasta, kalpasan a nagbalin ti sursuro a Trinidad nga opisial a doktrina ti iglesia, nangrugi a naipaayan ni Maria iti napateg nga akem. Ti teoria a Pannakaipalangit ket saan a naawat kas sursuro agingga idi Nobiembre 1, 1950, idi inwaragawag ni Papa Pio XII: “Ipakaammomi daytoy kas maysa a sursuro nga impalgak ti Dios.”​—Munificentissimus Deus.​—2/15, pinanid 26-7.

▫ Idiay Jeremias kapitulo 24, ania ti iladawan dagiti dua a kuribot nga higos, dagiti nasayaat nga higos ken dagiti dakes?

Dagiti nasayaat nga higos iladawanda dagiti Judio a nakayawan idiay Babilonia, a manipud sadiay naikeddeng nga agsubli ti natda idiay Juda. Dagiti dakes nga higos itakderanda ni Ari Sedekias ken dagidiay kimmadua kenkuana a nagrebelde maibusor ken Ari Nabucodonosor nupay nagsapatada iti nagan ti Dios. Umasping iti dayta, masarakantayo kadagiti agdama a tiempo ti natda ti naespirituan nga Israel, a nakapataud iti naimbag a bunga iti biagda, kas maisupadi iti klero ti Kakristianuan, a nangpataud kadagiti rinuker a bunga.​—3/1, pinanid 14-16.

▫ Siasino dagiti Quartodeciman, ken apay a makapainteresda kadagiti Kristiano ita?

Kalpasan ti kaaldawan dagiti apostol, adda sumagmamano a mangramrambak iti Pangrabii ti Apo iti Nisan 14 kada tawen, kas panangsurotda iti ulidan dagiti apostol. Naawaganda kas “Fourteenthers,” wenno Quartodecimans. Makapainteres daytoy ita, ta ipakita dayta nga uray kalpasan ti ipapatay dagiti apostol, adda sumagmamano a mangang-angay iti umiso a pananglagip iti ipapatay ni Jesus maminsan kada tawen iti Nisan 14.​—3/15, pinanid 4-5.

▫ Siasino ni William Whiston?

Isu ket maysa a nalaing, maika-18-siglo nga eskolar idiay Inglaterra, nadekket a kadua ni Sir Isaac Newton. Impatarus ni Whiston ti Kristiano a Griego a Kasuratan, sipapanayag a binusorna ti doktrina a Trinidad, ken maysa a mannursuro iti astronomia ken matematika. Ngem kasla ad-adda a malaglagip ni Whiston gapu iti panangipatarusna kadagiti sinurat ti Judio a historiador a ni Flavius Josephus iti Ingles.​—3/15, pinanid 26-8.

▫ Kasano a naaramid ti tao a kaladladawan ti Dios? (Genesis 1:27)

Naaramid ti tao nga addaan abilidad a mangipakita kadagiti naisangsangayan a galad ti Dios kas ti ayat, kinahustisia, sirib, ken pannakabalin​—kasta met dagiti dadduma pay a galad.​—4/1, panid 25.